ୟୁପିଏସସି ପ୍ରିଲିମ୍ସ ପରୀକ୍ଷା ଫଳ ୨୦୨୬ ପ୍ରକାଶ ପାଇଛି । ଏଥିରେ ୧୩ ହଜାର ୩ ଶହ ୪୩ ଜଣ ପ୍ରାର୍ଥୀ ମେନ୍ସ ପାଇଁ ମନୋନୀତ ହୋଇଛନ୍ତି । କମିଶନଙ୍କ ଦ୍ୱାରା ବିଜ୍ଞପ୍ତି ଜାରି କରାଯାଇଥିବା ୧ ହଜାର ୧୬ଟି ପଦବୀ ପାଇଁ ଚଳିତ ବର୍ଷ ୧୩ ହଜାର ୩ ଶହ ୪୩ ଜଣ ପ୍ରାର୍ଥୀ ସିଭିଲ୍ ସର୍ଭିସେସ୍ ମେନ୍ସ ପରୀକ୍ଷା ୨୦୨୬ ପାଇଁ ଯୋଗ୍ୟତା ଅର୍ଜନ କରିଛନ୍ତି । ମନୋନୀତ ପ୍ରାର୍ଥୀମାନଙ୍କର ପ୍ରାର୍ଥିତ୍ୱ ବର୍ତ୍ତମାନ ପାଇଁ ପ୍ରୋଭିଜନାଲ୍ ଅଛି ଏବଂ ଏହା UPSC ନିୟମ ଅନୁଯାୟୀ ନିର୍ଦ୍ଧାରିତ ଯୋଗ୍ୟତା ସର୍ତ୍ତାବଳୀ ପୂରଣ ଉପରେ ନିର୍ଭର କରେ।

• ଏମିତି ଚେକ୍ କରନ୍ତୁ ରେଜଲ୍ଟ

ପ୍ରାର୍ଥୀମାନେ UPSCର ଅଫିସିଆଲ୍ ୱେବସାଇଟ୍‌ରୁ ଏହି ଫାଇଲ୍ ଡାଉନଲୋଡ୍ କରି ନିଜର ସ୍ଥିତି ଫଳାଫଳ ଯାଞ୍ଚ କରିପାରିବେ। UPSC ସମସ୍ତ ମନୋନୀତ ପ୍ରାର୍ଥୀଙ୍କ ପାଇଁ ଏକ ବାଧ୍ୟତାମୂଳକ ଅନଲାଇନ୍ ଆବେଦନ ପ୍ରକ୍ରିୟା ଘୋଷଣା କରିଛି । ଯାହା ଜୁନ ୧୯ରୁ ଜୁନ ୨୮ ପର୍ଯ୍ୟନ୍ତ ସକ୍ରିୟ ରହିବ। ଏହି ଅବଧି ମଧ୍ୟରେ ପ୍ରାର୍ଥୀମାନଙ୍କୁ ଫିସ୍ ପୈଠ, ବ୍ୟକ୍ତିଗତ ବିବରଣୀ ଯାଞ୍ଚ, ଆବଶ୍ୟକ ସ୍ଥଳେ ସ୍କ୍ରାଇବ୍ ଏବଂ ସହାୟକ ଉପକରଣ ସମ୍ବନ୍ଧୀୟ ସୂଚନା ଅପଡେଟ୍ କରିବା ସହ କ୍ୟାଡର ପସନ୍ଦ ଦାଖଲ କରିବାକୁ ହେବ।

