ବାପା ସାଜିଲା ରାକ୍ଷସ । କୁହାଯାଏ ବାପା ହେଉଛି ଛୁଆଙ୍କର ରକ୍ଷାକର୍ତ୍ତା । ବାପା ଥିଲେ ଛୁଆର ସାହସ ଥାଏ । ହେଲେ ଏଠି ନିଜେ ବାପା ହିଁ ନିଜ ଛୁଆର ହତ୍ୟାକାରୀ ସାଜିଛି । ଗଣି ଗଣି ଯେପରି ନିଜ ଛୁଆଙ୍କୁ ହତ୍ୟା କରିଛି । ଆଉ ଏହି ସମସ୍ତ ମତ ପିଲାଙ୍କ ବୟସ ୧ରୁ ୧୪ ବର୍ଷ ମଧ୍ୟରେ ଥିଲା । ଘଟଣାରେ ମୋଟ ୮ ଜଣ ଶିଶୁଙ୍କୁ ହତ୍ୟା କରାଯାଇଛି । ମୃତ ପିଲାଙ୍କ ମଧ୍ୟରୁ ୭ ଜଣ ତାର ନିଜ ପିଲା ଥିଲେ ଏବଂ ୮ ନମ୍ବର ଛୁଆର ସେ କାକା ଥିଲା । ତେବେ ଅଭିଯୁକ୍ତ ଗୁଳି କରି ଏମାନଙ୍କୁ ହତ୍ୟା କରିଥିବା ଜଣାପଡ଼ିଛି ।

• ଅଭିଯୁକ୍ତ ଗୁଳିରେ ୮ ପିଲା ମୃତ

ଏହି ଘଟଣାଟି ଏବେ ସବୁଠାରୁ ଗମ୍ଭୀର ଏବଂ ବିପଜ୍ଜନକ ଗୁଳିକାଣ୍ଡ ମଧ୍ୟରୁ ଗୋଟିଏ । ୮ ଜଣ ପିଲାଙ୍କ ମଧ୍ୟରୁ ୫ ଜଣ ଝିଅ ଏବଂ ୩ ଜଣ ପୁଅ ଥିଲେ । ସେ ଗୁଳି ଚଳାଇବା ସମୟରେ ସେମାନେ ଶୋଇଥିଲେ । ପୋଲିସର କହିବା ଅନୁଯାୟୀ, ରବିବାର ସକାଳ ପ୍ରାୟ ୬ଟା ସମୟରେ ଏହି ଆକ୍ରମଣ ଘଟିଥିଲା । ଅଭିଯୁକ୍ତ ତାର ସ୍ତ୍ରୀ ସହିତ ଝଗଡ଼ା ହୋଇଥିଲା, ଯାହା ପରେ ସେ କ୍ରୋଧିତ ହୋଇ ଗୁଳି ଚଳାଇବା ଆରମ୍ଭ କରିଦେଇଥିଲା ।

ସେ ପ୍ରଥମେ ଗୋଟିଏ ଘରେ ଗୁଳି ଚଳାଇଥିଲା ଏବଂ ପରେ ଅନ୍ୟ ଏକ ଘରକୁ ଯାଇ ପିଲାମାନଙ୍କୁ ଆକ୍ରମଣ କରିଥିଲା । ଦ୍ୱିତୀୟ ଘରେ ୭ ଜଣ ପିଲାଙ୍କ ମୃତ୍ୟୁ ହୋଇଥିଲା । ଜୀବନ ବଞ୍ଚାଇବାକୁ ଦୌଡ଼ି ପଳାଉଥିବା ସମୟରେ ଘରର ଛାତ ଉପରେ ଜଣେ ପିଲା ମୃତ ଅବସ୍ଥାରେ ପଡ଼ିଥିଲା । ଆଉ ଜଣେ ପିଲା ଜୀବନ ବଞ୍ଚାଇବା ପାଇଁ ଛାତରୁ ଡେଇଁ ପଡ଼ି ହସ୍ପିଟାଲରେ ଭର୍ତ୍ତି ହୋଇଛି ।

• କିଏ ସେ ରାକ୍ଷସ ପିତା ?

