Argus News - ସ୍ତ୍ରୀ ପାଇଁ... ବାପାମାଆଙ୍କୁ ହତ୍ୟା ପରେ ଖଣ୍ଡ ଖଣ୍ଡ କରି କାଟିଲା, ପୁଣି ନଦୀରେ ଫିଙ୍ଗିଦେଲା

ଲକ୍ଷ୍ନୌ: ବାପାମାଆ ନିଖୋଜ, ବନ୍ଧାହେଲା ଇଞ୍ଜିନିୟର ପୁଅ । ୬୨ ବର୍ଷର ଶ୍ୟାମ ବାହାଦୂର ଓ ୬୦ ବର୍ଷୀୟ ବବିତାଙ୍କୁ ହତ୍ୟା ଅଭିଯୋଗରେ ପୋଲିସ ଇଞ୍ଜିନିୟର ପୁଅ ଆମ୍ବେଶଙ୍କୁ ଗିରଫ କରିଛି । ଆମ୍ବେଶ ନିଜ ହାତରେ ବାପାମାଆକୁ ଶିଳପୁଆରେ ପ୍ରଥମେ ଛେଚି ହତ୍ୟା କରିଛି । ହତ୍ୟା ପରେ ପୁଣି ପ୍ରମାଣ ନଷ୍ଟ କରିବାକୁ କରତରେ କାଟି ବାପାମାଆଙ୍କୁ ଖଣ୍ଡ ଖଣ୍ଡ କରି ନଦୀରେ ଫିଙ୍ଗି ଦେଇଛି ।

ନିଖୋଜରୁ ଡବଲ୍ ମର୍ଡର ମାମଲା ପୋଲିସକୁ ସ୍ତବ୍ଧ କରି ଦେଇଛି । ଏଭଳି ଘଟିଛି ଉତ୍ତରପ୍ରଦେଶର ଜାଉପୁର ଜଫରାବାଦ ଥାନା ଅଞ୍ଚଳରେ । ଯେଉଁଠି ବାପାର ଜିଦ୍ ଆଉ ପୁଅର କ୍ରୋଧ ପାଇଁ ୨ ଜଣଙ୍କୁ ଜୀବନ ହରାଇବାକୁ ପଡ଼ିଛି । ଜନ୍ମଦାତା, ଦାତ୍ରୀଙ୍କ ଜୀବନ ନେଇ ଯାଇଛି ପୁଅ । ତାହା ବି ଅତି ବୀଭତ୍ସ ଭାବେ ।

ଏଥିସହ ପଢ଼ନ୍ତୁ: ହିନ୍ଦୁ ଝିଅଙ୍କୁ ଫସାଇ ବଳପୂର୍ବକ ବାହା ହେଲେ ସ୍ଵାମୀଙ୍କୁ ମିଳୁଛି ୧୦ ଲକ୍ଷ; ସ୍ତ୍ରୀ ଆଣିଲେ ସଙ୍ଗୀନ ଅଭିଯୋଗ

ଦୀର୍ଘ ୬ ଦିନ ଧରି ନିଖୋଜ ଥିଲେ ବାପା ମାଆ ପୁଅ । ଆଉ ପୋଲିସର ତଦନ୍ତ ପରେ ସବୁ ସତ ସାମ୍ନାକୁ ଆସିଲା । ମୃତ ବ୍ୟକ୍ତି ଜଣକ ୬୨ ବର୍ଷୀୟ ଶ୍ୟାମ ବାହାଦୂର ଏବଂ ପତ୍ନୀ ୬୦ ବର୍ଷୀୟ ବବିତା । ତାଙ୍କ ପୁଅ ଆମ୍ବେଶ ୫ ବର୍ଷ ତଳେ ଜଣେ ମୁସଲିମ ମହିଳାଙ୍କୁ ବିବାହ କରିଥିଲେ । ଏବଂ ତାଙ୍କର ୨ ଜଣ ଛୁଆ ମଧ୍ୟ ଅଛନ୍ତି ।

