ସାରା ଦେଶର ଲକ୍ଷ ଲକ୍ଷ ସରକାରୀ କର୍ମଚାରୀ ଏବଂ ପେନସନଭୋଗୀ ଅଷ୍ଟମ ବେତନ କମିଶନକୁ ଅପେକ୍ଷା କରିଛନ୍ତି । ଏବେ ସେମାନଙ୍କ ପାଇଁ ଏକ ଖୁସି ଖବର ଆସିଛି । ଅଲ୍ ଇଣ୍ଡିଆ ଏନପିଏସ୍ ଏମ୍ପ୍ଲଇଜ୍ ଫେଡେରେସନ ଅନୁଯାୟୀ, ୨୦୨୭ରେ କେନ୍ଦ୍ରର ସରକାରୀ କର୍ମଚାରୀଙ୍କ ପାଇଁ ଏକ ବିଶେଷ ବର୍ଷ ହୋଇପାରେ। କୁହାଯାଉଛି ୨୦୨୭ ଏପ୍ରିଲରୁ ଅଷ୍ଟମ ବେତନ ଅନୁସାରେ ବର୍ଦ୍ଧିତ ଦରମା ଏବଂ ପୂର୍ବ ବର୍ଷର ବକେୟା ସହିତ କର୍ମଚାରୀଙ୍କ ବ୍ୟାଙ୍କ ଆକାଉଣ୍ଟକୁ ଟଙ୍କା ଆସିପାରେ ।
- କାହିଁକି ୨୦୨୭ରେ ୮ମ ବେତନ କମିଶନ ଲାଗୁ ହେବ ?
ଆପଣ ଜାଣିଥିବେ, ସରକାର ପ୍ରତି ୧୦ ବର୍ଷରେ ଏକ ନୂତନ ବେତନ କମିଶନ ଗଠନ କରନ୍ତି । ଏହି କମିଶନ କର୍ମଚାରୀଙ୍କ ଦରମା, ଭତ୍ତା ଏବଂ ପେନସନ ସମୀକ୍ଷା କରି ସରକାରଙ୍କୁ ଏକ ରିପୋର୍ଟ ପ୍ରଦାନ କରେ । ପୂର୍ବ ବେତନ କମିଶନ ୧ ଜାନୁଆରୀ, ୨୦୨୬ ପର୍ଯ୍ୟନ୍ତ ଲାଗୁ ହୋଇଥିଲା । ଏହାର ଅର୍ଥ ହେଉଛି ଅଷ୍ଟମ ବେତନ କମିଶନ ୧ ଜାନୁଆରୀ, ୨୦୨୬ରେ ଲାଗୁ ହେବା ଉଚିତ । ମାତ୍ର ଅଖିଳ ଭାରତୀୟ କର୍ମଚାରୀ ମହାସଂଘ ଅନୁଯାୟୀ, ସରକାର କମିଶନକୁ ତାଙ୍କର ସୁପାରିଶ ଦାଖଲ କରିବା ପାଇଁ ମେ ୨୦୨୭ ପର୍ଯ୍ୟନ୍ତ ସମୟ ଦେଇଛନ୍ତି । ଯଦି କମିଶନ ଏହାର ପ୍ରକ୍ରିୟା ଶୀଘ୍ର ସମାପ୍ତ କରନ୍ତି, ତେବେ କର୍ମଚାରୀମାନେ ଏପ୍ରିଲ ୨୦୨୭ରୁ ବର୍ଦ୍ଧିତ ଦରମା ଏବଂ ବକେୟା ଅର୍ଥ ପାଇପାରିବେ।
- ଲଗାତାର ବଡ଼ ଦାବି କରୁଛି କର୍ମଚାରୀ ସଂଘ
ସାଧାରଣ ନାଗରିକଙ୍କଠାରୁ ଆରମ୍ଭ କରି ସରକାରୀ କର୍ମଚାରୀ ପର୍ଯ୍ୟନ୍ତ, ସମସ୍ତେ ବର୍ତ୍ତମାନ ବୃଦ୍ଧି ପାଉଥିବା ମୁଦ୍ରାସ୍ଫୀତି ଯୋଗୁଁ ସମସ୍ୟାରେ ଅଛନ୍ତି । ମଧ୍ୟପ୍ରାଚ୍ୟରେ ଚାଲିଥିବା ଉତ୍ତେଜନା ମଧ୍ୟରେ, ଅଶୋଧିତ ତୈଳ ଦର ଆକାଶଛୁଆଁ ହେଉଛି, ଯାହା ସ୍ପଷ୍ଟ ଭାବରେ ଦେଶରେ ପେଟ୍ରୋଲ, ଡିଜେଲ ଏବଂ ଗ୍ୟାସର ମୂଲ୍ୟକୁ ପ୍ରଭାବିତ କରୁଛି। ଫଳସ୍ୱରୂପ, କର୍ମଚାରୀ ସଂଘଗୁଡ଼ିକ କମିଶନ ଉପରେ ଚାପ ପକାଉଛି ଯେ ସେ ଯଥାଶୀଘ୍ର ସରକାରଙ୍କୁ ତାଙ୍କର ସୁପାରିଶ ଦାଖଲ କରନ୍ତୁ, ଯାହା ଦ୍ୱାରା ଦରମା ବଢିଲେ ଏହି ମୁଦ୍ରାସ୍ଫୀତିରୁ କିଛି ପରିମାଣରେ ଆଶ୍ୱସ୍ତି ମିଳିପାରିବ ।
- ସର୍ବନିମ୍ନ ଦରମା କେତେ ରହିବ ?
