Fake Doctor Arrest / କିଏ ଦ୍ଵାଦଶ ପାସ୍ ତ କିଏ କମ୍ପାଉଣ୍ଡର, ସାଜିଥିଲେ ଡାକ୍ତର; ୧୦ବର୍ଷ ହେଲାଣି ଚାଲୁଥିଲା କ୍ଲିନିକ୍

ରୋଗୀଙ୍କ ଜୀବନ ସହ ଖେଳ । ଦୀର୍ଘ ୧୦ ବର୍ଷ ଧରି ସାଜିଥିଲେ ନକଲି ଡାକ୍ତର । ରୋଗୀ କ୍ଲିନିକ୍ ଆସୁଥିଲେ, ଡାକ୍ତରଙ୍କୁ ଦେଖାଉଥିଲେ ଓ ଔଷଧ ନେଇ ବି ଘରକୁ ଯାଉଥିଲେ । କିନ୍ତୁ ଏହି ନକଲି ଡାକ୍ତରଙ୍କ ଯୋଗ୍ୟତା ଥିଲା ମାତ୍ର ଦ୍ଵାଦଶ ପାସ୍ । ଆଉ କିଛି ଜଣ କମ୍ପାଉଣ୍ଡର ମଧ୍ୟ ଥିଲେ । ଗୁଜରାଟ ସୁରତ ପାଣ୍ଡେସରା ଅଞ୍ଚଳରୁ ବିନା ମେଡିକାଲ ଡିଗ୍ରୀରେ କ୍ଲିନିକ୍ ଚଲାଉଥିବା ୮ ଜଣ ନକଲି ଡାକ୍ତରଙ୍କୁ ଗିରଫ କରିଛି ପୋଲିସ ।

• କେମିତି ଜଣାପଡ଼ିଲା ଘଟଣା ?

ଗିରଫ ହୋଇଥିବା ଅଭିଯୁକ୍ତଙ୍କ ମଧ୍ଯରେ ଜଣକର ନାମ ପାର୍ଥ ଦେବନାଥ ବୋଲି ଜଣାପଡ଼ିଛି । ପୋଲିସ କହିଛି ଯେ, ପାର୍ଥକୁ ନେଇ ଗମ୍ଭୀର ଅଭିଯୋଗ ସାମ୍ନାକୁ ଆସିଥିଲା । ଜଣେ ପରିବାର ଅଭିଯୋଗ କରିଥିଲେ ଯେ ଏହି କ୍ଲିନିକ୍ ଚିକିତ୍ସିତ ହେବାପରେ ତାଙ୍କର ୧୪ ବର୍ଷୀୟ ପୁଅ କିଶୋରର ମୃତ୍ୟୁ ଘଟିଛି । ଅନ୍ୟପଟେ ପୋଲିସ ଏହି ଡାକ୍ତରଙ୍କୁ ନେଇ ମଧ୍ୟ ସନ୍ଦେହ କରୁଥିଲା । ସେମାନେ ବିନା ମେଡିକାଲ ଡିଗ୍ରୀରେ କ୍ଲିନିକ୍ ଚଲାଉଥିବା ଜାଣିବାକୁ ପାଇଥିଲା ।

ଏହାପରେ କିଛି ନକଲି ରୋଗୀଙ୍କୁ କ୍ଲିନିକ୍‌କୁ ପଠାଯାଇଥିଲା । ତଦନ୍ତ ପରେ ପୋଲିସ ଓ ସ୍ଵାସ୍ଥ୍ୟ ବିଭାଗ ମିଳିତ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ । ପାଣ୍ଡେସରାର ୮ ଅଲଗା ଅଲଗା କ୍ଲିନିକ୍ ଉପରେ ଚଢାଉ ହୋଇଥିଲା ଓ ଏହାପରେ ୮ ଜଣ ଲୋକଙ୍କୁ ଗିରଫ କରାଯାଇଛି । ପୋଲିସର କହିବାନୁସାରେ, ଏମାନଙ୍କ ମଧ୍ୟରୁ କିଛି ଦ୍ଵାଦଶ ଶ୍ରେଣୀ ଯାଏଁ ପଢିଥିଲେ ଏବଂ ଆଉ କିଛି ବିଏସସି କରିଥିଲେ । କିଛି ଜଣ କମ୍ପାଉଣ୍ଡର ଏବଂ ଅପରେସନ ଥିଏଟର ଆସିଷ୍ଟାଣ୍ଟ ଭାବେ କାମ କରିସାରିଥିଲେ ।