ସନ୍ଦିଗ୍ଧ ବ୍ୟକ୍ତିଙ୍କୁ ୩୧ ବର୍ଷୀୟ ଶାମାର ଏଲକିନ୍ସ ଭାବରେ ଚିହ୍ନଟ କରାଯାଇଛି, ସେ ଜଣେ ଅବସରପ୍ରାପ୍ତ ସୈନିକ । ଘଟଣା ପରେ ସେ ଏକ କାର ଚୋରି କରି ପଳାଇବାକୁ ଚେଷ୍ଟା କରିଥିଲା । ପୋଲିସ ତାକୁ ବୋଜିଅର ପାରିସ ପର୍ଯ୍ୟନ୍ତ ପିଛା କରିଥିଲା, ଯେଉଁଠାରେ ପୋଲିସ ଗୁଳି ଚଳାଇ ତାକୁ ହତ୍ୟା କରିଛି । ପ୍ରାରମ୍ଭିକ ତଦନ୍ତକୁ ଘରୋଇ ହିଂସା ମାମଲା ବୋଲି ବିବେଚନା କରାଯାଉଛି ।

ପଢନ୍ତୁ ଏହି ଖବର: ବୃଦ୍ଧଙ୍କ ରୋମାନ୍ସରେ ଆସିଲା ଟ୍ଵିଷ୍ଟ; ଯବାନ ଗର୍ଲଫ୍ରେଣ୍ଡ ତ ମିଳିଲା କିନ୍ତୁ…

ପୋଲିସର କହିବା ଅନୁଯାୟୀ, ଏଲକିନ୍ସ ପ୍ରଥମେ ଗୋଟିଏ ଘରେ ଗୁଳି କରି ତା'ପରେ ଅନ୍ୟ ଏକ ସ୍ଥାନକୁ ଯାଇ ପିଲାମାନଙ୍କ ଉପରେ ଆକ୍ରମଣ କରିଥିଲା । ଏଲକିନ୍ସକୁ ପତ୍ନୀଠାରୁ ୪ଟି ପିଲା ଥିଲେ ଏବଂ ଘର ପାଖରେ ସେ ଅନ୍ୟ ଜଣେ ମହିଳାଙ୍କ ସହିତ ସମ୍ପର୍କ ରଖିଥିଲା ଓ ସେହି ମହିଳାଙ୍କଠାରୁ ତାର ୩ଟି ପିଲା ଥିଲେ । ଘଟଣା ସମୟରେ ସମସ୍ତ ପିଲା ଗୋଟିଏ ଘରେ ଥିଲେ । ଆକ୍ରମଣରେ ତାର ସ୍ତ୍ରୀ ଏବଂ ଅନ୍ୟ ମହିଳା ମଧ୍ୟ ଗୁରୁତର ଆହତ ହୋଇଛନ୍ତି ।

• ଏଲକିନ୍ସ ତାର ସ୍ତ୍ରୀକୁ ଦେଇଥାନ୍ତା ଛାଡ଼ପତ୍ର

ପରିବାରର ଜଣେ ସଦସ୍ୟ କହିଛନ୍ତି ଯେ ଏଲକିନ୍ସ ଏବଂ ତାଙ୍କ ସ୍ତ୍ରୀ ଅଲଗା ହେବାକୁ ଯାଉଥିଲେ ଏବଂ ଏ ବିଷୟରେ ଯୁକ୍ତିତର୍କ କରୁଥିଲେ । ସେମାନଙ୍କର କୋର୍ଟ ଶୁଣାଣି ମଧ୍ୟ ସ୍ଥିର ହୋଇଥିଲା । ଜଣେ ପଡ଼ୋଶୀ କହିଛନ୍ତି ଯେ ସେହି ବ୍ୟକ୍ତିଙ୍କୁ ପ୍ରାୟତଃ ପିଲାମାନଙ୍କ ସହିତ ଦେଖାଯାଉଥିଲା ଏବଂ କିଛି ଦିନ ପୂର୍ବରୁ ସେମାନଙ୍କ ସହିତ ଥିଲା । ପୋଲିସ କହିଛି ଯେ ଏଲକିନ୍ସଙ୍କୁ ପୂର୍ବରୁ ୨୦୧୯ରେ ଅସ୍ତ୍ରଶସ୍ତ୍ର ସମ୍ବନ୍ଧୀୟ ଅପରାଧ ପାଇଁ ଗିରଫ କରାଯାଇଥିଲା, କିନ୍ତୁ ଘରୋଇ ହିଂସାର କୌଣସି ପୂର୍ବ ରେକର୍ଡ ମିଳିନଥିଲା ।