ସୋସିଆଲ ମିଡିଆ ବିଜ୍ଞାପନ ପଛରେ ବସିଛି ଡିଜିଟାଲ୍ ପକେଟମାର୍... ଶସ୍ତା ଡ୍ରାଏ ଫୁଡ୍ସ ଅଫର୍ ଲୋଭରେ ଗଲା ୧୭ ହଜାର ଟଙ୍କା । ଫେସବୁକ୍ ଆଡଭାଟାଇଜ୍ ଦେଖି ଫସିଲେ କଳିଙ୍ଗ ବିହାରର କେଦାରନାଥ । ଗୋଟିଏ କ୍ଲିକ୍‌ରେ ଖାଲି ହୋଇଗଲା ଆକାଉଣ୍ଟ...ନକଲି ପେଜ୍ ଖୋଲି ଲୁଟୁଛନ୍ତି ସାଇବର ଲୁଟେରା ।

ସୋସିଆଲ ମିଡିଆରେ ଚକ୍‌ଚକ୍ ବିଜ୍ଞାପନ ପଛରେ ବସିଛି ଡିଜିଟାଲ୍ ପକେଟମାର୍ । ଶସ୍ତା ଅଫର୍‌କୁ କରନ୍ତୁ ନାହିଁ ବିଶ୍ୱାସ ନଚେତ ସାଇବର ଠକ କରିଦେବେ ସର୍ବନାଶ ।୧୭୦୦ ଟଙ୍କାର ରିଫଣ୍ଡ୍ ଲୋଭ, ୧୭ ହଜାର ଟଙ୍କାର ଲାଗିଲା ଚୁନା ।

ଅଫର ଲୋଭନୀୟ ଥିଲା... ଆଉ କଥାର ଯାଦୁ ବି ଅତି ଚମତ୍କାର ଥିଲା.. ଜମ୍ମୁ-କାଶ୍ମୀରର ସୋନିଆ ଡ୍ରାଏ ଫୁଡ୍ସ ନାମକ ଏକ ସଂସ୍ଥାର ଫେସବୁକ ଆଡଭାଟାଇଜ୍ ଦେଖି ମନ ବଳାଇଥିଲେ ଭୁବନେଶ୍ୱର କଳିଙ୍ଗ ବିହାରର କେଦାରନାଥ ମାନସିଂ । ରଜ ପର୍ବ ପାଇଁ ୨ କେଜି ଡ୍ରାଏ ଫୁଡ୍ସ ମଗାଇଥିଲେ ।

ହେଲେ ସେ ଜାଣିନଥିଲେ, ସେ ଖାଦ୍ୟ ମଗାଉ ନାହାନ୍ତି ବରଂ ସାଇବର ସଇତାନର ଜାଲ ଭିତରକୁ ନିଜେ ଚାଲି ଚାଲି ଯାଉଛନ୍ତି । ଖେଳଟି ଆରମ୍ଭ ହେଲା ସେତେବେଳେ, ଯେତେବେଳେ ଫୋନ୍ ଆରପଟୁ କୁହାଗଲା- "ସାର୍, ଆପଣ ଅର୍ଡର କରିଥିବା ମାଲ୍ ସରିଯାଇଛି, ଆପଣଙ୍କ ୧୭୦୦ ଟଙ୍କା ରିଫଣ୍ଡ କରିଦେଉଛୁ".. ଟଙ୍କା ଫେରିପାଇବା ଆଶାରେ କେଦାରନାଥ ବିଶ୍ୱାସ କରି ବ୍ୟାଙ୍କ ଡିଟେଲ୍ସ ଦେବା ପରେ ଠକ ପଠାଇଲା ଏକ ନକଲି ଲିଙ୍କ୍ । ଆଉ ସେହି ଲିଙ୍କ୍ ଉପରେ କ୍ଲିକ୍ କରିବା ମାତ୍ରେ କେଦାରନାଥଙ୍କ କଷ୍ଟ ଅର୍ଜିତ ଟଙ୍କା ପାଣି ଭଳି ବୋହିଗଲା । ଆକାଉଣ୍ଟରୁ ଉଡ଼ିଯାଇଥିଲା ୧୭ ହଜାର ଟଙ୍କା !

ଏଥିସହ ପଢ଼ନ୍ତୁ: ରାଜଧାନୀରେ ନକଲି ଏସ୍କର୍ଟ୍ ସର୍ଭିସ,ସୋସିଆଲ ମିଡିଆରୁ ସୁନ୍ଦରୀଙ୍କ ଫଟୋ ଚୋରି କରି ଗ୍ରାହକଙ୍କୁ ଫସାଉଛନ୍ତି ଦଲାଲ

ଦୁଇ ଦିନ ହେଲା ସାଇବର ଥାନାର ଚକ୍କର କାଟୁଛନ୍ତି କେଦାରନାଥ । ଏତଲା ତ ଦିଆଯାଇଛି, ହେଲେ ସେପଟେ ସାଇବର ଲୁଟେରା ଅଦୃଶ୍ୟ ଯେଉଁ ପେଜ୍‌ରୁ ଅର୍ଡର ହୋଇଥିଲା, ସେଠୁ ଆଉ କୌଣସି ଉତ୍ତର ମିଳୁନି ।

ରଜ ପର୍ବର ଖୁସି ଏବେ କେଦାରନାଥଙ୍କ ପାଇଁ ଟେନସନ ପାଲଟିଯାଇଛି । ସୋସିଆଲ ମିଡିଆର ଏହି ଚକ୍‌ଚକ୍ ବିଜ୍ଞାପନ ପଛରେ ଥିବା କଳା ସତ୍ୟକୁ ବୁଝିବାର ସମୟ ଆସିଛି । ଆପଣଙ୍କର ଗୋଟିଏ ଭୁଲ୍ କ୍ଲିକ୍ ଆପଣଙ୍କ ପକେଟ୍ ଖାଲି କରିଦେଇପାରେ । ତେଣୁ ସାଇବର ପୋଲିସର ଧରପଗଡ଼ ଯେତିକି ଜରୁରୀ, ଆପଣଙ୍କ ସାବଧାନତା ସେତିକି ଆବଶ୍ୟକ ।