ପଢନ୍ତୁ ଏହି ଖବର: ପଞ୍ଚମ ଫେଲ୍‌ର ବଡ଼ କାରନାମା; ପ୍ରିଣ୍ଟରରେ ଛାପୁଥିଲା ଲକ୍ଷ ଲକ୍ଷର ନକଲି ନୋଟ୍

କ୍ଲିନିକ୍‌କୁ ପଠାଯାଇଥିବା ଡମି ବା ନକଲି ରୋଗୀଙ୍କ ଜରିଆରେ ଚିକିତ୍ସା କିଏ କରୁଛି ଓ ସେମାନଙ୍କ ମେଡିକାଲ ଯୋଗ୍ୟତା ସମ୍ପର୍କରେ ଜଣାପଡ଼ିଥିଲା । ତଦନ୍ତ ବେଳେ ଅଭିଯୁକ୍ତକୁ ଧରାଯାଇଥିଲା । ଏହାପରେ ଏସଓଜି ଏବଂ ଜିଲ୍ଲା ସ୍ଵାସ୍ଥ୍ୟ ବିଭାଗ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା । ପାଣ୍ଡେସରା ଅଞ୍ଚଳରୁ ଏକାବେଳେ ୮ ଜଣ ନକଲି ଡାକ୍ତରଙ୍କୁ ଧରାଯାଇଛି । ଏମାନେ ବିନା ମେଡିକାଲ ଡିଗ୍ରୀରେ ଡାକ୍ତର ସାଜିଥିଲେ ।

• ୧୦ବର୍ଷ ପର୍ଯ୍ୟନ୍ତ ସାଜିଥିଲେ ନକଲି ଡାକ୍ତର

ପୋଲିସ ଯାଞ୍ଚ ପରେ କହିଛି ଯେ ଏହି ଅଭିଯୁକ୍ତମାନଙ୍କ ମଧ୍ଯରୁ କିଛି ଜଣ ଗତ ୨ ବର୍ଷରୁ ୧୦ ବର୍ଷ ପର୍ଯ୍ୟନ୍ତ ନକଲି ଡାକ୍ତର ସାଜିଥିଲେ । ବିନା ମେଡିକାଲ ଡିଗ୍ରୀରେ ରୋଗୀ ଚିକିତ୍ସା କରୁଥିଲେ । କ୍ଲିନିକ୍‌କୁ ରୋଗୀ ଆସୁଥିଲେ ଓ ସେଠାରେ ଚିକିତ୍ସିତ ହେଉଥିଲେ । ପୋଲିସ ଚଢାଉ କରିବା ପରେ କ୍ଲିନିକ୍‌ରୁ ଔଷଧ, ଇଞ୍ଜେକ୍ସନ, ସିରପ୍ ଓ ଅନ୍ୟ କିଛି ମେଡିକାଲ ସାମଗ୍ରୀକୁ ଜବତ କରାଯାଇଛି । ମୋଟ ୯୮,୮୨୫ ଟଙ୍କାର ସାମଗ୍ରୀ ଜବତ ହୋଇଥିବା ପୋଲିସ କହିଛି ।

ଏବେ ପୋଲିସ ଏହା ଯାଞ୍ଚ କରୁଛି ଯେ, ଏହି ନକଲି ଡାକ୍ତର ଦୀର୍ଘ ସମୟ ଧରି କିପରି କ୍ଲିନିକ୍ ଚଲାଉଥିଲେ ଓ ଏଠାକୁ କେତେ ଜଣ ରୋଗୀ ଚିକିତ୍ସା ପାଇଁ ଆସୁଥିଲେ । ପୋଲିସ ଏସବୁର ଖୋଳତାଡ଼ କରୁଛି । ଏବେ ପୋଲିସ ସମସ୍ତ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରି କାର୍ଯ୍ୟାନୁଷ୍ଠାନ ଆରମ୍ଭ କରିଛି ।