Udit Narayan In Trouble / 'ମୋ ଅନୁମତି ବିନା ଗର୍ଭାଶୟ ବାହାର କରିଥିଲେ'; ଉଦିତ ନାରାୟଣଙ୍କ ବିରୋଧରେ ସାଙ୍ଘାତିକ ଅଭିଯୋଗ

ପୁଣି ଥରେ ଚର୍ଚ୍ଚାରେ ବଲିଉଡ ପ୍ଲେବ୍ୟାକ୍ ସିଙ୍ଗର ଉଦିତ ନାରାୟଣ । ଗାୟକଙ୍କ ବିରୋଧରେ ସାଙ୍ଘାତିକ ଅଭିଯୋଗ ଆଣିଛନ୍ତ ପ୍ରଥମ ପତ୍ନୀ ରଞ୍ଜନା ନାରାୟଣ ଝା । ସେ ଅଭିଯୋଗ କରିଛନ୍ତି ଯେ ଉଦିତ ତାଙ୍କ ଅନୁମତି ନ ନେଇ ତାଙ୍କ ଶରୀରରୁ ଗର୍ଭାଶୟ (Uterus)କୁ ବାହାର କରିଦେଇଥିଲେ । ସେ ପ୍ରାୟ ୩୧ ବର୍ଷ ପରେ ଉଦିତଙ୍କ ବିରୋଧରେ ଏହି ଅଭିଯୋଗ ଆଣିଛନ୍ତି ।

ରଞ୍ଜନା ବିହାର ସୁପୌଲ ମହିଳା ଥାନାରେ ଏହି ଅଭିଯୋଗ କରିଛନ୍ତି । ତାଙ୍କ ଅଭିଯୋଗ ଅନୁସାରେ, ଉଦିତଙ୍କ ଦୁଇ ଭାଇ ଓ ଦ୍ଵିତୀୟ ପତ୍ନୀ ଦୀପା ଚିକିତ୍ସା ବାହାନାରେ ତାଙ୍କୁ ହସ୍ପିଟାଲ ନେଇ ଯାଇଥିଲେ । ଏହାପରେ ଦିଲ୍ଲୀର ଏକ ହସ୍ପିଟାଲରେ ତାଙ୍କର ଅପରେସନ କରାଯାଇଥିଲା । ଏହି ଅଭିଯୋଗ ଫେବୃଆରୀ ୧୦ ତାରିଖରେ କରାଯାଇଥିଲା । ରଞ୍ଜନା କହିଛନ୍ତି ଯେ ୧୯୯୬ ମସିହାରେ ତାଙ୍କର ଗର୍ଭାଶୟକୁ କାଢି ଦିଆଯାଇଥିଲା, କିନ୍ତୁ ନିକଟରେ ତାଙ୍କୁ ଏହି ବିଷୟରେ ଜଣାପଡ଼ିଛି । ଯେତେବେଳେ ସେ ଆଉ ଏକ ଚିକିତ୍ସା ପାଇଁ ଡାକ୍ତରଙ୍କୁ ପାଖକୁ ଯାଇଥିଲେ, ସେତେବେଳେ ତାଙ୍କ ଗର୍ଭାଶଯ ନଥିବା କହିଥିଲେ ଡାକ୍ତର ।

• କିଏ ଉଦିତଙ୍କ ପ୍ରଥମ ପତ୍ନୀ ?

