10K Salary Dispute / ଦରମା ବାବଦକୁ ବକେୟା ଥିଲା ୧୦ ହଜାର ଟଙ୍କା, ୨୪ କୋଟିର ବସ୍ତ୍ର ବଜାରରେ ଲଗାଇଦେଲା ନିଆଁ

ସୁରଟ: ଦିଆସିଲିର ଦୁଇଟି କାଠି ଆଉ ୧୫୦ ଟଙ୍କାର ପେଟ୍ରୋଲ୍ । ଏତିକିରେ ଜାଳିଦେଲା ପୂରା ବଜାର । ମାତ୍ର ୧୦ ହଜାର ଟଙ୍କାର ବକେୟା ଦରମା ପାଇଁ ଜଣେ ବ୍ୟକ୍ତି ୨୪ କୋଟିର ପ୍ରତିଶୋଧ ନେଇଛନ୍ତି । ଏଭଳି ଅକ ମାମଲା ଉପରୁ ପରଦା ଉଠାଇଛି ଗୁଜରାଟର ସୁରଟ ପୋଲିସ ।

ପୋଲିସ ଅନୁସାରେ, "ନିଆଁ ଲାଗି ସମଗ୍ର ବସ୍ତ୍ର ଜଳିଯିବା ଘଟଣାରେ ବଡ଼ ସଫଳତା ମିଳିଛି । ନିଆଁ ଲଗାଇଥିବା ମୁଖ୍ୟ ଅଭିଯୁକ୍ତ ବିନୋଦ ପଣ୍ଡିତ ସାଭଲେକୁ କ୍ରାଇମବ୍ରାଞ୍ଚ ଗିରଫ କରିଛି ।"

ବଜାରରେ ଲାଗିଥିବା ସିସିଟିଭି ଫୁଟେଜରେ ଦେଖା ଯାଇଥିଲା, ଜଣେ ବ୍ୟକ୍ତି ମୁହଁକୁ ଘୋଡ଼ାଇ ଦୋକାନ ବାହାରେ ଥିବା ପାର୍ସଲରେ ପେଟ୍ରୋଲ୍ ଢାଳି ନିଆଁ ଲଗାଉଛନ୍ତି । ସେପ୍ଟେମ୍ବର ୮-୯ ତାରିଖ ରାତିରେ ଶ୍ୟାମ ସଙ୍ଗିନୀ ଟେକ୍ସଟାଇଲ୍ ମାର୍କେଟରେ ଅଗ୍ନିକାଣ୍ଡ ହୋଇଥିଲା । ଯେଉଁଥିରେ ୧୪ଟି ଦୋକାନର ୨୪ କୋଟିର ପୋଷାକ ଜଳିପୋଡ଼ି ପାଉଁଶ ହୋଇ ଯାଇଥିଲା ।

ଏଥିସହ ପଢ଼ନ୍ତୁ: Jaguar, Audi ସହ ୫୦୦ ଗ୍ରାମ୍ ସୁନା… ସରକାରୀ ଡାକ୍ତରଙ୍କ ଘରେ ରେଡ୍‌ରୁ ୧୦୦ କୋଟିର ସମ୍ପତ୍ତିର ଖୁଲାସା 

ସୁରଟର ଏସିପି କରନରାଜ ବାଗହେଲା କହିଛନ୍ତି, "ବଜାରରେ ଥିବା ସପ୍ ନମ୍ବର ୬୩୯ରେ ବିନୋଦ କାମ କରୁଥିଲା । ୨୦୨୬ ଏପ୍ରିଲ୍‌ରୁ ୩ ମାସ କାମ କରିବା ପରେ ସେ ଜୁନ୍‌ରେ ଛାଡ଼ି ଦେଇଥିଲା । ଆକାଉଣ୍ଟ୍ସ ସମ୍ବନ୍ଧୀୟ କାମ ସମ୍ଭାଳି ନ ପାରିବାରୁ କାମ ଛାଡ଼ି ଦେଇଥିଲା ବିନୋଦ ।"

କିନ୍ତୁ, ଦୋକାନ ଛାଡ଼ିବା ପରେ ସେ ମାଲିକ ଠାରୁ ୧୦ ହଜାର ଟଙ୍କା ପାଇବ ବୋଲି ଦାବି କରିଥିଲା । କିନ୍ତୁ, ଦୋକାନୀ ନ ଦେବାରୁ ବୁଦ୍ଧ ଶିଖାଇବା ପାଇଁ ଯୋଜନା କରିଥିଲା ।

