Arshdeep Singh / ପ୍ରେମରେ କ୍ଲିନବୋଲ୍ଡ ହେଲେ ଅର୍ଶଦୀପ ସିଂ; ଟାଟୁରେ ରିଲେସନସିପ୍‌ର କଲେ ଖୁଲାସା

ଭାରତୀୟ ଦ୍ରୁତ ବୋଲର ଅର୍ଶଦୀପ ସିଂହ ଅଭିନେତ୍ରୀ ତଥା ମଡେଲ ସମରିନ କୌରଙ୍କୁ ଡେଟ୍ କରୁଛନ୍ତି ବୋଲି ଅନେକ ଦିନ ଧରି ଚର୍ଚ୍ଚା ହେଉଥିଲା । ଏବେ ସବୁ ଚର୍ଚ୍ଚା ଉପରେ ଲାଗିଛି ବିରାମ । କାରଣ ଅର୍ଶଦୀପ ନିଜେ ପ୍ରେମ ସମ୍ପର୍କର ଖୁଲାସା କରିଛନ୍ତି । ଏକ ଫଟୋ ସେୟାର କରି କ୍ରିକେଟର ନିଜ ବ୍ୟକ୍ତିଗତ ସମ୍ପର୍କକୁ ନିଶ୍ଚିତ କରିଛନ୍ତି । ଏହି ଫଟୋ ଏବେ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି ।

୨୭ ବର୍ଷୀୟ ଦ୍ରୁତ ବୋଲର ଅର୍ଶଦୀପ ତାଙ୍କ ହାତ ଉପରେ ସମରିନ କୌରଙ୍କ ନାମ ଟାଟୁ କରାଇଥିଲେ । ଏହା ବ୍ୟତୀତ, ସମରିନ କୌର ମଧ୍ୟ ତାଙ୍କ ହାତରେ ଅର୍ଶଦୀପ ସିଂହଙ୍କ ନାଁକୁ ଟାଟୁରେ ଲେଖିଥିଲେ । ଏହି ଲଭବାର୍ଡ୍‌ସ ସୋସିଆଲ ମିଡିଆରେ ଏକାଠି ହୋଇ ଏକ ଫଟୋ ମଧ୍ୟ ସେୟାର କରି କ୍ୟାପସନ ଲେଖିଥିଲେ, "ମୋ ଜୀବନ ସାଥୀ ।"

• ଅର୍ଶଦୀପଙ୍କ ହାତରେ ପ୍ରେମିକାଙ୍କ ନାଁର ଟାଟୁ

ଅର୍ଶଦୀପ ସିଂହଙ୍କ ହାତରେ 'SK' ଟାଟୁ କରିଛନ୍ତି । ସମରିନ୍ କୌରଙ୍କ ହାତରେ 'AS' ଟାଟୁ ଅଛି । ଏହା ବ୍ୟତୀତ ଉଭୟ ଦମ୍ପତିଙ୍କ ହାତରେ ଟାଟୁ ପାଖରେ ଏକ ଛୋଟ, ପତଳା ଲାଲ ରେଖା ଦେଖାଯାଉଛି, ଯାହା ଏକ ହାର୍ଟବିଟ୍‌ର ରେଖା ଓ ହାର୍ଟ ସୃଷ୍ଟି କରୁଛି । ଅର୍ଶଦୀପ ଏବଂ ସମରିନଙ୍କ ହାତରେ ଏହି ଫ୍ୟାନ୍ସି ଟାଟୁ ଡିଜାଇନର୍ ଅଭିଷେକ ଗାୱାଇ ଏବଂ ଟାଟୁ କଳାକାର ସନି ସେନ୍ ଦ୍ୱାରା ତିଆରି କରାଯାଇଛି ।

• ଅର୍ଶଦୀପଙ୍କ ପ୍ରେମିକା କିଏ ?

ସମରିନ୍ କୌରଙ୍କ ଜନ୍ମ ୭ ସେପ୍ଟେମ୍ବର ୧୯୯୯ ମସିହାରେ ଜମ୍ମୁ ଏବଂ କାଶ୍ମୀରରେ ହୋଇଥିଲା । ସେ ଜଣେ ଅଭିନେତ୍ରୀ, ମଡେଲ୍ ଏବଂ ସୋସିଆଲ ମିଡିଆ ଇନଫ୍ଲୁଏନ୍ସର । ମଡେଲିଂ ଜଗତରେ ପ୍ରବେଶ କରିବା ପୂର୍ବରୁ, ସେ ପୁଣେର ସିମ୍ବାୟୋସିସ୍ କଲେଜ ଅଫ୍ ଆର୍ଟସ୍ ଆଣ୍ଡ୍ କମର୍ସରୁ ବି.କମ୍ (ଅନର୍ସ) ଡିଗ୍ରୀ ହାସଲ କରିଥିଲେ । ସମରିନ୍ ପ୍ରଥମେ ଫେମିନା ମିସ୍ ଇଣ୍ଡିଆ ୨୦୧୮ ପ୍ରତିଯୋଗିତାରେ ଜମ୍ମୁ ଏବଂ କାଶ୍ମୀରର ପ୍ରତିନିଧିତ୍ୱ କରିବା ପରେ ଲୋକଙ୍କ ଦୃଷ୍ଟି ଆକର୍ଷଣ କରିଥିଲେ, ଯେଉଁଠାରେ ସେ ଫାଇନାଲିଷ୍ଟ ମଧ୍ୟ ହୋଇଥିଲେ ।

ପଢନ୍ତୁ ଏହି ଖବର: ଈଶାନ କିଶାନଙ୍କ ନୂଆ ମାଇଲଖୁଣ୍ଟ, ଚିନ୍ତାରେ ଗମ୍ଭୀର ଏବଂ ଅଗରକର

ଏହା ବ୍ୟତୀତ, ସମରିନ୍ ZEE5 ୱେବ୍ ସିରିଜ୍ 'ନେଲ୍ ପଲିସ୍'ରେ ମଧ୍ୟ ନଜର ଆସିଛନ୍ତି । ସେ ୮୩ ଏବଂ ସର୍ଦ୍ଦାରଜୀ-୨ ଭଳି ଫିଲ୍ମରେ ମଧ୍ୟ କାମ କରିଛନ୍ତି । ଅଭିନୟ ବ୍ୟତୀତ ସେ ଜୁବିନ୍ ନୌଟିୟାଲ୍, ବାଦଶାହା ଏବଂ ଗୁରୁ ରନ୍ଧାୱା ଭଳି ଲୋକପ୍ରିୟ ଗାୟକଙ୍କ ସହିତ ଅନେକ ମ୍ୟୁଜିକ୍ ଭିଡିଓରେ ମଧ୍ୟ ନଜର ଆସିଛନ୍ତି । ସେ ବାୱଲା ଏବଂ ତୁଝେ ଭୁଲନା ତୋ ଚାହା ଭଳି ଗୀତ ମାଧ୍ୟମରେ ଦର୍ଶକଙ୍କ ପ୍ରଶଂସା ସାଉଣ୍ଟିଛନ୍ତି ।