ଉଦିତ ୧୯୮୫ ମସିହାରେ ବର୍ତ୍ତମାନର ପତ୍ନୀ ଦୀପାଙ୍କୁ ମୁମ୍ବାଇରେ ବିବାହ କରିଥିଲେ । କିନ୍ତୁ ଏହାର ଗୋଟିଏ ବର୍ଷ ପୂର୍ବରୁ ସେ ରଞ୍ଜନାଙ୍କୁ ପ୍ରଥମେ ବିବାହ କରିଥିଲେ । ରଞ୍ଜନା ସୁପୌଲର ବଲୁଆ ବଜାରର ଅଧିବାସୀ । ରଞ୍ଜନା ଉଦିତଙ୍କୁ ସେତେବେଳେ ବିବାହ କରିଥିଲେ ଯେତେବେଳେ ଉଦିତ ବଲିଉଡରେ ସଂଘର୍ଷ କରୁଥିଲେ । ବିବାହ ପରେ ଉଭୟ ବିହାରରେ ସାଥୀରେ ରହିଥିଲେ । ପରବର୍ତ୍ତୀ ସମୟରେ ଉଦିତ ମୁମ୍ଵାଇ ଯାଇ ବଲିଉଡରେ କ୍ୟାରିଅର ଆରମ୍ଭ କରିଥିଲେ । ଏହାପରେ ସେ ୧୯୮୫ ମସିହାରେ ରଞ୍ଜନାଙ୍କୁ ଛାଡ଼ପତ୍ର ଦେଇ ଦୀପାଙ୍କୁ ଦ୍ଵିତୀୟ ବିବାହ କରିଥିଲେ । ରଞ୍ଜନାଙ୍କୁ ଏବେ ୬୧ ବର୍ଷ ବୟସ । ସେ ବିହାରରେ ଏକାକୀ ରହୁଛନ୍ତି । ରଞ୍ଜନାଙ୍କୁ ଉଦିତଙ୍କଠାରୁ କୌଣସି ସନ୍ତାନ ନାହିଁ । କିନ୍ତୁ ଦୀପାଙ୍କଠାରୁ ଉଦିତଙ୍କ ଗୋଟିଏ ପୁଅ ଅଛନ୍ତି ।

ପଢନ୍ତୁ ଏହି ଖବର: ଇନ୍ଦିରା ଗାନ୍ଧୀଙ୍କ ଲୁକ୍ ନେଇ ଫସିଲେ ଅଭିନେତ୍ରୀ କଙ୍ଗନା ରାଣାଓ୍ୱତ?

• ପୂର୍ବରୁ କେସ୍ କରିଥିଲେ ରଞ୍ଜନା

ଉଦିତଙ୍କ ପ୍ରଥମ ପତ୍ନୀ ରଞ୍ଜନା ଭରଣପୋଷଣ ଦେବା ଲାଗି ତାଙ୍କ ବିରୋଧରେ ଥାନାର ଦ୍ଵାରସ୍ଥ ହୋଇଥିଲେ । ଏପରିକି ଉଦିତ ତାଙ୍କୁ ଘରୁ ବାହାର କରିଦେଇଥିବା ଅଭିଯୋଗ କରିଥିଲେ । ଏହି ଘଟଣାରେ ଉଦିତ ସୁପୌଲ ପରିବାର ଅଦାଲତରେ ହାଜର ହୋଇଥିଲେ । ଶୁଣାଣି ସମୟରେ ଉଦିତ ବୁଝାମଣା ପାଇଁ ଆଦୌ ରାଜି ହୋଇନଥିଲେ । ଏହା ବଦଳରେ ସେ କେସ୍ ଲଢିବା ଲାଗି ବାହାରିଥିଲେ । କିନ୍ତୁ ପରବର୍ତ୍ତୀ ସମୟରେ ଭରଣପୋଷଣ କରିବା ପାଇଁ ରାଜି ହୋଇଥିଲେ ।

ଏହି ଅଭିଯୋଗ ପତ୍ରରେ ରଞ୍ଜନା କହିଥିଲେ ଯେ ଉଦିତ ତାଙ୍କୁ ବିହାରରେ ଛାଡ଼ି ଦେଇଛନ୍ତି । ଯେତେବେଳେ ସେ ତାଙ୍କୁ ଭେଟିବା ଲାଗି ମୁମ୍ଵାଇ ଯାଆନ୍ତି, ସେତେବେଳେ କିଛି ଲୋକ ତାଙ୍କର ପିଛା କରନ୍ତି । ଏପରିକି ନେପାଳରେ ଏକ ସମ୍ପତ୍ତି ବିକିବା ପରେ ତାଙ୍କୁ ୧୮ ଲକ୍ଷ ଟଙ୍କା ଦିଆଯାଇନଥିବା ସେ ଅଭିଯୋଗ କରିଥିଲେ । ରଞ୍ଜନା ତାଙ୍କୁ ଉଦିତଙ୍କ ଆଇନ ଅନୁଯାୟୀ ପତ୍ନୀ ବୋଲି କହିବା ସହ ନିଜର ଅଧିକାର ମାଗିଛନ୍ତି । ଏପରିକି ଅସୁସ୍ଥତା ଯୋଗୁଁ ତାଙ୍କ ସହିତ ରହିବାକୁ ଇଚ୍ଛା ପ୍ରକାଶ କରିଛନ୍ତି ।