କେନ୍ଦ୍ର କର୍ମଚାରୀଙ୍କ ପାଇଁ ଖୁସି ଖବର। ଅଷ୍ଟମ ବେତନ ଆୟୋଗର ବଡ଼ ଅପଡେଟ୍। ବିଶେଷ କରି ଫିଟମେଣ୍ଟ ଫ୍ୟାକ୍ଟର ଆଧାରରେ ଏହି ଦରମା ବୃଦ୍ଧି ହେବ ଏବଂ କର୍ମଚାରୀମାନଙ୍କୁ ୧୫ ଲକ୍ଷ ଟଙ୍କା ପର୍ଯ୍ୟନ୍ତ ବକେୟା ରାଶି ବା ଏରିୟର୍ ମିଳିପାରେ ବୋଲି ଆକଳନ କରାଯାଉଛି। କେନ୍ଦ୍ର ସରକାରୀ କର୍ମଚାରୀ ଏବଂ ପେନସନଭୋଗୀଙ୍କ ପାଇଁ ଏକ ବଡ଼ ଖୁସି ଖବର ଆସିବାକୁ ଯାଉଛି। ଆଗାମୀ ଅଷ୍ଟମ ବେତନ ଆୟୋଗ ଲାଗୁ ହେବା ପରେ କର୍ମଚାରୀଙ୍କ ଦରମାରେ ପ୍ରାୟ ୩୦ ରୁ ୩୪ ପ୍ରତିଶତ ପର୍ଯ୍ୟନ୍ତ ବୃଦ୍ଧି ଘଟିବାର ସମ୍ଭାବନା ରହିଛି।

ମୋଟାମୋଟି ଭାବେ ଅଷ୍ଟମ ବେତନ ଆୟୋଗ କେନ୍ଦ୍ର ସରକାରୀ କର୍ମଚାରୀଙ୍କ ଆର୍ଥିକ ସ୍ଥିତିରେ ଏକ ବଡ଼ ପରିବର୍ତ୍ତନ ଆଣିବାକୁ ଯାଉଛି, ଯାହାକୁ ନେଇ କର୍ମଚାରୀ ମହଲରେ ବେଶ୍ ଉତ୍କଣ୍ଠା ଦେଖିବାକୁ ମିଳିଛି। ଏହି ପେ' କମିଶନର ସବୁଠାରୁ ବଡ଼ ଆକର୍ଷଣ ହେଉଛି ବକେୟା ରାଶି ବା ଏରିୟର୍। ଏକ ଆକଳନ ଅନୁଯାୟୀ, ଉଚ୍ଚ ବେତନ ସ୍ତରରେ ଥିବା କର୍ମଚାରୀମାନେ ସେମାନଙ୍କ ସ୍ତର ଏବଂ ଫିଟମେଣ୍ଟ ଫ୍ୟାକ୍ଟର ଅନୁଯାୟୀ ୧୪ ରୁ ୧୫ ଲକ୍ଷ ଟଙ୍କା ପର୍ଯ୍ୟନ୍ତ ଏରିୟର୍ ପାଇପାରିବେ।

ଏକାସାଙ୍ଗରେ ଏତେ ବଡ଼ ପରିମାଣର ବକେୟା ରାଶି ପ୍ରଦାନ କଲେ ସରକାରୀ ଖର୍ଚ୍ଚ ଯଥେଷ୍ଟ ବୃଦ୍ଧି ପାଇବ। କମିଶନ ଲାଗୁ ହେବା ପରେ ଦରମା ବାବଦ ଖର୍ଚ୍ଚ ତୀବ୍ର ଗତିରେ ବଢ଼ିବ, ଯାହାର ସିଧାସଳଖ ପ୍ରଭାବ ସରକାରଙ୍କ ଆଗାମୀ ବଜେଟ୍ ଉପରେ ପଡ଼ିବ ବୋଲି ରିପୋର୍ଟରୁ ଜଣାପଡ଼ିଛି। ଦରମା ବୃଦ୍ଧି ପଛରେ ସବୁଠାରୁ ବଡ଼ ଭୂମିକା ହେଉଛି ଫିଟମେଣ୍ଟ ଫ୍ୟାକ୍ଟରର। ବର୍ତ୍ତମାନର ମୂଳ ଦରମା (Basic pay) ସହ ଏହାକୁ ଗୁଣନ କରି ନୂଆ ଦରମା ହିସାବ କରାଯିବ। ଫିଟମେଣ୍ଟ ଫ୍ୟାକ୍ଟର ଯେତିକି ଅଧିକ ହେବ, ସମସ୍ତ ବର୍ଗର କର୍ମଚାରୀଙ୍କ ମାସିକ ଆୟରେ ସେତିକି ବଡ଼ ଧରଣର ବୃଦ୍ଧି ଘଟିବ।

ଏଥିସହ ପଢ଼ନ୍ତୁ: ଯୁବପିଢିଙ୍କୁ ମିଳିବ ଚାକିରି; ଜର୍ମାନୀରୁ ଭାରତୀୟଙ୍କ ଲାଗି ଖୁସି ଖବର

କାହିଁକି ବଢ଼େ ବକେୟା?: ସାଧାରଣତଃ ନୂଆ ବେତନ ଆୟୋଗ ଲାଗୁ ହେବାରେ ବିଳମ୍ବ ହୋଇଥାଏ, କିନ୍ତୁ ଏହାକୁ ପୂର୍ବ ତାରିଖରୁ (ଯେପରିକି ଜାନୁଆରୀ ୧, ୨୦୨୬ ରୁ) କାର୍ଯ୍ୟକାରୀ କରାଯାଏ। ତେଣୁ ଏହି ବିଳମ୍ବିତ ସମୟର ବର୍ଦ୍ଧିତ ଦରମାକୁ ଏକକାଳୀନ ବକେୟା ଆକାରରେ ପ୍ରଦାନ କରାଯାଏ। ପୁରୁଣା ଦରମା ଏବଂ ନୂଆ ଦରମା ମଧ୍ୟରେ ଥିବା ପାର୍ଥକ୍ୟକୁ ବିଳମ୍ବ ହୋଇଥିବା ମାସ ସଂଖ୍ୟା ସହ ଗୁଣନ କରି ମୋଟ ବକେୟା ରାଶି ହିସାବ କରାଯାଏ। ମାସିକ ଦରମାରେ ସାମାନ୍ୟ ବୃଦ୍ଧି ଘଟିଲେ ମଧ୍ୟ ଏକାଠି ହିସାବ କଲା ବେଳକୁ ଏହା ଏକ ବଡ଼ ଅଙ୍କରେ ପରିଣତ ହୁଏ।

କର୍ମଚାରୀଙ୍କ ମଧ୍ୟରେ ଉତ୍ସାହ ଥିଲେ ମଧ୍ୟ ଏହା କେବେଠାରୁ ସମ୍ପୂର୍ଣ୍ଣ ଭାବେ ଲାଗୁ ହେବ, ସେନେଇ କୌଣସି ସରକାରୀ ଘୋଷଣା ହୋଇନାହିଁ। ବର୍ତ୍ତମାନ ସରକାରୀ ସ୍ତରରେ ବିଚାରବିମର୍ଶ ଜାରି ରହିଛି ଏବଂ ଚୂଡ଼ାନ୍ତ ନିଷ୍ପତ୍ତିକୁ ଅପେକ୍ଷା କରାଯାଇଛି।

ଅଧିକ ପଢ଼ନ୍ତୁ ଶିକ୍ଷା ଓ ନିଯୁକ୍ତି ଖବର: