ପୂର୍ବ ଅଭିନେତ୍ରୀ ତଥା ଅଭିନେତା ଜାୟଦ ଖାନଙ୍କ ମାଆ ଜରିନ ଖାନଙ୍କ ଗତବର୍ଷ ମୁମ୍ବାଇ ସ୍ଥିତ ବାସଭବନରେ ମୃତ୍ୟୁ ହୋଇଥିଲା । ଏହାପରେ ପୁଅ ଜାୟଦ ହିନ୍ଦୁ ରୀତିନୀତି ଅନୁସାରେ ତାଙ୍କର ଅନ୍ତିମ ସଂସ୍କାର କରିଥିଲେ, ଯାହାର ଭିଡିଓ ସୋସିଆଲ ମିଡିଆରେ ଖୁବ ଭାଇରାଲ ହୋଇଥିଲା । ତେବେ ସେ ମୁସଲିମ ହୋଇ କାହିଁକି ହିନ୍ଦୁ ପରମ୍ପରା ଅନୁସାରେ ଅନ୍ତିମ ସଂସ୍କାର କରୁଛନ୍ତି ବୋଲି ଅନେକ ପ୍ରଶ୍ନ କରିଥିଲେ । ଏବେ ଅଭିନେତା ଏହା ଉପରେ ନିଜର ପ୍ରତିକ୍ରିୟା ରଖିଛନ୍ତି।

ନିକଟରେ ଏକ ସାକ୍ଷାତକାରରେ ଜାୟଦ ଖାନ ନିଜ ମାଆ ଜରିନ ଖାନଙ୍କ ଶେଷ ଇଚ୍ଛାର ଖୁଲାସା କରିବା ସମୟରେ ଭାବବିହ୍ଵଳ ହୋଇପଡ଼ିଥିଲେ । ଏହାସହିତ ମାଆ ଜରିନ ଖାନ ମୁସଲିମ ପରିବାରରେ ବିବାହ କରିବା ସହ ପାର୍ସୀ ବଂଶର ହେବା ସତ୍ତ୍ଵେ କାହିଁକି ହିନ୍ଦୁ ରୀତିନୀତିରେ ନିଜର ଅନ୍ତିମ ସଂସ୍କାର ଚାହୁଁଥିଲେ, ତାର ମଧ୍ୟ ଖୁଲାସା କରିଛନ୍ତି ।

• 'ଆମ ଘରେ ମାନବିକତା ସର୍ବୋପରି'

ଜାୟଦ କହିଛନ୍ତି ଯେ ଘରେ ମାନବିକତାକୁ ସବୁଠୁ ଉପରେ ରଖାଯାଏ । ସେ ଏହା ମଧ୍ୟ କହିଛନ୍ତି ଯେ ତାଙ୍କ ଘରେ କାମ କରୁଥିବା କର୍ମଚାରୀମାନେ ବିଭିନ୍ନ ଧର୍ମରୁ ଆସନ୍ତି । ସେମାନେ ତାଙ୍କ ପରିବାରର ଖାଇବାଠୁ ଆରମ୍ଭ କରି ସବୁ ପ୍ରକାର ଧ୍ୟାନ ରଖନ୍ତି । ଧର୍ମକୁ ନେଇ ତାଙ୍କ ଘରେ କୌଣସି ଭେଦଭାବ ନାହିଁ ବୋଲି ସେ ସ୍ପଷ୍ଟ କରିଥିଲେ । ତାଙ୍କ ପରିବାର ଏକ ଧର୍ମନିରପେକ୍ଷ ପରିବାର ବୋଲି କହିଛନ୍ତି ଅଭିନେତା ।

• କଣ ଥିଲା ଜରିନ ଖାନଙ୍କ ଶେଷ ଇଚ୍ଛା ?

ଅଭିନେତା ଜାୟଦ ଖାନ ନିଜ ମାଆଙ୍କ ଶେଷ ଇଚ୍ଛାର ଖୁଲାସା କରି କହିଥିଲେ ଯେ ଏକଦା ସେ ମାଆଙ୍କ ସହିତ ଏକ ସୁନ୍ଦର ନଦୀକୂଳରେ ବସିଥିଲେ । ଠିକ୍ ଏହି ସମୟରେ ଜରିନ କହିଥିଲେ ଯେ ଯଦି ସେ ମରିଯାଆନ୍ତି, ତେବେ ତାଙ୍କର ଅସ୍ଥି ବିସର୍ଜନ ଏହି ନଦୀରେ କରାଯାଉ । ସେ ମୁକ୍ତ ହେବାକୁ ଚାହୁଁଥିଲେ ବୋଲି କହିଥିଲେ । ଅଭିନେତା ନିଜ ମାଆଙ୍କ ଏହି ଇଚ୍ଛାକୁ ପୂରଣ କରିବା ଲାଗି ହିନ୍ଦୁ ରୀତିନୀତିରେ ଅନ୍ତିମ ସଂସ୍କାର କରିଥିଲେ ଓ ନଦୀରେ ଅସ୍ଥି ବିସର୍ଜନ କରିଥିଲେ । ତେବେ ଦୁନିଆ ଏହାକୁ ନେଇ ଯାହା କହିଲେ ବି ତାଙ୍କୁ କୌଣସି ଫରକ ପଡେନି ବୋଲି ଅଭିନେତା କହିଛନ୍ତି ।

ପଢନ୍ତୁ ଏହି ଖବର: ଫେରାରି ​​ଠାରୁ ଆରମ୍ଭ କରି ଡିଫେଣ୍ଡର ପର୍ଯ୍ୟନ୍ତ, ଗୋଟିଏ ମାସରେ ତିନୋଟି କାର: ପ୍ରଥମେ ପୁଅ ଏବେ ପ୍ରେମିକା

• କିଏ ଜରିନ ଖାନ ?

ଜରିନ ୧୯୬୩ ମସିହାରେ ରିଲିଜ ହୋଇଥିବା ଫିଲ୍ମ 'ତେରେ ଘର କେ ସାମନେ'ରେ ଦେବ ଆନନ୍ଦଙ୍କ ସହିତ ଅଭିନୟ କରିଥିଲେ । ୧୯୬୦ ମସିହାରେ ସେ ଅଭିନେତା ସଞ୍ଜୟ ଖାନଙ୍କୁ ଭେଟିଥିଲେ ଓ ୧୯୬୬ ମସିହାରେ ତାଙ୍କୁ ବିବାହ କରିଥିଲେ । ଜରିନ ଓ ସଞ୍ଜୟଙ୍କ ୪ଟି ସନ୍ତାନ ପୁଅ ଜାୟଦ ଖାନ ଓ ଝିଅ ସୁଜୈନ (ଲୋକପ୍ରିୟ ବଲିଉଡ ଅଭିନେତା ହ୍ରିତିକ ରୋଶନଙ୍କ ପୂର୍ବ ପତ୍ନୀ), ଫରାହ ଓ ସିମୋନ ଅଛନ୍ତି । ଜରିନ ଓ ସଞ୍ଜୟ ଗତବର୍ଷ ଏପ୍ରିଲରେ ୫୯ତମ ବିବାହ ବାର୍ଷିକୀ ପାଳନ କରିଥିଲେ । ନଭେମ୍ବର ୭ରେ ଜରିନ ଖାନଙ୍କ ୮୧ ବର୍ଷ ବୟସରେ ବାର୍ଦ୍ଧକ୍ୟ ଜନିତ ସମସ୍ୟା ଯୋଗୁଁ ମୃତ୍ୟୁ ଘଟିଥିଲା ।