ଅଷ୍ଟମ ବେତନ କମିଶନର ସବୁଠାରୁ ବଡ କଥା ହେଉଛି ଫିଟମେଣ୍ଟ ଫ୍ୟାକ୍ଟର । ଏହାକୁ ଆଧାର କରି କର୍ମଚାରୀଙ୍କ ମୌଳିକ ଦରମା ନିର୍ଣ୍ଣୟ କରାଯାଏ । ଏହାର ଅର୍ଥ ହେଉଛି ଫିଟମେଣ୍ଟ ଫ୍ୟାକ୍ଟର ଯେତେ ଅଧିକ ହେବ, ଦରମା ସେତେ ଅଧିକ ହେବ । ସପ୍ତମ ବେତନ କମିଶନରେ, ଫିଟମେଣ୍ଟ ଫ୍ୟାକ୍ଟର ୨.୫୭ ଗୁଣ ଥିଲା, ଯାହାଫଳରେ ସର୍ବନିମ୍ନ ଦରମା ୧୮,୦୦୦ ଟଙ୍କା ଧାର୍ଯ୍ୟ ହୋଇଥିଲା । ଅଷ୍ଟମ ବେତନରେ ଫିଟମେଣ୍ଟ ଫ୍ୟାକ୍ଟରକୁ ତିନି ଗୁଣ କିମ୍ବା ତା'ଠାରୁ ଅଧିକ ବୃଦ୍ଧି କରିବା ପାଇଁ ଦାବି କରାଯାଇଛି ।
ଏପରି ପରିସ୍ଥିତିରେ, ଧରାଯାଉ ସରକାର ଫିଟମେଣ୍ଟ ଫ୍ୟାକ୍ଟରକୁ ୩ ଗୁଣ ସ୍ଥିର କରନ୍ତି । ତେବେ ବର୍ତ୍ତମାନର ସର୍ବନିମ୍ନ ମୂଳ ଦରମା ₹୧୮,୦୦୦ ବୃଦ୍ଧି ପାଇ ₹୨୧,୬୦୦ ହୋଇପାରେ । ଏହାବାଦ DA, HRA, ଏବଂ ଅନ୍ୟାନ୍ୟ ଭତ୍ତା ମଧ୍ୟ ବୃଦ୍ଧି ପାଇବ, ଯାହା ମୋଟ ଦରମାକୁ ଆହୁରି ବୃଦ୍ଧି କରିବ ।
ପଢନ୍ତୁ ଏହି ଖବର: ତାମିଲନାଡୁ ନା ପଶ୍ଚିମବଙ୍ଗ; କେଉଁ ରାଜ୍ୟର ମୁଖ୍ୟମନ୍ତ୍ରୀଙ୍କୁ ଅଧିକ ଦରମା ଦିଅନ୍ତି ସରକାର ?- ୧୫ ମାସର ବାକି ପଇସା ପାଇବେ କର୍ମଚାରୀ
ଆଉ ଏକ ଗୁରୁତ୍ଵପୂର୍ଣ୍ଣ କଥା ହେଉଛି, ଅଷ୍ଟମ ବେତନ ୧ ଜାନୁଆରୀ, ୨୦୨୬ରୁ ଲାଗୁ ହେଉଛି । ଏଣୁ ୨୦୨୬ର ୧୨ ମାସର ବକେୟା ପଇସା ମଧ୍ୟ ମିଳିବ । କର୍ମଚାରୀମାନେ ଏହି ମାସଗୁଡ଼ିକର ବକେୟା ପାଇବେ । ଏପ୍ରିଲରେ ଅଷ୍ଟମ ବେତନ ଅନୁଯାୟୀ ଦରମା ମିଳିଲେ, କର୍ମଚାରୀ ସମ୍ପୂର୍ଣ୍ଣ ୧୫ ମାସର ବାକି ଅର୍ଥକୁ ଏକକାଳୀନ ପ୍ରଦାନ କରାଯିବ ।
