Karisma Abhishek / ଅଭିଷେକଙ୍କ ସହ ନିର୍ବନ୍ଧ ଭାଙ୍ଗିଲା ପରେ କେମିତି ଥିଲେ କରିସ୍ମା କପୁର; ବଡ଼ ଖୁଲାସା

ମୁମ୍ବାଇ: ଦିନେ ବଲିଉଡର ସବୁଠୁ ଚର୍ଚ୍ଚିତ ଯୋଡ଼ି ଥିଲେ କରିସ୍ମା କପୁର ଓ ଅଭିଷେକ ବଚ୍ଚନ । ଉଭୟଙ୍କ ସମ୍ପର୍କକୁ ଦର୍ଶକଙ୍କ ସହ ପରିବାର ମଧ୍ୟ ପସନ୍ଦ କରୁଥିଲେ । ଏହି ସମ୍ପର୍କ ଗୋଟିଏ ପାଦ ଆଗେଇଥିଲା ଓ କରିସ୍ମା-ଅଭିଷେକଙ୍କ ନିର୍ବନ୍ଧ ମଧ୍ୟ ହୋଇଥିଲା । ମାତ୍ର ହଠାତ୍ ଏହି ସମ୍ପର୍କ ଭାଙ୍ଗିଯାଇଥିଲା । କପୁର ଓ ବଚ୍ଚନ ପରିବାରକୁ ଝଟକା ଲାଗିଥିଲା । ସେଦିନ କଣ ହୋଇଥିଲା ବଡ଼ ଖୁଲାସା କରିଛନ୍ତି ଚଳଚ୍ଚିତ୍ର ନିର୍ମାତା ସୁନୀଲ ଦର୍ଶନ । ଯେତେବେଳେ ଏହି ଖବର ଆସିଥିଲା ସେତେବେଳେ ସେ କରିସ୍ମାଙ୍କ ଘରେ ଥିଲେ ବୋଲି କହିଛନ୍ତି ।

ନିକଟରେ ଏକ ସାକ୍ଷାତକାରରେ କଥାବାର୍ତ୍ତା ହେବା ସମୟରେ ସୁନୀଲ ଦର୍ଶନ କହିଛନ୍ତି ଯେ କରିସ୍ମା ଓ ଅଭିଷେକଙ୍କ ମଧ୍ୟରେ ସମ୍ପର୍କ 'ଏକ ରିସ୍ତା' ଫିଲ୍ମର ସୁଟିଂରୁ ଆରମ୍ଭ ହୋଇଥିଲା । ସମୟ ସହିତ ଏହି ସମ୍ପର୍କ ଧୀରେ ଧୀରେ ମଜଭୁତ ହେଉଥିଲା । ସେ କହିଥିଲେ ଯେ ଯେତେବେଳେ ସେ 'ହାଁ ମେଁନେ ଭି ପ୍ୟାର କିୟା' ଫିଲ୍ମ ତିଆରି କରୁଥିଲେ, ସେତେବେଳେ ଉଭୟଙ୍କ ବିବାହ ଖୁବଶୀଘ୍ର ହେବାକୁ ଯାଉଛି ବୋଲି ଚର୍ଚ୍ଚା ହେଉଥିଲା ।

