Ramayana / ‘ରାମାୟଣ’ର ତୃତୀୟ ଭାଗକୁ ନେଇ ବଡ଼ ଖୁଲାସା କଲେ ରଣବୀର କପୁର, କହିଲେ...

ବଲିଉଡ୍‌ର ବହୁ ପ୍ରତୀକ୍ଷିତ ଫିଲ୍ମ ‘ରାମାୟଣ’କୁ ନେଇ ଦର୍ଶକଙ୍କ ଉତ୍ସାହ ଏବେ ଶୀର୍ଷରେ । ପ୍ରାୟ ୪,୦୦୦ କୋଟି ଟଙ୍କାର ବଜେଟ୍‌ରେ ନିର୍ମାଣ ହେଉଥିବା ଏହି ଫିଲ୍ମକୁ ଦୁଇଟି ଭାଗରେ ରିଲିଜ୍ କରିବାର ଯୋଜନା ରହିଛି । ଫିଲ୍ମରେ ରଣବୀର କପୁର, ସାଇ ପଲ୍ଲବୀ ଏବଂ ୟଶଙ୍କ ଭଳି ଷ୍ଟାର ଅଭିନୟ କରୁଛନ୍ତି । ଏବେ ଏହି ଫିଲ୍ମର ତୃତୀୟ ଭାଗକୁ ନେଇ ରଣବୀରଙ୍କ ଏକ ବୟାନ ଚର୍ଚ୍ଚା ସୃଷ୍ଟି କରିଛି ।

କ’ଣ କହିଲେ ରଣବୀର ?
ରିଭ୍ୟୁ ନେସନ୍‌ ସହ ଏକ ସାକ୍ଷାତକାର ସମୟରେ ରଣବୀର କପୁର ଫିଲ୍ମର ସୁଟିଂ ଅନୁଭୂତି ବାଣ୍ଟିଥିଲେ । ଏହି ସମୟରେ ସେ କହିଥିଲେ ଯେ, ‘ରାମାୟଣ ପାର୍ଟ-୨’ ପାଇଁ ତାଙ୍କ ଅଂଶର ପ୍ରାୟ ୫୦ ପ୍ରତିଶତ ସୁଟିଂ ଶେଷ ହୋଇଛି । ଏହା ସହିତ ସେ ଦ୍ୱିତୀୟ ଭାଗ ଏବଂ ଆଗକୁ ଆସିବାକୁ ଥିବା ତୃତୀୟ ଭାଗର ସୁଟିଂ କଥା ମଧ୍ୟ କହିଦେଇଥିଲେ ।
ରଣବୀରଙ୍କ କହିବା ଅନୁଯାୟୀ, ଏହି କାହାଣୀ ସବୁବେଳେ ତାଙ୍କ ସହ ରହିବ । ଏଭଳି ବଡ଼ ପ୍ରୋଜେକ୍ଟର ଅଂଶ ହେବା ଜୀବନରେ ଥରେ ମିଳୁଥିବା ସୁଯୋଗ । ଫିଲ୍ମର ଫଳାଫଳ ଯାହା ବି ହେଉ, ଏତେ ବଡ଼ ପରିସରରେ ରାମାୟଣକୁ ପରଦାରେ ଦେଖାଇବା ତାଙ୍କ ଜୀବନର ଏକ ସ୍ମରଣୀୟ ମୁହୂର୍ତ୍ତ ବୋଲି ସେ କହିଛନ୍ତି ।

ତୃତୀୟ ଭାଗ ନେଇ ନାହିଁ ଅଫିସିଆଲ୍ ଘୋଷଣା
ତେବେ ରଣବୀରଙ୍କ ଏହି ବୟାନ ପରେ ଫିଲ୍ମର ତୃତୀୟ ଭାଗ ନେଇ ଚର୍ଚ୍ଚା ଜୋର୍ ଧରିଛି । କିନ୍ତୁ ନିର୍ମାତା ନମିତ ମଲହୋତ୍ରା କିମ୍ବା ନିର୍ଦ୍ଦେଶକ ନିତେଶ ତିୱାରୀଙ୍କ ପକ୍ଷରୁ ଏପର୍ଯ୍ୟନ୍ତ ତୃତୀୟ ଭାଗକୁ ନେଇ କୌଣସି ଅଧିକାରିକ ଘୋଷଣା ହୋଇନାହିଁ । ବର୍ତ୍ତମାନ ଫିଲ୍ମର ଦୁଇଟି ଭାଗ ନିର୍ମାଣ ହେବା ନେଇ ସୂଚନା ରହିଛି ।

ପ୍ରଥମ ଭାଗ ନଭେମ୍ବର ୫ରେ ରିଲିଜ୍ ହେବାକୁ ଥିବାବେଳେ ଦ୍ୱିତୀୟ ଭାଗ ୨୦୨୮ ଦୀପାବଳିରେ ରିଲିଜ୍ ହେବା ନେଇ ଚର୍ଚ୍ଚା ହେଉଛି । ଫିଲ୍ମରେ ରଣବୀର, ସାଇ ପଲ୍ଲବୀ ଓ ୟଶଙ୍କ ବ୍ୟତୀତ ରବି ଦୁବେ, ଅରୁଣ ଗୋଭିଲ, ରକୁଲ ପ୍ରୀତ ସିଂହ, ବିବେକ ଓବରୟ, ଲାରା ଦତ୍ତା, ଫୈଜଲ ମଲିକ ଓ କୁନାଲ କପୁରଙ୍କ ଭଳି କଳାକାର ନଜର ଆସିବେ।