ପୋଲିସ ଅନୁସାରେ, ବିନୋଦ ପ୍ରାୟ ୧୫୦ ଟଙ୍କାର ପେଟ୍ରୋଲ ଏକ ବୋତଲରେ ନିକଟରେ ଥିବା ଗାଁର ପେଟ୍ରୋଲ୍ ପମ୍ରୁ ଆଣିଥିଲା । ସେପ୍ଟେମ୍ବର ୮ ତାରିଖ ରାତି ପ୍ରାୟ ୯ଟାରେ ମାର୍କେଟରେ ପ୍ରବେଶ କରି ପଞ୍ଚମ ମହଲାର ସିଡ଼ିରେ ଲୁଟି ରହିଥିଲା । ରାତି ସାଢ଼େ ୧୨ଟାରେ ବଜାର ଶୂନଶାନ ହେବା ପରେ ଉକ୍ତ ଦୋକାନକୁ ଟାର୍ଗେଟ୍ କରିଥିଲା ବିନୋଦ ।

କ୍ରାଇମବ୍ରାଞ୍ଚ ଜାରି କରିଥିବା ସିସିଟିଭି ଫୁଟେଜ୍ ଅନୁସାରେ, ବିନୋଦ ତାର ମୁହଁକୁ କପଡ଼ାରେ ବାନ୍ଧିବା ସହ କାନ୍ଧରେ ଏକ ବ୍ୟାଗ ପକାଇଥିଲେ । ଷଷ୍ଠ ମହଲାକୁ ଯାଇ ଚାରିଆଡ଼େ ନଜର ପକାଇଥିଲା । କେହି ନଥିବା ସୁନିଶ୍ଚିତ ହେବା ପରେ ଉକ୍ତ ଦୋକାନ ନିକଟକୁ ଯାଇ ବାହାରେ ରଖା ଯାଇଥିବା ପାର୍ସଲରେ ପେଟ୍ରୋଲ୍ ଢାଳି ଦିଆସିଲି ମାରିଥିଲା । ଆଉ ଦ୍ଵିତୀୟ ପ୍ରୟାସରେ ନିଆଁ ଲାଗି କପଡ଼ା ଥିବାରୁ ଗୋଟିଏ ପରେ ଗୋଟିଏ ଦୋକାନକୁ ବ୍ୟାପିଥିଲା ।

ଏଥିସହ ପଢ଼ନ୍ତୁ: ଆତ୍ମହତ୍ୟା ନୁହେଁ ହତ୍ୟା; କୀଟନାଶକ ପିଆଇ ଇଞ୍ଜିନିୟରିଂ ଛାତ୍ରୀଙ୍କୁ ମାରିଦେଲେ ଅଧ୍ୟାପକ 

ଏନେଇ ସାରୋଲି ପୋଲିସ ଏକ ମାମଲା ଅଜ୍ଞାତ ବ୍ୟକ୍ତିଙ୍କ ବିରୋଧରେ ରୁଜୁ କରିଥିଲା । ପରେ ସୁରଟ ପୋଲିସ ସହରରେ ଲାଗିଥିବା ସିସିଟିଭି ଚେକ୍ କରି ଅଭିଯୁକ୍ତକୁ ଟ୍ରାକ୍ କରିଥିଲା । ଜଣାପଡ଼ିଥିଲା ଅଭିଯୁକ୍ତ ଜଣଙ୍କ ଦିନ୍ଦୋଲିର ବିଲିପାତ୍ର ରେସିଡେନ୍ସର ବିନୋଦ ସାଭଲେ ।

ପୋଲିସ ଅନୁସାରେ, ଅଗ୍ନିକାଣ୍ଡ ଘଟଣା ସୋସିଆଲ୍ ମିଡିଆରେ ଭାଇରାଲ୍ ହେବା ପରେ ଏତଲା ନେଇ ଜାଣିପାରିଥିଲା ବିନୋଦ । ତା ପରେ ମୋବାଇଲ୍ ସ୍ଵିଚ୍ ଅଫ୍ କରି ପତ୍ନୀ ଓ ଛୁଆଙ୍କୁ ନେଇ ବିନୋଦ ରାଜସ୍ଥାନର ଖଟୁ ଶ୍ୟାମ ମନ୍ଦିର ସହ ଅଯୋଧ୍ୟା ପଳାଇଥିଲା । ବିନୋଦ ସୁରଟ ଫେରିବା ପରେ ପୋଲିସ ତାକୁ ଗିରଫ କରିଛି ।