International News / ବାର୍ ବାହାରେ ଗର୍ଜିଲା AK-୪୭; ୨୭ ଜଣଙ୍କ ଅକାଳ ମୃତ୍ୟୁ

ଗତକାଲି ରାତିରେ ଦକ୍ଷିଣ ଆଫ୍ରିକାରେ ଦୁଇଟି ଭିନ୍ନ ସ୍ଥାନରେ ସାର୍ବଜନୀନ ସ୍ଥାନରେ ଗୁଳିକାଣ୍ଡ ଘଟିଛି । ଦୁଇଟି ଅଲଗା ଅଲଗା ଗୁଳିକାଣ୍ଡରେ ପ୍ରାୟ ୨୭ ଜଣଙ୍କର ମୃତ୍ୟୁ ହୋଇଛି । ପ୍ରଥମ ଘଟଣାଟି ଗୌତେଙ୍ଗର ଏକ ବାରରେ ଘଟିଥିଲା, ଯେଉଁଥିରେ ୧୭ ଜଣଙ୍କର ମୃତ୍ୟୁ ହୋଇଥିଲା ଏବଂ ୧୫ ଜଣ ଆହତ ହୋଇଥିଲେ । ପଶ୍ଚିମକେପରେ ଆଉ ଏକ ଗୁଳିକାଣ୍ଡରେ ବନ୍ଧୁକଧାରୀମାନେ ୧୦ ଜଣଙ୍କୁ ହତ୍ୟା କରିଛନ୍ତି ଏବଂ ଏଠି ୧୧ ଜଣ ଆହତ ହୋଇଛନ୍ତି ।

• ୪ ଜଣ ମହିଳା ବି ମୃତ

ବାର୍ ବାହାରେ ଗୁଳିକାଣ୍ଡରେ ଚାରି ଜଣ ମହିଳାଙ୍କ ମଧ୍ୟ ମୃତ୍ୟୁ ଘଟିଛି । ଦକ୍ଷିଣ ଆଫ୍ରିକା ପୋଲିସ କହିଛି ଯେ ଜୋହାନ୍ସବର୍ଗର ଦକ୍ଷିଣ-ପଶ୍ଚିମରେ ଥିବା ୱେଡେଲା ଟାଉନସିପରେ ଏକ ବାରରେ ବିଳମ୍ବିତ ରାତିରେ ଗୁଳିକାଣ୍ଡ ଘଟିଥିଲା । ଏହି ଅଘଟଣରେ ୧୭ ଜଣଙ୍କ ମୃତ୍ୟୁ ଘଟିଛି, ଯେଉଁଥିରେ ୧୩ ଜଣ ପୁରୁଷ ଏବଂ ଚାରି ଜଣ ମହିଳା ଅଛନ୍ତି । ପୋଲିସ କହିଛି ଯେ AK-47 ରାଇଫଲ୍ ଏବଂ ହ୍ୟାଣ୍ଡଗନ୍ ଧରି ପ୍ରାୟ ୮ ଜଣ ସନ୍ଦିଗ୍ଧ ବ୍ୟକ୍ତି ବାର୍ ଭିତରକୁ ପ୍ରବେଶ କରିବା ପୂର୍ବରୁ ବାହାରେ ଠିଆ ହୋଇଥିବା ଲୋକଙ୍କ ଉପରେ ଗୁଳି ଚଳାଇଥିଲେ । ଆକ୍ରମଣକାରୀଙ୍କ ଉଦ୍ଦେଶ୍ୟ ଏପର୍ଯ୍ୟନ୍ତ ଅସ୍ପଷ୍ଟ ଥିବାବେଳେ ପୋଲିସ ସନ୍ଦିଗ୍ଧ ଲୋକଙ୍କୁ ଖୋଜୁଛି ।

• ପଶ୍ଚିମକେପ୍‌ରେ ବି ଗୁଳିକାଣ୍ଡ

ତେବେ ପଶ୍ଚିମକେପ୍‌ରେ ହୋଇଥିବା ଅନ୍ୟ ଏକ ଘଟଣାରେ ୧୦ ଜଣଙ୍କର ମୃତ୍ୟୁ ହୋଇଛି । ଶନିବାର ସକାଳେ ପଶ୍ଚିମ କେପରେ ଆଉ ଏକ ଗୁଳିକାଣ୍ଡ ଘଟଣାରେ, ବନ୍ଧୁକଧାରୀମାନେ ଲୱାଣ୍ଡେଲ ଟାଉନସିପରେ ୧୦ ଜଣଙ୍କୁ ହତ୍ୟା କରିଥିଲେ ଏବଂ ଏହି ଘଟଣାରେ ୧୧ ଜଣ ଆହତ ହୋଇଥିବା ପୋଲିସ କହିଛି । ଅଧିକାରୀମାନେ କହିଛନ୍ତି ଯେ ୫ ଜଣ ପୀଡିତଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିଲା, ଯେତେବେଳେ ଅନ୍ୟ ୫ ଜଣଙ୍କର ହସ୍ପିଟାଲରେ ମୃତ୍ୟୁ ହୋଇଥିଲା ।

ପଢନ୍ତୁ ଏହି ଖବର: ସ୍କୁଲ ବସ୍‌କୁ ହଠାତ୍ ଗୁଳିମାଡ଼; ପ୍ରଥମେ ଡ୍ରାଇଭରକୁ ପିଟିଲେ, ତା ପରେ ଆଖିବୁଜା ଫାୟାରିଂ

ପୋଲିସ କହିଛି ଯେ ଅପରାଧୀମାନଙ୍କୁ ଖୋଜିବା ପାଇଁ ହିଂସାତ୍ମକ ଅପରାଧ ତଦନ୍ତକାରୀ ଅଧିକାରୀଙ୍କ ନେତୃତ୍ୱରେ ଏକ ଦଳ ଗଠନ କରାଯାଇଛି । ଏହି ପୃଥକ ଗୁଳିକାଣ୍ଡ ଘଟଣାରେ ଏଯାବତ କାହାକୁ ବି ଗିରଫ କରାଯାଇନାହିଁ । ଏଠାରେ କହିରଖୁଛୁ କି, କିଛି ଦିନ ପୂର୍ବରୁ ଦକ୍ଷିଣ ଆଫ୍ରିକାର ପୂର୍ବ ଉପକୂଳ ସ୍ଥିତ ଡରବନ୍ ସହରରେ ଏକ ହାଉସ୍ ପାର୍ଟିରେ ବି ଗୁଳିକାଣ୍ଡ ଘଟିଥିଲା । ଏହି ଘଟଣାରେ ଜଣେ ଗର୍ଭବତୀଙ୍କ ସହିତ ୧୧ ଜଣଙ୍କ ମୃତ୍ୟୁ ଘଟିଥିଲା ।