School Half Day Monday / ସୋମବାର ମଧ୍ୟାହ୍ନ ୧୨.୧୫ଟାରୁ ସ୍କୁଲ ଛୁଟି; ଏଇଠି ହାଫ୍ ଡେ ଘୋଷଣା

ଆସନ୍ତାକାଲି ଅର୍ଥାତ ସୋମବାର ଅନେକ ଜିଲ୍ଲାର ସ୍କୁଲରେ ମଧ୍ଯାହ୍ନ ୧୨.୧୫ଟା ଯାଏଁ ହେବ ପାଠପଢା । ତା' ପରେ ସ୍କୁଲ ଛୁଟି ଘୋଷଣା ହୋଇଛି । ଶ୍ରାବଣ ମାସରେ ଲକ୍ଷ ଲକ୍ଷ କାଉଡିଆଙ୍କ ଯାତ୍ରା ପାଇଁ ଉତ୍ତର ପ୍ରଦେଶର ଅନେକ ଜିଲ୍ଲାରେ ଛାତ୍ରଛାତ୍ରୀଙ୍କ ସୁରକ୍ଷାକୁ ଦୃଷ୍ଟିରେ ରଖି ସୋମବାର ଅଧାରୁ ସ୍କୁଲ ଛୁଟି ହେବ ବୋଲି ଘୋଷଣା ହୋଇଛି । ଏହାସହିତ ଗାଜିଆବାଦରେ ଅଗଷ୍ଟ ୧୨ ତାରିଖ ଯାଏଁ ସମସ୍ତ ସ୍କୁଲ ଛୁଟି ।

ଶ୍ରାବଣ ମାସ ଆରମ୍ଭ ହୋଇସାରିଥିବାବେଳେ ଉତ୍ତର ପ୍ରଦେଶର ଅନେକ ଜିଲ୍ଲାରେ ବହୁ ସଂଖ୍ୟାରେ କାଉଡ଼ିଆମାନେ ଆସୁଛନ୍ତି । ଏଥିଲାଗି ରାସ୍ତାରେ ପ୍ରବଳ ଭିଡ଼ ଜମୁଛି । ଟ୍ରାଫିକ୍ ଜାମ୍ ଯୋଗୁଁ ସ୍କୁଲ ଛୁଟି ନେଇ ବଡ଼ ନିଷ୍ପତ୍ତି ନେଇଛି ଜିଲ୍ଲା ପ୍ରଶାସନ । ରାସ୍ତା ବହୁ ସମୟ ଧରି ଜାମ୍ ରହୁଥିବାରୁ ଛାତ୍ରଛାତ୍ରୀ, ଅଭିଭାବକ ଓ ବିଦ୍ୟାଳୟ ଶିକ୍ଷକ ଶିକ୍ଷୟିତ୍ରୀଙ୍କୁ ଯାତାୟାତରେ ମଧ୍ୟ ସମସ୍ୟା ହେଉଛି । ଏଥିଲାଗି ଅଗଷ୍ଟ ୧୨ ତାରିଖ ଯାଏଁ ସ୍କୁଲ ବନ୍ଦ କରିବାକୁ ନିଷ୍ପତ୍ତି ନିଆଯାଇଛି ।

• ଅଗଷ୍ଟ ୧୨ ଯାଏଁ ସ୍କୁଲ ବନ୍ଦ

ଆଉ ଏକ ଭିନ୍ନ ନିର୍ଦ୍ଦେଶନାମାରେ କାଉଡ଼ିଆ ଯାତ୍ରା ପାଇଁ ଉତ୍ତର ପ୍ରଦେଶ ସରକାର ରାଜ୍ୟରେ ସ୍କୁଲ, କଲେଜ, ବିଶ୍ଵବିଦ୍ୟାଳୟ ଓ ଅନ୍ୟାନ୍ଯ ଶିକ୍ଷାନୁଷ୍ଠାନକୁ ଅଗଷ୍ଟ ୪ ତାରିଖଠାରୁ ଅଗଷ୍ଟ ୧୨ ତାରିଖ ଯାଏଁ ବନ୍ଦ ରଖାଯାଇଛି । ଏହି ନିର୍ଦ୍ଦେଶ ଉଭୟ ସରକାରୀ ଓ ବେସରକାରୀ ଶିକ୍ଷାନୁଷ୍ଠାନ ପାଇଁ ଲାଗୁ ହୋଇଛି । ଏହି ଛୁଟି ନର୍ସରୀ ଠାରୁ ଦ୍ଵାଦଶ ଶ୍ରେଣୀ ପର୍ଯ୍ୟନ୍ତ ଲାଗୁ ହୋଇଛି । ସରକାର ଏହା ମଧ୍ୟ ସ୍ପଷ୍ଟ କରିଛନ୍ତି ଯେଉଁଠି ପୂର୍ବରୁ ପରୀକ୍ଷା ନେଇ ନୋଟିସ୍ ଆସି ସାରିଛି, ସେଠାରେ ଏହି ନିୟମ ଲାଗୁ ହେଉନାହିଁ ।

• ଏହି ସବୁ ଜିଲ୍ଲାରେ ସ୍କୁଲ ବନ୍ଦ

ଉତ୍ତର ପ୍ରଦେଶର ମୁଜ୍ଜଫରନଗର, ଗାଜିଆବାଦ, ମିରଟ ଜିଲ୍ଲାରେ ଅଗଷ୍ଟ ୪ ତାରିଖରୁ ସ୍କୁଲ କଲେଜ ବନ୍ଦ ରହିଛି । କାଉଡିଆ ଯାତ୍ରା ପାଇଁ ଏହି ନିଷ୍ପତ୍ତି ନିଆଯାଇଛି । ରାଜ୍ୟ ଶିକ୍ଷା ଅଧିକାରୀମାନେ କହିଛନ୍ତି ଯେ ପ୍ରଶାସନ ପରିସ୍ଥିତି ଉପରେ ନିରନ୍ତର ନଜର ରଖିଛି । ଆଗାମୀ ନିଷ୍ପତ୍ତି ସମ୍ପର୍କରେ ତୁରନ୍ତ ସୂଚନା ଦିଆଯିବ । ଏଠାରେ କହିରଖୁଛୁ କି, ଶ୍ରାବଣ ମାସ ଜୁଲାଇ ୩୦ ତାରିଖଠାରୁ ଆରମ୍ଭ ହୋଇସାରିଛି, ଯାହାକି ଅଗଷ୍ଟ ୧୧ ତାରିଖ ଯାଏଁ ରହିଛି । ଏହି ସମୟରେ ଉତ୍ତର ପ୍ରଦେଶରେ ବହୁ ସଂଖ୍ୟାରେ ତୀର୍ଥଯାତ୍ରୀମାନେ ଆସିଥାନ୍ତି । ଲୋକଙ୍କ ସୁରକ୍ଷା, ସ୍ଵାଭାବିକ ଟ୍ରାଫିକ୍ ବ୍ଯବସ୍ଥା ଓ ଛାତ୍ରଛାତ୍ରୀଙ୍କ ସୁରକ୍ଷା ଲାଗି ରାଜ୍ୟ ସରକାର ଏହି ନିଷ୍ପତ୍ତି ନେଇଥିବା କହିଛନ୍ତି ।