ବଲିଉଡର ପ୍ରତିଷ୍ଠିତ ଅଭିନେତ୍ରୀ ସୋନାଲି ବେନ୍ଦ୍ରେଙ୍କ ନାଁରେ ଠକେଇ ଅଭିଯୋଗ । ଅଭିନେତ୍ରୀ ଓ ତାଙ୍କ ସ୍ଵାମୀ ଗୋଲ୍ଡିଙ୍କ ବିରୁଦ୍ଧରେ ଜମିଜମା ଠକେଇ ଅଭିଯୋଗ କରିଛନ୍ତି ପୁଣେର ଜଣେ ଚାଷୀ । ପୁଣେର ମାଭଲଠାରେ ପ୍ରାୟ ୩୦ ଗୁଣ୍ଠ ଜମି ଅଭିନେତ୍ରୀ ଠକେଇ କରିଥିବା ଅଭିଯୋଗ ଆସିବା ପରେ ମୁହଁ ଖୋଲିଛନ୍ତି ସୋନାଲି । ସେ ଏହି ଅଭିଯୋଗକୁ ସମ୍ପୂର୍ଣ୍ଣ ଭାବେ ଖଣ୍ଡନ କରିଥିବାବେଳେ ତାଙ୍କ ନାଁ କୌଣସି ଜମି ବିକ୍ରି କାଗଜପତ୍ରରେ ନାହିଁ ବୋଲି କହିଛନ୍ତି ।

ସ୍ଥାନୀୟ ଚାଷୀ ଚନ୍ଦ୍ରକାନ୍ତ ସିନ୍ଦେ ଅଭିଯୋଗ କରିଛନ୍ତି ଯେ ତାଙ୍କ ପରିବାରର ଜମି ଉପରେ ପୈତୃକ ଅଧିକାର ଅଛି, ଯାହାକୁ ୧୯୫୭ ମସିହାରୁ ଗୋଲ୍ଡି ବେହଲ କିଣିଥିଲେ ଏବଂ ଏହି ଅଧିଗ୍ରହଣ ବେଆଇନ ଭାବରେ କରାଯାଇଥିଲା । ଚାଷୀ ଜଣକ ଏହି ମାମଲା ସମ୍ପର୍କରେ ଭାଡଗାଓଁ ମାଭାଲର ସିଭିଲ୍ କୋର୍ଟରେ ଏକ ଆବେଦନ ଦାଖଲ କରିଛନ୍ତି ।

• କଣ ପୁରା ଘଟଣା ?

ଅଭିଯୋଗକାରୀ ଚନ୍ଦ୍ରକାନ୍ତ ସିନ୍ଦେ ଏବଂ ତାଙ୍କ ପରିବାର ଦାବି କରିଛନ୍ତି ଯେ ୧୯୫୭ ପୂର୍ବରୁ ଉକ୍ସାନରେ ଅବସ୍ଥିତ ପ୍ରାୟ ୩୨,୦୦୦ ବର୍ଗଫୁଟ ପରିମିତ ୩୦ ଗୁଣ୍ଠା ଜମି ଉପରେ ସେମାନଙ୍କର ଆଇନଗତ ଅଧିକାର ଥିଲା । ସମ୍ପୃକ୍ତ ଜମିରେ ବେଆଇନ ନିର୍ମାଣ କରିବାକୁ ଚେଷ୍ଟା କରାଯାଇଥିଲା ଏବଂ ତାଙ୍କ ପରିବାରକୁ ଧମକ ଦିଆଯାଇଥିଲା । ପୋଲିସରେ ଏକ ଆନୁଷ୍ଠାନିକ ଅଭିଯୋଗ କରାଯାଇଥିଲା ।

ପଢନ୍ତୁ ଏହି ଖବର: ସୁନା ଚେନକୁ ନେଇ ବିବାଦ; କ୍ରିକେଟରଙ୍କ ଅଭିଯୋଗରେ ବନ୍ଧା ହେଲେ ଅଭିନେତ୍ରୀ

ହେଲେ ଏହି ବିବାଦଟି ଏକ ଦେୱାନୀ ମାମଲା ହୋଇଥିବାରୁ ପରବର୍ତ୍ତୀ ସମୟରେ କୋର୍ଟକୁ ନିଆଗଲା । ଏହି ଜମି ଉପରେ ସ୍ଥଗିତାଦେଶ ପାଇଁ ଚାଷୀ କୋର୍ଟଙ୍କୁ ଅନୁରୋଧ କରିଛନ୍ତି । ଚନ୍ଦ୍ରକାନ୍ତ ସିନ୍ଦେ ଏହି ମାମଲାରେ ସୋନାଲି ବେନ୍ଦ୍ରେ, ଗୋଲ୍ଡୀ ବହଲ ଏବଂ ଅନ୍ୟ ଦୁଇ ଜଣଙ୍କୁ ପକ୍ଷଭୁକ୍ତ କରିଛନ୍ତି ।

• ଅଭିଯୋଗର ଜବାବ ରଖିଲେ ଅଭିନେତ୍ରୀ

ସୋନାଲି ବେନ୍ଦ୍ରେ ଏବଂ ତାଙ୍କ ଓକିଲ ଏହି ଅଭିଯୋଗଗୁଡ଼ିକୁ ଖଣ୍ଡନ କରିଛନ୍ତି । ଅଭିନେତ୍ରୀ ଦାବି କରିଛନ୍ତି ଯେ ତାଙ୍କ ନାମ କୌଣସି ସରକାରୀ କାଗଜପତ୍ର କିମ୍ବା ଜମି ବିକ୍ରୟ-କ୍ରୟ କାଗଜପତ୍ରରେ ନାହିଁ । ଏହି ଅଭିଯୋଗଗୁଡ଼ିକ ସମ୍ପୂର୍ଣ୍ଣ ଭିତ୍ତିହୀନ ଏବଂ କେବଳ ଟଙ୍କା ଆଦାୟ ଉଦ୍ଦେଶ୍ୟରେ କରାଯାଉଛି । ଅଭିନେତ୍ରୀଙ୍କ ଓକିଲ ରାଜୁ ସିନ୍ଦେ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ ଏହି ଚାଷୀ ଜଣକ ପୂର୍ବରୁ ଏହି ଘଟଣାକୁ ନେଇ ସରକାରୀ ବିଭାଗଗୁଡ଼ିକରେ ବିଶେଷକରି ତହସିଲଦାର ଏବଂ ସବ ଡିଭିଜନାଲ ଅଫିସର (SDO)ଙ୍କ ନିକଟରେ ଅନେକ ଥର ଆବେଦନ କରିଥିଲେ, ଯାହାକୁ କୋର୍ଟ ଖାରଜ କରିଦେଇଛନ୍ତି । ଏହି ମାମଲାରେ କୋର୍ଟରେ ପରବର୍ତ୍ତୀ ଶୁଣାଣି ଆସନ୍ତା ଏପ୍ରିଲ ୨୦ ତାରିଖରେ ହେବ ।