CUO New VC / କେନ୍ଦ୍ରୀୟ ବିଶ୍ୱବିଦ୍ୟାଳୟକୁ ମିଳିଲେ ନୂତନ କୂଳପତି, ଦାୟିତ୍ଵ ଗ୍ରହଣ ପୂର୍ବରୁ ଶ୍ରୀଜୀଉଙ୍କ ଦର୍ଶନ କଲେ

କୋରାପୁଟ: ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ (CUO)ର ନୂତନ କୂଳପତି ଭାବେ ପ୍ରଫେସର ଅଜିତ କୁମାର ଶାସନୀ ଆନୁଷ୍ଠାନିକ ଭାବେ ଦାୟିତ୍ୱ ଗ୍ରହଣ କରିଛନ୍ତି । ଦାୟିତ୍ୱ ଗ୍ରହଣ ପରେ ସେ ବିଶ୍ୱବିଦ୍ୟାଳୟର ଶିକ୍ଷା, ଗବେଷଣା, ନବସୃଜନ ଓ ଛାତ୍ରଛାତ୍ରୀଙ୍କ ସର୍ବାଙ୍ଗୀଣ ବିକାଶକୁ ଅଧିକ ଗୁରୁତ୍ୱ ଦିଆଯିବ ବୋଲି କହିଛନ୍ତି । ଅଧ୍ୟାପକ, କର୍ମଚାରୀ ଓ ଛାତ୍ରଛାତ୍ରୀଙ୍କ ସହଯୋଗରେ ବିଶ୍ୱବିଦ୍ୟାଳୟକୁ ନୂତନ ଉଚ୍ଚତାରେ ପହଞ୍ଚାଇବା ପାଇଁ ସେ ଆଶା ପ୍ରକାଶ କରିଛନ୍ତି । ତେବେ ଦାୟିତ୍ଵ ଗ୍ରହଣ କରିବା ପୂର୍ବରୁ ପ୍ରଥମେ ପ୍ରଫେସର ଶାସନୀ ସାବର ଶ୍ରୀକ୍ଷେତ୍ର ମନ୍ଦିର ପହଞ୍ଚି ଶ୍ରୀଜୀଉଙ୍କ ଦର୍ଶନ କରିଥିଲେ ।

ଏହି ଅବସରରେ ପୂର୍ବତନ କୂଳପତି ପ୍ରଫେସର୍ ନରସିଂହ ପଣ୍ଡା ବିଶ୍ୱବିଦ୍ୟାଳୟର ଅଧ୍ୟାପକ, ଅଧିକାରୀ ଓ କର୍ମଚାରୀମାନେ ନୂତନ କୂଳପତିଙ୍କୁ ସ୍ୱାଗତ ଜଣାଇଥିଲେ । ଲକ୍ଷ୍ନୌସ୍ଥିତ ସିଏସଆଇଆର ନ୍ୟାସନାଲ ବୋଟାନିକାଲ ରିସର୍ଚ୍ଚ ଇନଷ୍ଟିଚ୍ୟୁଟ୍‌ର ନିର୍ଦ୍ଦେଶକ ଡକ୍ଟର ଅଜିତ କୁମାର ଶାସନୀଙ୍କୁ କେନ୍ଦ୍ରୀୟ ବିଶ୍ୱବିଦ୍ୟାଳୟ ଓଡ଼ିଶାର କୂଳପତି ଭାବେ ନିଯୁକ୍ତ କରାଯାଇଛି ।

• କେବେ ଯାଏଁ ତୁଲାଇବେ ଦାୟିତ୍ଵ ?

ଭାରତର ରାଷ୍ଟ୍ରପତି ତଥା କେନ୍ଦ୍ରୀୟ ବିଶ୍ୱବିଦ୍ୟାଳୟ ଓଡ଼ିଶାର ପରିଦର୍ଶକଙ୍କ ଅନୁମୋଦନ କ୍ରମେ ଏହି ନିଯୁକ୍ତି କରାଯାଇଛି । ଭାରତ ସରକାରଙ୍କ ଶିକ୍ଷା ମନ୍ତ୍ରଣାଳୟ ପକ୍ଷରୁ ୨ ଜୁଲାଇ ୨୦୨୬ରେ ଜାରି ହୋଇଥିବା ସରକାରୀ ବିଜ୍ଞପ୍ତି ଅନୁଯାୟୀ, ଡକ୍ଟର ଅଜିତ କୁମାର ଶାସନୀଙ୍କୁ ପାଞ୍ଚ ବର୍ଷ ପାଇଁ ବା ୭୦ ବର୍ଷ ବୟସ ପୂରଣ ପର୍ଯ୍ୟନ୍ତ (ଯାହା ପ୍ରଥମେ ହେବ) କୂଳପତି ଭାବେ ନିଯୁକ୍ତ କରାଯାଇଛି ।

