ବ୍ରହ୍ମପୁର ପ୍ଲଟ ବ୍ୟବସାୟୀ ସୁଧୀର ପାତ୍ର ହତ୍ୟା ମାମଲା । ଆଜି ୫ ଅଭିଯୁକ୍ତଙ୍କୁ ନେଇ ପୋଲିସ କରିବ କ୍ରାଇମ ସିନ୍ ରିକ୍ରିଏସନ । ଆଉ କିଛି ସମୟ ପରେ ଗୋପାଳପୁର ଥାନାରୁ ୫ ଅଭିଯୁକ୍ତଙ୍କୁ ଧରି କଡ଼ା ସୁରକ୍ଷା ବଳୟ ମଧ୍ୟରେ କ୍ରାଇମ ସିନ୍ କୁ ଯିବ ପୋଲିସ ।

ପ୍ରଥମେ ବଣଗାଁ ସ୍ଥିତ ଅପହରଣ ସ୍ଥାନରେ ଅଭିଯୁକ୍ତଙ୍କୁ ନେଇ ପହଞ୍ଚିବ । କିଭଳି ସୁଧୀରଙ୍କୁ ବୋଲେରୋ ଗାଡ଼ିରେ ଅପହରଣ କରିଥିଲେ ତାହାର ବି କ୍ରାଇମ ସିନ୍ ରିକ୍ରିଏସନ କରାଯିବ । କିଏ କିଏ ଓ କିଭଳି ସୁଧୀରଙ୍କୁ ଅପହରଣ କରିଥିଲେ ତାହାର ସମସ୍ତ ତଥ୍ୟ ପୋଲିସକୁ ଦେବେ ଅଭିଯୁକ୍ତ ।

ଅପହରଣ ସ୍ଥାନରେ କ୍ରାଇମ ସିନ୍ ରିକ୍ରିଏସନ ପରେ ବୁଗୁଡ଼ା ରାମପାଦ ଜଙ୍ଗଲକୁ ୫ ଅଭିଯୁକ୍ତଙ୍କୁ ନିଆଯିବ । ରାମପାଦ ଜଙ୍ଗଲରେ କିଭଳି ସୁଧୀରଙ୍କୁ ଶାରୀରିକ ନିର୍ଯାତନା ଦିଆଯାଇ ହତ୍ୟା କରାଯାଇଥିଲା ସେ ନେଇ କ୍ରାଇମ ସିନ୍ ରିକ୍ରିଏସନ କରିବେ ୫ ଅଭିଯୁକ୍ତ ।

କିଏ ସୁଧୀରଙ୍କୁ ତଳେ ପକାଇ ମାଡ଼ ମାରିଥିଲେ, କିଏ ସୁଧୀରଙ୍କ ହାତ ନିକଟରେ ବ୍ଲାଙ୍କ ଫାୟାର କରିଥିଲେ ତାହା ଦେଖାଇବେ ଅଭିଯୁକ୍ତ । ପରିଶେଷରେ ସୁଧିର ମୃତଦେହକୁ ଫିଙ୍ଗାଯାଇଥିବା ସ୍ଥାନ ତଥା ସୋରଡ଼ାର ଜଙ୍ଗଲରେ ହେବ କ୍ରାଇମ ସିନ୍ ରିକ୍ରିଏସନ ।

ଏଥିସହ ପଢ଼ନ୍ତୁ: ସୁଧୀର ହତ୍ୟାକାଣ୍ଡ: କେବଳ ସମ୍ପତ୍ତି କିମ୍ବା ଟଙ୍କା ନୁହେଁ ପ୍ରେମ ପାଇଁ ଫୁଟିଲା ଗୁଳି

କ୍ରାଇମ ସିନ୍ ରିକ୍ରିଏସନର ସମସ୍ତ ଘଟଣାକୁ ପୋଲିସ ପକ୍ଷରୁ ଭିଡିଓଗ୍ରାଫି ମଧ୍ୟ ହେବ । ୫ ଅଭିଯୁକ୍ତଙ୍କୁ ୩ ଦିନିଆ ରିମାଣ୍ଡରେ ଆଣିଛି ପୋଲିସ । ୫ ଅଭିଯୁକ୍ତ ହେଲେ କାଳୁ ଚରଣ ପ୍ରଧାନ, ସୂର୍ଯ୍ୟ ପ୍ରତାପ ସିଂ, ନାରାୟଣ ପ୍ରଧାନ, ଆଶିଷ ମହାପାତ୍ର, ଜିତୁନ ପଲେଇ ।

ଅନ୍ୟପଟେ ରିମାଣ୍ଡ ଅବଧି ଭିତରେ ସମସ୍ତ ଅଭିଯୁକ୍ତଙ୍କୁ ପୃଥକ ପୃଥକ ଜେରା କରିଛି ପୋଲିସ । ଏହାସହ ନିବେଦିତା ଓ ପ୍ରେମିକ କାଳୁ ପ୍ରଧାନକୁ ମୁହାଁମୁହିଁ ଜେରା କରାଯାଇଥିବା ସୂଚନା ମିଳିଛି । ସେହିପରି ଜିତୁନ ପଲ୍ଲେଇ ଓ କାଳୁ ପ୍ରଧାନକୁ ମଧ୍ୟ ମାରାଥନ ଜେରା କରାଯାଇଛି । ଅପହରଣ ପାଇଁ କାହିଁକି ଜିତୁନଙ୍କୁ ବାଛିଥିଲା ସେନେଇ ଜିତୁନ ପଲ୍ଲେଇ ଓ ସୂର୍ଯ୍ୟ ପ୍ରତାପ ସିଂ ସହ ମୁହାଁମୁଁହି ଜେରା ହୋଇଛି ।