33 LPA Job / ନଥିଲା ଭଲ ଅଫର, ତଥାପି ୩୩ ଲକ୍ଷର ଚାକିରି ଛାଡ଼ିଦେଲେ..କାରଣ କଣ ଜାଣନ୍ତୁ

ସମ୍ପ୍ରତି ପ୍ରତିଯୋଗିତାମୂଳକ ଯୁଗରେ ଚାକିରି ଖୋଜିବା ଏକ ବଡ଼ ସମସ୍ୟା । ତା'ଠୁ ବଡ଼ ସମସ୍ୟା ହେଉଛି ନିଜ ଚାକିରି ବଞ୍ଚାଇ ରଖିବା । ହେଲେ ଏଠି ଜଣେ ଯୁବକ ୩୩ ଲକ୍ଷ ଟଙ୍କାର ଚାକିରି ଛାଡ଼ିଦେଇଛନ୍ତି, ଯାହାକି ସୋସିଆଲ ମିଡିଆରେ ଖୁବ ଭାଇରାଲ ହେଉଛି । ଦରମା ୩୩ ଲକ୍ଷ ଟଙ୍କା ଥିବାପରେ ମଧ୍ୟ ସେ ଚାକିରି ଛାଡ଼ିବାକୁ ନିଷ୍ପତ୍ତି ନେଇଥିଲେ ଏବଂ ସେତେବେଳେ ତାଙ୍କ ପାଖରେ ଅନ୍ୟ କୌଣସି ଜବ୍ ମଧ୍ୟ ନଥିଲା ।

ସୋସିଆଲ ମିଡିଆରେ ଉକ୍ତ ପୋଷ୍ଟ ଅନୁଯାୟୀ ଆଇଟି ଶିଳ୍ପରେ ଚାକିରି କରୁଥିବା ଏହି ଯୁବକଙ୍କ ଉପରେ କାମକୁ ନେଇ ବହୁ ଚାପ ଥିଲା । କାମର ଚାପ ଏତେ ଥିଲା ଯେ ସେ ନିଜ ପରିବାରକୁ ମଧ୍ୟ ସମୟ ଦେଇପାରୁନଥିଲେ । ଚାକିରି ଛାଡ଼ିବା ପରେ ଯୁବକ ଜଣକ ୫ଦିନର ବ୍ରେକ୍ ନେଇଥିଲେ । ଏହି ୫ଦିନ ସେ ପୂରା ସମୟ ନିଜ ପରିବାରକୁ ଦେଇଥିଲେ । ଏହାପରେ ସେ ନିଜ ପସନ୍ଦ ମୁତାବକ ଚାକିରି ଖୋଜିବା ଆରମ୍ଭ କରିଥିଲେ । ୩ଟି କମ୍ପାନୀରୁ ନିରାଶ ହେବାପରେ ଶେଷରେ ଚତୁର୍ଥ କମ୍ପାନୀରୁ ତାଙ୍କୁ ଆସିଥିଲା ଜବ୍ ଅଫର୍ ଲେଟର୍ । ଏବେ ତାଙ୍କ ନିକଟରେ ଥିଲା ୨୯ ଲକ୍ଷର ଚାକିରି । ଏହା ପୂର୍ବ ଚାକିରିଠାରୁ ୪ଲକ୍ଷ କମ ଥିବା ସତ୍ତ୍ଵେ ଯୁବକଙ୍କୁ ଘରୁ କାମ କରିବା ସୁବିଧା ଥିଲା ।

• ଥିଲା ପ୍ରବଳ କାମ ଚାପ

ଏହି ସୋସିଆଲ ମିଡିଆ ପୋଷ୍ଟରେ ଏହା କୁହାଯାଇଛି ୟେ ଉକ୍ତ ଯୁବକଙ୍କ ଉପରେ ଗତ ୬ ମାସ ଧରି କାମ ଚାପ ରହିଥିଲା । ବିଳମ୍ବିତ ରାତି ପର୍ଯ୍ୟନ୍ତ କାମ କରିବା ଓ ପରିବାରଠାରୁ ଦୀର୍ଘ ଦିନ ପର୍ଯ୍ୟନ୍ତ ଦୂରରେ ରହିବା ତାଙ୍କ ପାଇଁ ବାଧ୍ୟତାମୂଳକ ଥିଲା । ଏହି ଚାକିରି ଛାଡ଼ିବା ପାଇଁ ଯେତେବେଳେ ସେ ଚିନ୍ତା କରିଥିଲେ, ଏହାର ନୋଟିସ୍ ପିରିୟଡ୍ ମଧ୍ୟ ବହୁ ସମୟ ପର୍ଯ୍ୟନ୍ତ ଥିଲା । ଶେଷରେ ଯୁବକ ଜଣକ କିଛି ଚିନ୍ତା ନ କରି ସ୍ପଟ୍ ରିଜାଇନ୍ ଦେଇଥିଲେ ।

ପଢନ୍ତୁ ଏହି ଖବର: ୮୫୦ ଥର ରିଜେକ୍ଟ, ୧୩ ଇଣ୍ଟରଭ୍ୟୁରେ ବିଫଳ, ତଥାପି ହାର ମାନିଲେନି ନିଜ ସ୍ଵପ୍ନ ପାଇଁ

• ଭାଇରାଲ ହେଉଛି ପୋଷ୍ଟ

ଏହି ପୋଷ୍ଟରେ ଏହା ମଧ୍ୟ କୁହାଯାଇଛି ଯେ ବର୍ତ୍ତମାନ ଲୋକେ ଚାକିରି କରି ବହୁ ଟଙ୍କା ରୋଜଗାର କରୁଥିଲେ ମଧ୍ୟ ସେମାନଙ୍କୁ ମାନସିକ ଶାନ୍ତି ମିଳୁନାହିଁ । ପରିବାରଠାରୁ ଦୂରରେ ରହିବା, ଅଧିକ ସମୟ ପର୍ଯ୍ୟନ୍ତ କାମ କରିବା, ସବୁବେଳେ କାମ ଚାପ ରହିବା କିଛି ଘରୋଇ ଚାକିରିଆଙ୍କୁ ଅଣନିଶ୍ଵାସୀ କରିଦେଇଛି । ଏହି ଯୁବକଙ୍କ କ୍ଷେତ୍ରରେ ମଧ୍ୟ ସମାନ ସ୍ଥିତି ହୋଇଥିଲା । ଶେଷରେ ସେ ୪ ଲକ୍ଷ ଟଙ୍କାର କ୍ଷତି ସହି ମଧ୍ୟ ବଡ଼ ନିଷ୍ପତ୍ତି ନେଇଥିଲେ । ନିଜ ମନ ପସନ୍ଦର ଚାକିରି କରିଥିଲେ ଓ ପରିବାରକୁ ସମୟ ମଧ୍ୟ ଦେଇଥିଲେ ।