• ଶ୍ରୀଜୀଉଙ୍କ ଦର୍ଶନ କଲେ

ପ୍ରଫେସର ଶାସନୀ କେନ୍ଦ୍ରୀୟ ବିଶ୍ୱବିଦ୍ୟାଳୟର ନୂତନ କୂଳପତି ଭାବେ ଦାୟିତ୍ଵ ଗ୍ରହଣ କରିବା ପୂର୍ବରୁ ମହାପ୍ରଭୁଙ୍କ ଦର୍ଶନ ଲୋଡ଼ିଥିଲେ । ଏଥିଲାଗି ସେ ପ୍ରଥମେ ସାବର ଶ୍ରୀକ୍ଷେତ୍ର ମନ୍ଦିର ପହଞ୍ଚିଲେ । ସେଠାରେ ଶ୍ରୀଜୀଉଙ୍କ ଦର୍ଶନ କରିବା ସହ ସ୍ଵତନ୍ତ୍ର ପୂଜାର୍ଚ୍ଚନା କରିଥିଲେ । ଏହି ସମୟରେ ମନ୍ଦିରର ବରିଷ୍ଠ ସଦସ୍ୟ ତାଙ୍କୁ ସାବର ଶ୍ରୀକ୍ଷେତ୍ରର ଇତିହାସ ସମ୍ପର୍କରେ ଅବଗତ କରାଇଥିଲେ । ନୂଆ କୂଳପତିଙ୍କ ସହ ବିଶ୍ଵବିଦ୍ୟାଳୟର ଅନ୍ୟ ପ୍ରଫେସରମାନେ ମଧ୍ୟ ମନ୍ଦିରରେ ପହଞ୍ଚିଥିଲେ । ମହାପ୍ରଭୁଙ୍କ ଦର୍ଶନ କରିବା ପରେ ସେ ନୂଆ ଦାୟିତ୍ଵ ଗ୍ରହଣ କରିଛନ୍ତି ।

• କିଏ ଡକ୍ଟର ଶାସନୀ ?

ଡକ୍ଟର ଶାସନୀ ଜଣେ ବିଶିଷ୍ଟ ବୈଜ୍ଞାନିକ ଓ ପ୍ରଶାସକ । ବର୍ତ୍ତମାନ ସେ ଲକ୍ଷ୍ନୌର ସିଏସଆଇଆର-ନ୍ୟାସନାଲ ବୋଟାନିକାଲ ରିସର୍ଚ୍ଚ ଇନଷ୍ଟିଚ୍ୟୁଟ୍‌ର ନିର୍ଦ୍ଦେଶକ ଭାବେ କାର୍ଯ୍ୟରତ ଅଛନ୍ତି । ଏହାପୂର୍ବରୁ ସେ ନୂଆଦିଲ୍ଲୀସ୍ଥିତ ଆଇସିଏଆର-ନ୍ୟାସନାଲ ଇନଷ୍ଟିଚ୍ୟୁଟ୍ ଫର୍ ପ୍ଲାଣ୍ଟ ବାୟୋଟେକ୍ନୋଲୋଜିର ନିର୍ଦ୍ଦେଶକ ଏବଂ ଲକ୍ଷ୍ନୌର ସିଏସଆଇଆର-ସେଣ୍ଟ୍ରାଲ ଇନଷ୍ଟିଚ୍ୟୁଟ୍ ଅଫ୍ ମେଡିସିନାଲ ଆଣ୍ଡ ଆରୋମାଟିକ୍ ପ୍ଲାଣ୍ଟସ୍‌ର ବାୟୋଟେକ୍ନୋଲୋଜି ବିଭାଗର ମୁଖ୍ୟ ବୈଜ୍ଞାନିକ ଭାବେ ମଧ୍ୟ କାର୍ଯ୍ୟ କରିଛନ୍ତି ।

ପଢନ୍ତୁ ଏହି ଖବର: ଜଗଦଗୁରୁ କୃପାଳୁ ବିଶ୍ଵବିଦ୍ୟାଳୟ ଉଦଘାଟିତ; ବିକଶିତ ଭାରତ ଗଠନ ପାଇଁ ରାଷ୍ଟ୍ରପତିଙ୍କ ଆହ୍ଵାନ

ଡକ୍ଟର ଶାସନୀଙ୍କ ନିଯୁକ୍ତି ଦ୍ୱାରା କେନ୍ଦ୍ରୀୟ ବିଶ୍ୱବିଦ୍ୟାଳୟ ଓଡ଼ିଶାରେ ଉଚ୍ଚଶିକ୍ଷା, ଗବେଷଣା ଏବଂ ନବସୃଜନ କ୍ଷେତ୍ରରେ ନୂତନ ଦିଗ ଉନ୍ମୋଚିତ ହେବ ବୋଲି ଶିକ୍ଷାବିତ୍ ମହଲରେ ଆଶା ପ୍ରକାଶ ପାଇଛି । ସୂଚନାଯୋଗ୍ୟ ଯେ, "କେନ୍ଦ୍ରୀୟ ବିଶ୍ୱବିଦ୍ୟାଳୟ ଅଧିନିୟମ, ୨୦୦୯" ଅଧୀନରେ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ପ୍ରତିଷ୍ଠା ହୋଇଥିଲା । ଦେଶର ଉଚ୍ଚଶିକ୍ଷା କ୍ଷେତ୍ରରେ ସମସ୍ତଙ୍କୁ ସମାନ ସୁଯୋଗ ଓ ଗୁଣାତ୍ମକ ଶିକ୍ଷା ଯୋଗାଇଦେବା ଲକ୍ଷ୍ୟରେ ୟୁଜିସିର ଏକାଦଶ ପଞ୍ଚବାର୍ଷିକ ଯୋଜନାରେ ଆରମ୍ଭ ହୋଇଥିବା ୧୫ଟି ନୂତନ କେନ୍ଦ୍ରୀୟ ବିଶ୍ୱବିଦ୍ୟାଳୟ ମଧ୍ୟରୁ ଏହା ଅନ୍ୟତମ । ଡଃ ଅଜିତ କୁମାର ଶାସନୀ ଏହି ଅନୁଷ୍ଠାନର ଦାୟିତ୍ୱ ଗ୍ରହଣ କରିବା ପରେ ଏକାଡେମିକ୍ ପକ୍ଷରୁ ଶୁଭେଚ୍ଛା ଜଣାଯାଇଛି ।