କିନ୍ତୁ ବାପା ଶ୍ୟାମ ବାହାଦୂର ଆମ୍ବେଶଙ୍କୁ ଘରକୁ ଆସିବାକୁ ଦେଉନଥିଲେ କି ବୋହୂଙ୍କୁ ଗ୍ରହଣ କରିବାକୁ ପ୍ରସ୍ତୁତ ନଥିଲେ । ଆଉ ବାରମ୍ବାର ଛାଡ଼ପତ୍ର ଦେବା ପାଇଁ ପୁଅକୁ ବାଧ୍ୟ କରି ଆସୁଥିଲେ । ଆଉ ଶେଷରେ ଛାଡ଼ପତ୍ର ଦେଇଥିଲେ । ଛାଡ଼ପତ୍ର ପରେ ଭରଣପୋଷଣ ପାଇଁ ପତ୍ନୀ ମାଗିଥିଲେ ୫ ଲକ୍ଷ ଟଙ୍କା ।

ଆଉ ଏତେ ଟଙ୍କା ଆମ୍ବେଶଙ୍କ ପାଖରେ ନଥିବାରୁ ସେ ନିଜ ବାପାଙ୍କୁ ମାଗିଥିଲେ । ହେଲେ ବାପା ଟଙ୍କା ଦେବାକୁ ମନା କରି ଦେଇଥିଲେ । ଡିସେମ୍ବର ୮ରେ ଏହି ଟଙ୍କାକୁ ନେଇ ଉଭୟ ବାପପୁଅ ମଧ୍ୟରେ ଅନେକ ସମୟ ଧରି ଯୁକ୍ତିତର୍କ ହୋଇଥିଲା । ମାଆ ଅଟକାଇବାକୁ ଚେଷ୍ଟା କରିବାରୁ ମାଆକୁ ଶିଳପୁଆରେ ଛେଚି ଥିଲା ପୁଅ ।

ଏଥିସହ ପଢ଼ନ୍ତୁ: ତୁଟାଇବାକୁ ଯାଇଥିଲେ ଶାଶୁବୋହୂ କଳି; ମାଡ଼ ଖାଇ ଚେତା ହରାଇଲେ ପିଉସୀ, ଚାଲିଗଲା ଜୀବନ

ବାପାଙ୍କୁ ମଧ୍ୟ ପୁଅ ଶିଳପୁଆରେ ଛେଚି ଦେଇଥିଲା । ଉଭୟ ବାପା ମାଆଙ୍କୁ ଛେଚି ହତ୍ୟା କରିବା ପରେ ପ୍ରମାଣ ନଷ୍ଟ କରିବାକୁ କରତରେ କାଟି ଖଣ୍ଡ ଖଣ୍ଡ କରି ଦେଇଥିଲା । ଏତିକିରେ ଆମ୍ବେଶର ମନ ଭରି ନଥିଲା । ମୃତଦେହକୁ ନେଇ ନଦୀରେ ଫିଙ୍ଗି ଦେଇଥିଲା ।

ନିଜ ଭଉଣୀକୁ ଡାକି ବାପାମାଆ ରାଗରେ କେଉଁଆଡେ ଚାଲି ଯାଇଥିବା କହିଥିଲା । ଆଉ ନିଜେ ଖୋଜିବାକୁ ଚାଲି ଯାଇଥିଲା ବାପାମାଆକୁ । ହେଲେ ଘଟଣାର ୬ ଦିନ ପରେ ସେ ଯେତେବେଳେ ଫେରିଥିଲା, ସେତେବେଳେ ପରିବାର ଲୋକେ ପୋଲିସ ଡକାଇଥିଲେ । ଆଉ ପୋଲିସ ଆଗରେ ସବୁ ସତ ମାନିଥିଲା ଅଭିଯୁକ୍ତ ଆମ୍ବେଶ । ପରେ ପୋଲିସ ଖଣ୍ଡ ଖଣ୍ଡ ମୃତଦେହକୁ ଉଦ୍ଧାର କରିଛି ।