Teacher Job Recruitment / ପାଠପଢାରେ ଲାଗିପଡନ୍ତୁ; ଶିକ୍ଷକ ଆଶାୟୀଙ୍କୁ ନିଯୁକ୍ତି ନେଇ ଆଶ୍ୱାସନା ଦେଲେ ସରକାର

ଭୁବନେଶ୍ଵର: ରାଜ୍ୟରେ ବିଜେପି ସରକାର ଆସିବା ପରଠାରୁ ୨୬ ହଜାର ଶିକ୍ଷକ ନିଯୁକ୍ତି ଦିଆଯାଇଛି । ଏବେ ବର୍ଷକୁ ୧୫ ହଜାର ଏବଂ ୩ ବର୍ଷରେ ମୋଟ ୪୫ ହଜାର ଶିକ୍ଷକଙ୍କୁ ନିଯୁକ୍ତି ଦିଆଯିବାକୁ ସରକାର ଯୋଜନା ରଖିଛନ୍ତି ଏବଂ ଏଥିପାଇଁ ପ୍ରକ୍ରିୟା ଜାରି ରହିଛି । ଏହି ନିଯୁକ୍ତିରେ ଆଶାୟୀମାନଙ୍କ ପାଇଁ ସୁଯୋଗ ରହିଛି । ଏବେ ପାଠପଢ଼ାରେ ବ୍ୟାଘାତ ନ ହେବା ପାଇଁ ଅବସରପ୍ରାପ୍ତ ଶିକ୍ଷକଙ୍କୁ ସ୍କୁଲରେ ପାଠ ପଢ଼ାଇବାକୁ ନିଯୁକ୍ତି ଦିଆଯାଉଛି ।

• ବଡ଼ ଘୋଷଣା କଲେ ରାଜ୍ୟ ଗଣଶିକ୍ଷା ମନ୍ତ୍ରୀ

ଭୁବନେଶ୍ୱରରେ ଧାରଣାରତ ଓଡ଼ିଶା ମିଳିତ ଶିକ୍ଷକ ଆଶାୟୀ ସଂଗଠନର ଦାବି ସମ୍ପର୍କରେ ଆଜି ଏମିତି କହିଛନ୍ତି ରାଜ୍ୟ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ । ୪ ଦଫା ଦାବି ନେଇ ଭୁବନେଶ୍ବର ମହାତ୍ମା ଗାନ୍ଧୀ ମାର୍ଗରେ ଓଡ଼ିଶା ମିଳିତ ଶିକ୍ଷକ ଆଶାୟୀ ସଂଗଠନ ପକ୍ଷରୁ ଗଣଧାରଣା ଦିଆଯାଇଛି । ଅବସରପ୍ରାପ୍ତ ଶିକ୍ଷକଙ୍କୁ ଅତିଥି ଶିକ୍ଷକ ଭାବେ ନିଯୁକ୍ତି ନିଷ୍ପତ୍ତି ପ୍ରତ୍ୟାହାର ସହ ତୁରନ୍ତ ହାଇସ୍କୁଲ ଶିକ୍ଷକ ଓ PET ନିଯୁକ୍ତି ବିଜ୍ଞପ୍ତି ପ୍ରକାଶ ପାଇଁ ଦାବି କରିଛି ସଂଗଠନ । ଏଥିସହ ୪୫ ହଜାର ପ୍ରାଥମିକ ଓ ଉଚ୍ଚ ପ୍ରାଥମିକ ଶିକ୍ଷକ, ସ୍ୱତନ୍ତ୍ର ଶିକ୍ଷକ ନିଯୁକ୍ତି ଏବଂ ୧୮୨୯ OAVSର ଖାଲି ପଦବୀ ପୂରଣ କରିବାକୁ ଦାବି ହୋଇଛି ।

• ଗାନ୍ଧୀମାର୍ଗରେ ଧାରଣାରେ ଶିକ୍ଷକ ଆଶାୟୀ

ପ୍ରବଳ ବର୍ଷାରେ ସତ୍ତ୍ବେ ଧାରଣାରେ ବସିଛନ୍ତି ଶିକ୍ଷକ ଶିକ୍ଷୟିତ୍ରୀ । ଦାବି ପୂରଣ ନହେବା ପର୍ଯ୍ୟନ୍ତ ଧାରଣା ଜାରି ରଖିବାକୁ ଆନ୍ଦୋଳନକାରୀ ଚେତାବନୀ ଦେଇଛନ୍ତି । ପେନସନ ସହ ଅନ୍ୟାନ୍ୟ ଦାବି ନେଇ ଶିକ୍ଷକମାନେ ଆନ୍ଦୋଳନକୁ ଓହ୍ଲାଇଛନ୍ତି । ଓଡ଼ିଶା ସ୍କୁଲ କଲେଜ ଶିକ୍ଷକ ଓ କର୍ମଚାରୀ ସମନ୍ୱୟ ସମିତି ପକ୍ଷରୁ ବିଶାଳ ଶିକ୍ଷକ ସମାବେଶ ସହ ଅହୋରାତ୍ର ଗଣଧାରଣା ଆରମ୍ଭ ହୋଇଛି । ଅନ୍ୟପଟେ ବିଜେପି ମୁଖପାଚ୍ର ଅନିଲ ବିଶ୍ବାଳ କହିଛନ୍ତି, ଶିକ୍ଷକ ମାନଙ୍କ ଦାବୀ ନେଇ ରାଜ୍ୟ ସରକାରଙ୍କ ସବୁ ଚ୍ୟାନେଲ ଖୋଲା ଅଛି । ରାଜ୍ୟ ସରକାର ଦାବୀକୁ ଗୁରୁତର ସହ ନେଉଛନ୍ତି ।

ପଢନ୍ତୁ ଏହି ଖବର: ତ୍ରାପିଟ୍ ବଂଶଲଙ୍କୁ ନେଇ କାହିଁକି ଏତେ ଚର୍ଚ୍ଚା: ଗୁଗୁଲ୍, ମାଇକ୍ରୋସଫ୍ଟରେ କାମ କରିଥିଲେ, ମେଟା ଦେବ ୮୦୦ କୋଟି

ବିଜେପି ବିଧାୟକ ଅଶୋକ ମହାନ୍ତି କହିଛନ୍ତି, " ଶିକ୍ଷକ ବନ୍ଧୁମାନେ ରାଜ ରାସ୍ତାରେ ବସିବା ଚିନ୍ତାର ବିଷୟ। ସେମାନଙ୍କ ବହୁ ସମସ୍ୟା ଅଛି । କିନ୍ତୁ ଆଇନଗତ ପ୍ରତିବନ୍ଧକ ବି ରହିଛି । ସରକାର ସେମାନଙ୍କ କଥା ଚିନ୍ତା କରୁଛନ୍ତି । ଆମ ସରକାର ଆସିବା ପରେ ୨୨ ହଜାରରୁ ଅଧିକ ଶିକ୍ଷକ ନିଯୁକ୍ତ ହୋଇଛନ୍ତି । ମୁଖ୍ୟମନ୍ତ୍ରୀ ଶିକ୍ଷକ ମାନଙ୍କ ସମସ୍ୟାର ସମାଧାନ ପାଇଁ କମିସନ୍ ବି ଗଠନ କରିଛନ୍ତି ।"