Tahia Row / ମହାପ୍ରଭୁଙ୍କ ବିନା ଟାହିଆ ପହଣ୍ଡି ପ୍ରସଙ୍ଗ; କଣ ହୋଇଥିଲା କହିଲେ ବାଡଗ୍ରାହୀ ସେବକ

ପୁରୀ: ରଥଯାତ୍ରା ଦିନ ଯେତେବେଳେ ମହାପ୍ରଭୁ ଶ୍ରୀମନ୍ଦିରରୁ ବାହାରିଥିଲେ, ସେତେବେଳେ କାଳିଆକୁ ବିନା ଟାହିଆରେ ଦେଖି ସମସ୍ତେ ଆଶ୍ଚର୍ଯ୍ୟଚକିତ ହୋଇଯାଇଥିଲେ । କାଳିଆର ଟାହିଆ କୁଆଡ଼େ ଗଲା ତାକୁ ନେଇ ଚର୍ଚ୍ଚା ଜୋର ଧରିଥିଲା । ଖବର ଆସିଲା ସାତ ପାହାଚ ନିକଟରେ ଟାହିଆ ଖସିଯାଇଛି । ପରେ ଏହାକୁ ନେଇ ବିଭିନ୍ନ ମତ ପ୍ରକାଶ ପାଇଲା । ତେବେ ଏବେ ସେଦିନ କଣ ହୋଇଥିଲା ସେ ନେଇ ଖୋଦ ବାଡଗ୍ରାହୀ ସେବକ ରାଜକୁମାର ଦାସ ମହାପାତ୍ର ପ୍ରତିକ୍ରିୟା ରଖିଛନ୍ତି ।

• 'ଶ୍ରୀଅଙ୍ଗ ପ୍ରତି ବିପଦ ଥିଲା'

ଜଗନ୍ନାଥଙ୍କ ଟାହିଆ କାଢିଦେବା ପ୍ରସଙ୍ଗରେ ବାଡଗ୍ରାହୀ ସେବକ ରାଜକୁମାର ଦାସ ମହାପାତ୍ରଙ୍କ ପ୍ରତିକ୍ରିୟା ଆସିଛି । ସେ କହିଛନ୍ତି, "ଟାହିଆ ଓଜନ ବହୁତ ଥିଲା, ଯାହାଫଳରେ ମହାପ୍ରଭୁଙ୍କ ଓଜନ ବହୁତ ବଢିଯାଇଥିଲା । ଏହି ସମୟରେ ଟାହିଆର ଅନେକ ଅଂଶ ଭାଙ୍ଗି ଯାଇଥିଲା । ସେବକଙ୍କ ଦେହରେ ଟାହିଆ କ୍ଷତି ପହଁଞ୍ଚାଉଥିଲା । ଏପରିକି ମହାପ୍ରଭୁଙ୍କ ଶ୍ରୀଅଙ୍ଗ ପ୍ରତି ବିପଦ ଥିବାରୁ ଟାହିଆକୁ କଢାଯାଇଥିଲା । ଏହାକୁ ନେଇ ରାଜନୀତି କରିବା ଠିକ୍ ନୁହେଁ ।"

• 'ବର୍ଷାରେ ଭିଜିଗଲା, କିଛି ମିଳେଇ ଗଲା'

ସେପଟେ ଗତକାଲି ବରିଷ୍ଠ ଦଇତାପତି ସେବକ ରାମକୃଷ୍ଣ ଦାସ ମହାପାତ୍ର ମଧ୍ୟ ଏହି ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, "ମହାପ୍ରଭୁଙ୍କ ପହଣ୍ଡି କରାଯାଇଥିଲା । କୋଟି କୋଟି ଭକ୍ତ ଅପେକ୍ଷା କରଥିଲେ । ସ୍ୱୟଂ ଜଗନ୍ନାଥ ନିଜେ ମଧ୍ୟ ବାହାରକୁ ଆସିଥିଲେ ବର୍ଷାରେ । ସାତ ପାହାଚ ପାଖରେ ଗୋଟେ ଟାହିଆ ଲଗା ହୋଇଥିଲା, ସୋଲରେ ଟାହିଆ ହୋଇଥିଲା । କିଛି ଦୂର ଆସିବା ପରେ ବର୍ଷାରେ ଭିଜିଗଲା, କିଛି ମିଳେଇ ଗଲା । ବାଇଶି ପାହାଚ ଡେଇଁ କି ଗୁମୁଟ ପାଖରେ ପହଁଚିବା ବେଳକୁ କିଛି ନଥିଲା, କେଵଳ କାଠି ଥିଲା ।"

ପଢନ୍ତୁ ଏହି ଖବର: କାହିଁକି ମହାପ୍ରଭୁଙ୍କ ମସ୍ତକରେ ଲାଗେ ଟାହିଆ ? ଜାଣନ୍ତୁ ଅଜଣା ଇତିହାସ

ସୂଚନା ଥାଉ କି ଜଗନ୍ନାଥଙ୍କ ଟାହିଆ ପ୍ରସଙ୍ଗକୁ ନେଇ ରାଜନୀତି ମହଲରେ ବିବାଦ ଦେଖାଦେଇଥିଲା । ରାଜ୍ୟ ସରକାରଙ୍କୁ ବିରୋଧୀ ଦାୟୀ କରିଥିଲେ । କୋଟି କୋଟି ଲୋକଙ୍କ ଆସ୍ଥା, ବିଶ୍ୱାସ ଉପରେ ପ୍ରହାର ହୋଇଛି ବୋଲି ପିସିସି ସଭାପତି ଭକ୍ତ ଦାସ ଅଭିଯୋଗ କରିଥିଲେ । ତେବେ ଏବେ ନିଜେ ମହାପ୍ରଭୁଙ୍କ ସେବାୟତ ଘଟଣା ପଛର ପ୍ରକୃତ କାରଣ କହିବା ସହ ମହାପ୍ରଭୁଙ୍କୁ ନେଇ ରାଜନୀତି ନ କରିବାକୁ ନିବେଦନ କରିଛନ୍ତି ।