ଗୁଜରାଟର ଭଦୋଦରାରେ ଏମିତି ଏକ ଚୋରୀ ମାମଲା ସାମ୍ନାକୁ ଆସିଛି, ଯାହା ପୋଲିସର ସୁରକ୍ଷା ବ୍ୟବସ୍ଥାକୁ ସିଧାସଳଖ ଚ୍ୟାଲେଞ୍ଜ କରିଛି । ମାତ୍ର ୧୦ରୁ ୧୫ ମିନିଟ୍‌ ମଧ୍ୟରେ ଏକ ବଡ଼ ମୋବାଇଲ୍ ଶୋ' ରୁମ୍‌ରୁ ୫୦ ଲକ୍ଷ ଟଙ୍କାରୁ ଅଧିକ ମୂଲ୍ୟର ୭୭ଟି ଦାମୀ ସ୍ମାର୍ଟଫୋନ୍ ଲୁଟି ଫେରାର ହୋଇଯାଇଛନ୍ତି ଦୁଇ ମୁଖାପିନ୍ଧା ଚୋର । ସବୁଠାରୁ ବଡ଼ କଥା ହେଉଛି, ସମ୍ପୂର୍ଣ୍ଣ ଚୋରିର ଦୃଶ୍ୟ ସିସିଟିଭି କ୍ୟାମେରାରେ କଏଦ ହୋଇଛି । ଏବେ ପ୍ରଶ୍ନ ଉଠୁଛି—ଏତେ କଡ଼ା ସୁରକ୍ଷା ସତ୍ତ୍ୱେ ଚୋରମାନେ କିପରି
ଏତେ ବଡ଼ ଲୁଟ୍‌କୁ ଏତେ କମ୍ ସମୟରେ ସଫଳ କରିପାରିଲେ ?

ଗୁଜରାଟର ଭଦୋଦରା ସହରରେ ଚୋରମାନେ ପୋଲିସ ପାଟ୍ରୋଲିଂ ଓ ସୁରକ୍ଷା ବ୍ୟବସ୍ଥାକୁ ଖୋଲା ଚ୍ୟାଲେଞ୍ଜ ଦେଇ ଏକ ବଡ଼ ଲୁଟ୍‌ କରିଛନ୍ତି । ଆଜୱା ରୋଡ୍‌ରେ ଥିବା ଏକ ନାମୀ ମୋବାଇଲ୍ ଶୋ ରୁମ୍‌କୁ ଟାର୍ଗେଟ୍ କରି ଦୁଇ ଜଣ ଦୁର୍ବୃତ୍ତ ମାତ୍ର ୧୦ରୁ ୧୫ ମିନିଟ୍‌ ମଧ୍ୟରେ ୫୦ ଲକ୍ଷ ଟଙ୍କାରୁ ଅଧିକ ମୂଲ୍ୟର ଦାମୀ ସ୍ମାର୍ଟଫୋନ୍ ଚୋରି କରି ଫେରାର ହୋଇଯାଇଛନ୍ତି । ସମ୍ପୂର୍ଣ୍ଣ ଘଟଣା ସେଠାରେ ଲାଗିଥିବା ସିସିଟିଭି କ୍ୟାମେରାରେ କଏଦ ହୋଇଥିବାବେଳେ, ପୋଲିସ ଏହାକୁ ଆଧାର କରି ତଦନ୍ତ ଜୋରଦାର କରିଛି ।

ଏହି ଚୋରି ଘଟଣା ଆଜୱା ରୋଡ୍‌ସ୍ଥିତ ଶ୍ରୀ ହରି ଟାଉନସିପ୍‌ର ‘ଫୋନ୍ ବୁକ୍’ ମୋବାଇଲ୍ ଶୋରୁମ୍‌ରେ ଘଟିଛି । ବିଳମ୍ବିତ ରାତିରେ ଦୁଇ ଜଣ ମୁଖାପିନ୍ଧା ଚୋର ଏକ ବାଇକ୍‌ରେ ଆସିଥିଲେ । ପରିଚୟ ଲୁଚାଇବା ପାଇଁ ସେମାନେ କଳା ପୋଷାକ ଓ ମାସ୍କ ପିନ୍ଧିଥିଲେ । ଚତୁରତାର ସହ ସେମାନେ ଶୋରୁମ୍‌ର ସଟରକୁ ଅଧା ଉଠାଇ ଭିତରକୁ ପ୍ରବେଶ କରିଥିଲେ ।

