ଟ୍ୱିଶା ଶର୍ମା ମୃତ୍ୟୁ ମାମଲାରେ ଦ୍ୱିତୀୟ ଥର ଶବ ବ୍ୟବଚ୍ଛେଦ କରିବା ପାଇଁ ଆଜି ଭୋପାଳରେ ପହଞ୍ଚିଛି ଏମ୍ସ ଦିଲ୍ଲୀ ଟିମ୍ । ମଧ୍ୟ ପ୍ରଦେଶ ହାଇକୋର୍ଟଙ୍କ ପୂର୍ବ ନିର୍ଦ୍ଦେଶ କ୍ରମେ ଆଜି ଟ୍ୱିଶା ଶର୍ମାଙ୍କର ଦ୍ୱିତୀୟ ପୋଷ୍ଟମର୍ଟମ କରିବା ପାଇଁ AIIMS ଦିଲ୍ଲୀର ୪ ଜଣ ବରିଷ୍ଠ ଡାକ୍ତରଙ୍କୁ ନେଇ ଗଠିତ ଏକ ମେଡିକାଲ୍ ଟିମ୍ ଭୋପାଳରେ ପହଞ୍ଚିଛନ୍ତି ।
ମଧ୍ୟପ୍ରଦେଶ ହାଇକୋର୍ଟ ଏମ୍ସର ଡାକ୍ତରୀ ଦଳ ଦ୍ୱାରା ଏକ ନୂତନ ଶବ ବ୍ୟବଚ୍ଛେଦ କରିବାକୁ ନିର୍ଦ୍ଦେଶ ଦେବା ପରେ, ଏହି ଦଳ ଆଜି ସକାଳେ ଅତ୍ୟାଧୁନିକ ଚିକିତ୍ସା ଉପକରଣ ସହ ପ୍ରକ୍ରିୟା ସମ୍ପାଦନ ପାଇଁ ଭୋପାଳରେ ପହଞ୍ଚିଛନ୍ତି ।

ଏହାରି ଭିତରେ ଶନିବାର ସୁପ୍ରିମକୋର୍ଟ ଟ୍ୱିଶା ଶର୍ମା ମୃତ୍ୟୁ ମାମଲାରେ ସ୍ୱତଃ ପ୍ରବୃତ୍ତ ଭାବେ ଗ୍ରହଣ କରିଛନ୍ତି । ପ୍ରଧାନ ବିଚାରପତି ସୂର୍ଯ୍ୟକାନ୍ତଙ୍କ ନେତୃତ୍ୱରେ ଗଠିତ ଏକ ବେଞ୍ଚ ସୋମବାର ଏହି ମାମଲାର ବିଚାର କରିବାର ସମ୍ଭାବନା ରହିଛି । ସୁପ୍ରିମକୋର୍ଟ ଏହି ମାମଲାକୁ ଶାଶୁଘରେ ଜଣେ ଯୁବତୀଙ୍କ ଅସ୍ୱାଭାବିକ ମୃତ୍ୟୁରେ କଥିତ ଆନୁଷ୍ଠାନିକ ପକ୍ଷପାତିତା ଏବଂ ପ୍ରକ୍ରିୟାଗତ ଅନିୟମିତତା ମାମଲା ଭାବରେ ପଞ୍ଜୀକୃତ କରିଛନ୍ତି ।

ଅଧିକ ପଢ଼ନ୍ତୁ: ତ୍ୱିଶାଙ୍କ ଶେଷ ଭିଡିଓକୁ ନେଇ ଉଠିଲା ବଡ଼ ପ୍ରଶ୍ନ: ହସୁଥିଲେ ତ୍ୱିଶା ହଠାତ୍ କେମିତି ହେଲା ମୃତ୍ୟୁ ?

ସେପଟେ ଭୋପାଳର ଏକ ସ୍ଥାନୀୟ ଅଦାଲତ ଟ୍ୱିଶାଙ୍କ ସ୍ୱାମୀ ତଥା ମୁଖ୍ୟ ଅଭିଯୁକ୍ତ ସମର୍ଥ ସିଂହଙ୍କୁ ସାତ ଦିନ ପାଇଁ ପୋଲିସ ହେପାଜତକୁ ପଠାଇଛନ୍ତି । ମଧ୍ୟପ୍ରଦେଶ ସରକାର ଏହି ମାମଲାର ତଦନ୍ତ ପାଇଁ ସିବିଆଇକୁ ସୁପାରିଶ କରିସାରିଛନ୍ତି । ନୋଏଡା ବାସିନ୍ଦା ଟ୍ୱିଶା ଶର୍ମା ଡିସେମ୍ବର ୨୦୨୫ରେ ଭୋପାଳ ବାସିନ୍ଦା ସମର୍ଥ ସିଂହଙ୍କୁ ବିବାହ କରିଥିଲେ । ତେବେ ଗତ ମେ' ୧୨ରେ ତାଙ୍କର ମୃତ୍ୟୁ ହୋଇଥିଲା । ଏହାପରେ ସ୍ୱାମୀ ଏବଂ ପରିବାର ସଦସ୍ୟ ତାଙ୍କୁ ମାନସିକ ନିର୍ଯାତନା ଏବଂ ଯୌତୁକ ନିର୍ଯାତନା ଦିଆଯାଉଥିବା ନେଇ ତାଙ୍କ ପରିବାର ଲୋକ ଅଭିଯୋଗ କରିଥିଲେ ।