• ଯେତେବେଳେ ଭାଙ୍ଗିଥିଲା ନିର୍ବନ୍ଧ

ଫିଲ୍ମମେକର ଦର୍ଶନ କହିଛନ୍ତି ଯେ ଯେତେବେଳେ ସେମାନଙ୍କ ନିର୍ବନ୍ଧ ଭାଙ୍ଗିବା ଖବର ଆସିଥିଲା, ସେତେବେଳେ ସେ କରିସ୍ମାଙ୍କ ଘରେ ଥିଲେ । ହଠାତ୍ ଏହି ଖବର ସମସ୍ତଙ୍କୁ ଚମକାଇଦେଇଥିଲା । ଉଭୟ ପରିବାର ମଧ୍ୟରେ କଣ ଘଟିଥିଲା କେହି ବି ଜାଣିପାରିନଥିଲେ । ପରବର୍ତ୍ତୀ ସମୟରେ କରିସ୍ମା ନୂଆବର୍ଷ ପାଳନ କରିବା ଲାଗି ବ୍ୟାଙ୍କକ୍ ଯାଇଥିଲେ ଓ ତା' ପରେ ସେ ଜାଣିବାକୁ ପାଇଥିଲେ ଯେ କରିସ୍ମା ଧନୀ ବ୍ୟବସାୟୀ ସଞ୍ଜୟଙ୍କୁ ବିବାହ କରିବାକୁ ଯାଉଛନ୍ତି ।

• ସମ୍ପର୍କ ଭାଙ୍ଗିବା ପାଇଁ କିଏ ଦାୟୀ ?

ଯେତେବେଳେ ବଲିଉଡର ଅନ୍ୟତମ ଚର୍ଚ୍ଚିତ ଯୋଡ଼ି କରିସ୍ମା କପୁର ଓ ଅଭିଷେକ ବଚ୍ଚନଙ୍କ ସମ୍ପର୍କ କାହିଁକି ଭାଙ୍ଗିଥିଲା ବୋଲି ଦର୍ଶନଙ୍କୁ ପ୍ରଶ୍ନ କରାଯାଇଥିଲା, ସେତେବେଳେ ସେ କାହାକୁ ବି ଦୋଷ ଦେଇନଥିଲେ । ସେ କହିଥିଲେ ଯେ ଲୋକେ ଏହି ସମ୍ପର୍କ ଭାଙ୍ଗିବା ପାଇଁ ବବିତାଜୀ, ଜୟାଜୀ, କରିସ୍ମା ଓ ଅଭିଷେକଙ୍କୁ ଦୋଷ ଦିଅନ୍ତି, ମାତ୍ର ଏପରି ନିଷ୍ପତ୍ତି ଭାଗ୍ୟ ଉପରେ ଛାଡ଼ିଦେବା ଆବଶ୍ୟକ । ସେମାନଙ୍କ ସମ୍ପର୍କ ବେଶ ଭାବନାତ୍ମକ ଥିଲା । ଉଭୟଙ୍କ ମଧ୍ୟରେ ମତଭେଦ ଥିଲା ବୋଲି କହିଛନ୍ତି ଦର୍ଶନ ।

ପଢନ୍ତୁ ଏହି ଖବର: ୬୭ ବର୍ଷରେ ପାଦ ଥାପିଲେ ସଞ୍ଜୟ ଦତ୍ତ, ଜୀବନରେ ଅନେକ ଉଥାନ-ପତନର ହୋଇଛନ୍ତି ସମ୍ମୁଖୀନ

ସୂଚନା ଥାଉ କି, କରିସ୍ମା ଓ ଅଭିଷେକ ୨୦୦୨ରେ ନିର୍ବନ୍ଧ କରିଥିଲେ । ଉଭୟ ଅମିତାଭ ବଚ୍ଚନଙ୍କ ୬୦ତମ ଜନ୍ମଦିନ ଅବସରରେ ସମ୍ପର୍କକୁ ସାର୍ବଜନୀନ କରିଥିଲେ । ମାତ୍ର କିଛି ମାସ ପରେ ଅର୍ଥାତ ୨୦୦୩ ମସିହା ଆରମ୍ଭରୁ ଉଭୟଙ୍କ ସମ୍ପର୍କ ଭାଙ୍ଗିଯାଇଥିଲା । ଉଭୟ ପରିବାର ଏହା ପଛରେ କଣ ପ୍ରକୃତ କାରଣ ତାହା କହିନଥିଲେ । କୁହାଯାଏ ଉଭୟ ପରିବାର ମଧ୍ୟରେ ମତଭେଦ ଯୋଗୁଁ ଏହି ସମ୍ପର୍କ ଆଗକୁ ବଢିପାରିନଥିଲା ।