ଭିତରକୁ ପଶିବା ପରେ ମାତ୍ର ୧୦ରୁ ୧୫ ମିନିଟ୍‌ ମଧ୍ୟରେ ସେମାନେ ସମ୍ପୂର୍ଣ୍ଣ ଶୋରୁମ୍‌କୁ ଛାନ୍‌ଭିନ୍ କରିଥିଲେ। ଡିସପ୍ଲେ ଓ ଷ୍ଟକ୍ ରୁମ୍‌ରୁ ଆଇଫୋନ୍, ସାମସଙ୍ଗ ଓ ଭିଭୋ ଭଳି ନାମୀ କମ୍ପାନିର ପ୍ରାୟ ୭୭ଟି ଦାମୀ ମୋବାଇଲ୍ ଫୋନ୍ ନେଇ ଚମ୍ପଟ ମାରିଥିଲେ । ଏଥିସହ କାଉଣ୍ଟରରେ ଥିବା ୧୫ ହଜାର ଟଙ୍କା ନଗଦ ମଧ୍ୟ ନେଇଯାଇଥିଲେ । ଚୋରି ହୋଇଥିବା ମୋବାଇଲ୍‌ଗୁଡ଼ିକର ମୋଟ ମୂଲ୍ୟ ୫୦ ଲକ୍ଷ ଟଙ୍କାରୁ ଅଧିକ ବୋଲି ଆକଳନ କରାଯାଇଛି ।

ଶନିବାର ସକାଳେ ଶୋରୁମ୍ ମାଲିକ ଧର୍ମେନ୍ଦ୍ର ତ୍ରିଲୋକାଣୀ ପ୍ରତିଦିନ ପରି ଦୋକାନ ଖୋଲିବାକୁ ଆସିଥିଲେ । ସଟର ଉଠାଇବା ପରେ ଭିତରର ଦୃଶ୍ୟ ଦେଖି ସେ ଆଶ୍ଚର୍ଯ୍ୟଚକିତ ହୋଇଯାଇଥିଲେ । ଦୋକାନ ଭିତରେ ସାମଗ୍ରୀ ଏଣେତେଣେ ପଡ଼ିଥିବା ବେଳେ ସମସ୍ତ ଦାମୀ ମୋବାଇଲ୍ ଗାଏବ ଥିଲା । ଏହାପରେ ସେ ତୁରନ୍ତ ସ୍ଥାନୀୟ ପୋଲିସକୁ ସୂଚନା ଦେଇଥିଲେ ।

ଖବର ପାଇ ବାପୋଦ ପୋଲିସ ଥାନାର ଟିମ୍ ଏବଂ ଫରେନସିକ୍ ବିଶେଷଜ୍ଞମାନେ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ । ଘଟଣାସ୍ଥଳରୁ ଫିଙ୍ଗରପ୍ରିଣ୍ଟ ସହ ଅନ୍ୟାନ୍ୟ ବୈଷୟିକ ପ୍ରମାଣ ସଂଗ୍ରହ କରାଯାଇଛି । ଅଭିଯୁକ୍ତମାନଙ୍କ ବିରୋଧରେ ମାମଲା ରୁଜୁ କରାଯାଇଥିବା ବେଳେ, ଟେକ୍ନିକାଲ୍ ସର୍ଭିଲାନ୍ସ ଏବଂ ହ୍ୟୁମାନ୍ ଇଣ୍ଟେଲିଜେନ୍ସର ସହାୟତାରେ ସେମାନଙ୍କୁ ଧରିବା ପାଇଁ ସ୍ୱତନ୍ତ୍ର ଟିମ୍ ଗଠନ କରାଯାଇଛି ।