• ଆବେଦନ କରିଥିଲେ ୫ଲକ୍ଷ ପ୍ରାର୍ଥୀ

UPSC ପରୀକ୍ଷାକୁ ଦେଶର ସବୁଠାରୁ କଷ୍ଟକର ଏବଂ ସମ୍ମାନଜନକ ପ୍ରତିଯୋଗିତାମୂଳକ ପରୀକ୍ଷା ମଧ୍ୟରୁ ଗୋଟିଏ ବୋଲି ବିବେଚନା କରାଯାଏ । ଚଳିତ ବର୍ଷ ପ୍ରତିଯୋଗିତା ବେଶ କଠିନ ଥିଲା । ରିପୋର୍ଟ ଅନୁଯାୟୀ, ପ୍ରାୟ ୮.୧୯ ଲକ୍ଷ ପ୍ରାର୍ଥୀ ପରୀକ୍ଷା ପାଇଁ ପଞ୍ଜିକରଣ କରିଥିଲେ, କିନ୍ତୁ ପରୀକ୍ଷା ଦିନ କେବଳ ୫ ଲକ୍ଷ ପ୍ରାର୍ଥୀ ଉପସ୍ଥିତ ଥିଲେ, ଯାହାକି ମୋଟ ପ୍ରାର୍ଥୀଙ୍କ ପ୍ରାୟ ୬୭ ପ୍ରତିଶତ । ଏହାର ଅର୍ଥ ହେଉଛି ଆବେଦନ କରିବା ସତ୍ତ୍ୱେ ୩ ଲକ୍ଷରୁ ଅଧିକ ପ୍ରାର୍ଥୀ ପରୀକ୍ଷା କେନ୍ଦ୍ରରେ ପହଞ୍ଚି ନଥିଲେ । ବର୍ତ୍ତମାନ ପ୍ରିଲିମ୍ସରେ କେବଳ ୨.୬୭% ପ୍ରାର୍ଥୀ ପାସ୍ କରିଛନ୍ତି, ଯେତେବେଳେ ପ୍ରାୟ ୯୭.୩୩% ବିଫଳ ହୋଇଛନ୍ତି ।

ପଢନ୍ତୁ ଏହି ଖବର: ସରିଲା ଖରା ଛୁଟି; ଖୁବଶୀଘ୍ର ଖୋଲିବ ସ୍କୁଲ; ଅଧିକ ଖରା ହେଲେ...

• ଚୂଡ଼ାନ୍ତ ତାଲିକାରୁ ବାଦ ପଡ଼ନ୍ତି ୯୮.୫% ଆଶାୟୀ

UPSC ଚୟନ ପ୍ରକ୍ରିୟା ୩ଟି ପର୍ଯ୍ୟାୟରେ କରାଯାଏ: ପ୍ରିଲିମ୍ସ, ମେନ୍ସ ଏବଂ ଇଣ୍ଟରଭ୍ୟୁ । କେବଳ ପ୍ରିଲିମ୍ସ ଉତ୍ତୀର୍ଣ୍ଣ ହେବା ଚୂଡ଼ାନ୍ତ ସଫଳତାର ଗ୍ୟାରେଣ୍ଟି ନୁହେଁ । ପ୍ରାର୍ଥୀମାନଙ୍କୁ ମେନ୍ସ ଏବଂ ଇଣ୍ଟରଭ୍ୟୁ ରାଉଣ୍ଡରେ ମଧ୍ୟ ନିରନ୍ତର ଭଲ ପ୍ରଦର୍ଶନ କରିବାକୁ ପଡ଼ିଥାଏ । ପରିସଂଖ୍ୟାନ ଦର୍ଶାଏ ଯେ ପ୍ରିଲିମ୍ସ ପରୀକ୍ଷା ଦେଇଥିବା ଅଧିକାଂଶ ପ୍ରାର୍ଥୀ ଚୂଡ଼ାନ୍ତ ମେରିଟ୍ ତାଲିକାରେ ପହଞ୍ଚି ପାରନ୍ତି ନାହିଁ । ଆକଳନ କରାଯାଇଛି ଯେ ପରୀକ୍ଷା ଦେଉଥିବା ପ୍ରାୟ ୯୮.୫ ପ୍ରତିଶତ ପ୍ରାର୍ଥୀ ଚୂଡ଼ାନ୍ତ ଚୟନ ତାଲିକାରୁ ବାଦ ପଡ଼ିଥାନ୍ତି ।