Dadasaheb Phalke Award / ଅନନ୍ତ ନାଗଙ୍କୁ ଦାଦାସାହେବ ଫାଲ୍‌କେ ସମ୍ମାନ, ଭାରତ ସରକାରଙ୍କ ବଡ଼ ଘୋଷଣା

ପ୍ରତିବର୍ଷ ଜଣେ କଳାକାରଙ୍କୁ ଭାରତୀୟ ସିନେମାରେ ତାଙ୍କର ସ୍ମରଣୀୟ ଏବଂ ଉଲ୍ଲେଖନୀୟ ଅବଦାନ ପାଇଁ ଦାଦାସାହେବ ଫାଲକେ ପୁରସ୍କାରରେ ସମ୍ମାନିତ କରାଯାଏ । ଏହି ପୁରସ୍କାରକୁ ଭାରତୀୟ ସିନେମାର ସର୍ବୋଚ୍ଚ ସମ୍ମାନ ଭାବରେ ବିବେଚନା କରାଯାଏ । ୨୦୨୪ ବର୍ଷ ପାଇଁ କନ୍ନଡ ସିନେମାର ବରିଷ୍ଠ ଅଭିନେତା ଅନନ୍ତ ନାଗଙ୍କୁ ଏହି ପୁରସ୍କାରରେ ସମ୍ମାନିତ କରାଯିବ । ଭାରତ ସରକାର ଏହି ପୁରସ୍କାର ପାଇଁ ୭୮ ବର୍ଷୀୟ ଅଭିନେତାଙ୍କ ନାମ ଘୋଷଣା କରିଛନ୍ତି ।

ଅନନ୍ତ ନାଗଙ୍କୁ ଦାଦାସାହେବ ଫାଲକେ ପୁରସ୍କାରରେ ସମ୍ମାନିତ କରାଯିବ

ସୂଚନା ଓ ପ୍ରସାରଣ ମନ୍ତ୍ରଣାଳୟ ଅଧୀନରେ କାର୍ଯ୍ୟରତ ପ୍ରେସ୍ ଇନଫର୍ମେସନ୍ ବ୍ୟୁରୋ (PIB) ନିଜର ଏକ୍ସ ହ୍ୟାଣ୍ଡେଲ୍‌ରେ ଅନନ୍ତ ନାଗଙ୍କ ଫଟୋ ସେୟାର କରି ଏହି ଘୋଷଣା କରିଛି । PIB ପକ୍ଷରୁ କୁହାଯାଇଛି ଯେ, ଦାଦାସାହେବ ଫାଲ୍‌କେ ପୁରସ୍କାର ସିଲେକ୍ସନ୍ କମିଟିର ସୁପାରିସ ଆଧାରରେ ଅନନ୍ତ ନାଗଙ୍କୁ ୨୦୨୪ ବର୍ଷ ପାଇଁ ଏହି ସମ୍ମାନ ପ୍ରଦାନ କରାଯିବ ।

ଏଥିରେ ଆହୁରି କୁହାଯାଇଛି, "ଦାଦାସାହେବ ଫାଲକେ ପୁରସ୍କାର ଚୟନ କମିଟିର ସୁପାରିଶ କ୍ରମେ ଅନନ୍ତ ନାଗଙ୍କୁ ଭାରତୀୟ ସିନେମାରେ ଅବଦାନ ପାଇଁ ପ୍ରତିଷ୍ଠିତ ଦାଦାସାହେବ ଫାଲକେ ପୁରସ୍କାର ୨୦୨୪ରେ ସମ୍ମାନିତ କରାଯିବ । ସେ ଅନେକ ପିଢ଼ିକୁ ପ୍ରେରଣା ଦେଇଛନ୍ତି ।" ଏହି ପୁରସ୍କାର ସେପ୍ଟେମ୍ବର ୨୨, ୨୦୨୬ରେ ଗୁଜୁରାଟର କେଭାଡିଆରେ ଅନୁଷ୍ଠିତ ୭୨ତମ ଜାତୀୟ ଚଳଚ୍ଚିତ୍ର ପୁରସ୍କାର ସମାରୋହରେ ପ୍ରଦାନ କରାଯିବ ।

କିଏ ଏହି ଅନନ୍ତ ନାଗ ?

ଅନନ୍ତ ନାଗ ଭାରତୀୟ ସିନେମାର ଜଣେ ପ୍ରତିଷ୍ଠିତ ଅଭିନେତା ହେବା ସହ ଜଣେ ରାଜନେତା ମଧ୍ୟ । ୪ ସେପ୍ଟେମ୍ବର ୧୯୪୮ରେ ଜନ୍ମଗ୍ରହଣ କରିଥିବା ଅନନ୍ତ ନାଗ କନ୍ନଡ଼ ସିନେମାରେ ନିଜର ଅଭିନୟ ପାଇଁ ବିଶେଷ ପରିଚିତ ।

ତାଙ୍କର ଦୀର୍ଘ ଅଭିନୟ ଜୀବନରେ ସେ ୩୦୦ରୁ ଅଧିକ ଫିଲ୍ମରେ କାମ କରିଛନ୍ତି । କନ୍ନଡ଼ ବ୍ୟତୀତ ସେ ହିନ୍ଦୀ, ତେଲୁଗୁ, ତାମିଲ, ମରାଠୀ ଓ ମଲୟାଲମ୍ ଭାଷାର ଫିଲ୍ମରେ ମଧ୍ୟ ଅଭିନୟ କରିଛନ୍ତି । ଭାରତୀୟ ସିନେମାରେ ଅନନ୍ତ ନାଗଙ୍କ ଦୀର୍ଘ ଅବଦାନକୁ ସ୍ୱୀକୃତି ଦେଇ ତାଙ୍କୁ ଦାଦାସାହେବ ଫାଲ୍‌କେ ପୁରସ୍କାର ଦିଆଯିବାକୁ ନେଇ ସିନେପ୍ରେମୀଙ୍କ ମଧ୍ୟରେ ଉତ୍ସାହ ଦେଖାଦେଇଛି ।