ଯୁଗଶକ୍ତି ଗାୟତ୍ରୀ ଭବନ ଭୁବନେଶ୍ୱରସ୍ଥିତ ଗାୟତ୍ରୀ ମନ୍ଦିରର ପ୍ରତିଷ୍ଠା ଦିବସ ଗୁରୁବାର ପାଳିତ ହୋଇ ଯାଇଛି । ଏହି ଅବସରରେ ବିଭିନ୍ନ କାର୍ଯ୍ୟକ୍ରମ ଆୟୋଜନ କରାଯାଇଥିଲା । ସକାଳେ ସାମୂହିକ ଜପ ପରେ ଗାୟତ୍ରୀ ମହାଯଜ୍ଞ, ଗୀତ ପ୍ରତିଯୋଗିତା, ଦୀପଯଜ୍ଞ, ସାଂସ୍କୃତିକ କାର୍ଯ୍ୟକ୍ରମ, ପୁରସ୍କାର ବିତରଣ ସହ ପ୍ରସାଦ ସେବନ ବ୍ୟବସ୍ଥା ହୋଇଥିଲା ।

ରସୁଲଗଡ଼ ସ୍ଥିତ ନୂଆସାହିରେ ଶ୍ରୀ ବେଦମାତା ଗାୟତ୍ରୀ ଟ୍ରଷ୍ଟ ପକ୍ଷରୁ ୨୦୦୫ ମସିହାରେ ଯୁଗଶକ୍ତି ଗାୟତ୍ରୀ ଭବନର ପ୍ରତିଷ୍ଠା ହୋଇଥିଲା । ଗୁରୁବାର ପ୍ରତିଷ୍ଠା ଦିବସ ଅବସରରେ ଜ୍ଞାନଯଜ୍ଞ ପ୍ରଚାରରେ ଅଧିକ ସାହିତ୍ୟ ନେଇଥିବା କାର୍ଯ୍ୟକର୍ତ୍ତାଙ୍କୁ ସମ୍ବର୍ଦ୍ଧିତ କରାଯାଇଛି । ୨୦୦ରୁ ଅଧିକ ଅଖଣ୍ଡ ଜ୍ୟୋତି ପତ୍ରିକା ନେଇଥିବା ପରିଜନଙ୍କୁ ସମ୍ବର୍ଦ୍ଧନା ଦିଆଯାଇଛି ।

କିଶୋର କିଶୋରୀମାନଙ୍କୁ ନେଇ ଭଜନ ସଙ୍ଗୀତ ପ୍ରତିଯୋଗିତା ହୋଇଛି । ଯେଉଁଥିରେ ସ୍ୱର୍ଣ୍ଣଶ୍ରୀ ନନ୍ଦ ପ୍ରଥମ ହୋଇଥିବା ବେଳେ ଅର୍ପିତା ନାୟକ ଦ୍ୱିତୀୟ ଓ ମୋନାଲିସା ପ୍ରଧାନ ତୃତୀୟ ହୋଇଛନ୍ତି । ସମସ୍ତ ପ୍ରତିଯୋଗୀଙ୍କୁ ପୁରସ୍କୃତ କରାଯାଇଛି । ସନ୍ଧ୍ୟାରେ ବିଶ୍ୱବିଦ୍ୟାଳୟର ଇଣ୍ଟର୍ଣ୍ଣସିପ୍ ଛାତ୍ରମାନେ ଦୀପ ଯଜ୍ଞ କରିଛନ୍ତି । ଛୋଟ ଛୋଟ ଛୁଆ ବିଭିନ୍ନ ନୃତ୍ୟ ପ୍ରଦର୍ଶନ କରିଛନ୍ତି ।

ପ୍ରତିଷ୍ଠା ଦିବସ ଅବସରରେ ଗୋଷ୍ଠୀ କାର୍ଯ୍ୟକ୍ରମ ହୋଇଥିଲା । ମଦନ ମୋହନ ରାଉତ ଗୁରୁ-ଗାୟତ୍ରୀ ପୂଜନ କରିଥିବା ବେଳେ ଅତିଥି ସ୍ୱାଗତ, ତିଳକ ଧାରଣ, ରକ୍ଷାସୂତ୍ର ବନ୍ଧନ କରିଥିଲେ ଭଉଣୀମାନେ । ସନ୍ତୋଷ କୁମାର ଜେନା ଯୁଗ ସଙ୍ଗୀତ ପରିବେଷଣ କରିଥିବା ବେଳେ ସ୍ୱାଗତ ସମ୍ଭାଷଣ ଦେଇଥିଲେ ଉପେନ୍ଦ୍ର ପାତ୍ର ।

ରାଜେନ୍ଦ୍ର ପ୍ରସାଦ ମହାପାତ୍ର ସତ୍ ସଂକଳ୍ପ ପାଠ କରିଥିଲେ । ବ୍ୟବସ୍ଥାପିକା ଉର୍ମିଳା ମିଶ୍ର ଯୁଗଶକ୍ତି ଗାୟତ୍ରୀ ଭବନ-ଓଡ଼ିଶା ଗାୟତ୍ରୀ ପରିବାରର ପ୍ରାଣ ଉପରେ ମତ ରଖିଥିଲେ । ଶାନ୍ତିକୁଞ୍ଜ ଆଞ୍ଚଳିକ କାର୍ଯ୍ୟାଳୟର ସଂଯୋଜକ ସୌମିତ୍ରୀ ଥାନପତି ରାଜ୍ୟ ସଂଗଠନର ହୃଦୟ ଉପରେ ଆଲୋକପାତ କରିଥିଲେ ।

ସୁସନ୍ତାନ ନିର୍ମାଣରେ ଦିଶାଦର୍ଶନ- ଆସନ୍ତୁ ଗଢ଼ିବା ସଂସ୍କାରବାନ ପିଢ଼ି ଅଭିଯାନ ନେଇ କହିଥିଲେ ବିଳାସିନୀ ସାହୁ । ବିଦ୍ୟାର୍ଥୀ ବ୍ୟକ୍ତିତ୍ୱ ବିକାଶର ଦୀକ୍ଷା-ଭାରତୀୟ ସଂସ୍କୃତି ଜ୍ଞାନ ପରୀକ୍ଷା ଉପରେ କହିଥିଲେ ପ୍ରଫୁଲ୍ଲ ଚନ୍ଦ୍ର ଦାସ । ରଚନାତ୍ମକ ଆନ୍ଦୋଳନ ଦ୍ୱାରା ଯୁବା ଜାଗରଣ ଉପରେ ସନ୍ତୋଷ କୁମାର ଜେନା କହିଥିବା ବେଳେ ସମୟର ଆହ୍ୱାନ-ନାରୀଶକ୍ତି ସଂବର୍ଦ୍ଧନ ଉପରେ କହିଥିଲେ ରଜନୀରାଣୀ ରାଜହଂସ । ମୁଖ୍ୟ ଅତିଥି ଭାବେ ଶାନ୍ତିକୁଞ୍ଜ ହରିଦ୍ୱାରର ବରିଷ୍ଠ କାର୍ଯ୍ୟକର୍ତ୍ତା ଶେଷଦେବ ବଢ଼େଇ ଯୋଗ ଦେଇ କାର୍ଯ୍ୟକର୍ତ୍ତାମାନଙ୍କୁ ଉତ୍ସାହିତ କରିଥିଲେ । ଧନ୍ୟବାଦ ଅର୍ପଣ ଓ ଶାନ୍ତିପାଠ କରିଥିଲେ ରାଜେନ୍ଦ୍ର ପ୍ରସାଦ ମହାପାତ୍ର ।