ପଶ୍ଚିମବଙ୍ଗର ବରିଷ୍ଠ ବିଜେପି ନେତା ଶୁଭେନ୍ଦୁ ଅଧିକାରୀଙ୍କ ପିଏଙ୍କୁ ବୁଧବାର ବିଳମ୍ଵିତ ରାତିରେ ଗୁଳି କରି ହତ୍ୟା କରାଯାଇଥିବା ଘଟଣା । ଘଟଣାସ୍ଥଳରେ ଉପସ୍ଥିତ ଥିବା ଜଣେ ପ୍ରତ୍ୟକ୍ଷଦର୍ଶୀ ବଖାଣିଛନ୍ତି ସେହି ଭୟଙ୍କର ରାତିର ଲୋମଟାଙ୍କୁରା ଦୃଶ୍ୟ । ଏହା ଏକ ଅତ୍ୟନ୍ତ ସୁଚିନ୍ତିତ ଏବଂ ପେସାଦାର ଢଙ୍ଗରେ କରାଯାଇଥିବା ହତ୍ୟାକାଣ୍ଡ ବୋଲି ସେ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି ।

• ଭୟଙ୍କର ରାତିର ଲୋମଟାଙ୍କୁରା ଦୃଶ୍ୟ

ପ୍ରତ୍ୟକ୍ଷଦର୍ଶୀ ଜଣକ କହିଛନ୍ତି, "ଚନ୍ଦ୍ରନାଥଙ୍କ ଗାଡ଼ି ଯାଉଥିବା ସମୟରେ ହଠାତ୍ ମଝି ରାସ୍ତାରେ ଅଟକି ଯାଇଥିଲା । ସେହି ସମୟରେ ଜଣେ ମୋଟରସାଇକେଲ ଆରୋହୀ ଆସି ଗାଡ଼ିର ବାମ ପାର୍ଶ୍ୱରୁ ଅତର୍କିତ ଗୁଳି ଚାଳନା କରିଥିଲେ । ଆକ୍ରମଣକାରୀ 'ଏକ୍ସପର୍ଟ' ଭଳି ମନେ ହେଉଥିଲେ । ପଏଣ୍ଟ ବ୍ଳାଙ୍କରୁ ଗୁଳି ଚଳାଇବା ପରେ ତୁରନ୍ତ ସେଠାରୁ ଫେରାର ହୋଇଯାଇଥିଲେ । ରାତି ପ୍ରାୟ ୧୦:୩୦ଟାରୁ ୧୧ଟା ମଧ୍ୟରେ ଏହି ଘଟଣା ଘଟିଥିଲା । ହସ୍ପିଟାଲଠାରୁ ମାତ୍ର ୨୦୦ରୁ ୩୦୦ ମିଟର ଦୂରରେ ଏହି ରକ୍ତାକ୍ତ କାଣ୍ଡ ଘଟିଥିଲା ।" ଗୁଳିକାଣ୍ଡରେ କେବଳ ଚନ୍ଦ୍ରନାଥ ନୁହେଁ, ବରଂ ଗାଡ଼ିର ଡ୍ରାଇଭର ମଧ୍ୟ ଗୁଳିମାଡ଼ର ଶିକାର ହୋଇଥିବା ପ୍ରତ୍ୟକ୍ଷଦର୍ଶୀ ପ୍ରକାଶ କରିଛନ୍ତି । ଉପସ୍ଥିତ ଲୋକମାନେ ତୁରନ୍ତ ତାଙ୍କୁ ଉଦ୍ଧାର କରି ହସ୍ପିଟାଲକୁ ନେଇଥିଲେ ।

• ମୁଣ୍ଡରେ ବାଜିଛି ୩ଟି ଗୁଳି

ଶୁଭେନ୍ଦୁଙ୍କ ପିଏ ଚନ୍ଦ୍ରନାଥଙ୍କ ମୁଣ୍ଡରେ ତିନିଟି ଗୁଳି ବାଜିଛି । ବୁଧବାର ବିଳମ୍ବିତ ରାତିରେ ମଧ୍ୟମଗ୍ରାମରେ ଏହି ଘଟଣା ଘଟିଛି । ଗାଡ଼ିରେ ବସିଥିବା ବେଳେ ମୋଟରସାଇକେଲରେ ଆସିଥିବା ଦୁର୍ବୃତ୍ତମାନେ ମୋଟ ୧୦ ରାଉଣ୍ଡ ଗୁଳି ଚାଳନା କରାଯାଇଥିବା ବେଳେ ସେଥିମଧ୍ୟରୁ ୩ଟି ଗୁଳି ଚନ୍ଦ୍ରନାଥଙ୍କ ମୁଣ୍ଡରେ ବାଜିଥିଲା । ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା । ଆକ୍ରମଣକାରୀମାନେ ଅତି ନିକଟରୁ ଗୁଳି ମାରି ଫେରାର ହୋଇଯାଇଥିଲେ । ଚନ୍ଦ୍ରନାଥ ଶୁଭେନ୍ଦୁ ଅଧିକାରୀଙ୍କ ଖୁବ୍ ଘନିଷ୍ଠ ମଧ୍ୟ ଥିଲେ । ସେ ପ୍ରାୟ ପାଞ୍ଚ ବର୍ଷ ଧରି ତାଙ୍କ ସହ ରହିଥିଲେ । ଚନ୍ଦ୍ରନାଥ ରଥ ମଧ୍ୟମଗ୍ରାମରେ କିଛି ଲୋକଙ୍କ ସହିତ ଏକ ସାର୍ବଜନୀନ ସ୍ଥାନରେ ଥିବା ସମୟରେ ତାଙ୍କୁ ଟାର୍ଗେଟ କରାଯାଇଛି ।

ପଢନ୍ତୁ ଏହି ଖବର: ସରକାର ଗଠନ ପୂର୍ବରୁ ଶୁଭେନ୍ଦୁ ଅଧିକାରୀ PA କୁ ଗୁଳି ମାରି ହତ୍ୟା

• ଚନ୍ଦ୍ରନାଥଙ୍କ ଗାଡ଼ିକୁ କରିଥିଲେ ପିଛା

ଶୁଭେନ୍ଦୁ ଅଧିକାରୀଙ୍କ ବ୍ୟକ୍ତିଗତ ସହାୟକ ଚନ୍ଦ୍ରନାଥ ଦତ୍ତଙ୍କ ଗାଡ଼ିକୁ ହତ୍ୟାକାରୀମାନେ ପିଛା କରିଥିଲେ । ଯେତେବେଳେ ଦତ୍ତଙ୍କ ଗାଡ଼ି ଧିର ହୋଇଯାଇଥିଲା, ସେତେବେଳେ ଆକ୍ରମଣକାରୀ ତାଙ୍କ ଉପରକୁ ଗୁଳି ଚଳାଇଥିଲେ । କେବଳ ଚନ୍ଦ୍ରନାଥ ଦତ୍ତ ନୁହଁନ୍ତି ତାଙ୍କ ଗାଡ଼ି ଚଳାଉଥିବା ଡ୍ରାଇଭରଙ୍କୁ ଗୁଳି ବାଜିଥିବାବେଳେ ସେ ଚିକିତ୍ସାଧୀନ ଅବସ୍ଥାରେ ଅଛନ୍ତି । ଗୁଳିମାଡ଼ ଘଟଣା ପରେ ହସ୍ପିଟାଲ ବାହାରେ ସୁରକ୍ଷା ବ୍ୟବସ୍ଥାକୁ ବଢାଇ ଦିଆଯାଇଛି ।