Gold Price Today / ୧୨ ଦିନରେ ସୁନା ୧୨ ହଜାର ମହଙ୍ଗା, ରୁପା ଦାମ୍ ବଢ଼ିଲା ୨୨ ହଜାର

ସୁନା-ରୁପା କିଣିବାକୁ ଚାହୁଁଥିଲେ ଏହି ଖବର ଆପଣଙ୍କ ପାଇଁ ବେଶ୍‌ ଗୁରୁତ୍ବପୂର୍ଣ୍ଣ । ଆମେରିକା-ଇରାନ ମଧ୍ୟରେ ପୁଣି ତେଜିଲା ବିବାଦ, ବଢ଼ିଲା ଜିଓ-ପଲିଟିକାଲ୍ ଟେନସନ୍ । ଆଉ ଏହାର ପ୍ରଭାବ ସିଧାସଳଖ ଦେଖିବାକୁ ମିଳିଛି ମୂଲ୍ୟବାନ ଧାତୁ ବଜାରରେ । ଏହି ମାସରେ ସୁନା ପ୍ରାୟ ୧୨ ହଜାର ଟଙ୍କା ବଢ଼ିଥିବା ବେଳେ ଏବଂ ରୁପା ୨୨ ହଜାର ଟଙ୍କା ମହଙ୍ଗା ହୋଇସାରିଲାଣି ।

ଆମେରିକା ଓ ଇରାନ ମଧ୍ୟରେ ପୁଣିଥରେ ବିବାଦ ତୀବ୍ର ହେବାରୁ ଗ୍ଲୋବାଲ୍ ମାର୍କେଟରେ ଅସ୍ଥିରତା ବଢ଼ିଛି । ଜିଓ-ପଲିଟିକାଲ୍ ଟେନସନ୍ ବଢ଼ିବାର ପ୍ରଭାବ ଏବେ ସିଧାସଳଖ ସୁନା ଓ ରୁପା ବଜାର ଉପରେ ପଡ଼ିଛି । ଏହି ଦୁଇଟି ମୂଲ୍ୟବାନ ଧାତୁର ଦାମ୍ ଲଗାତାର ବଢ଼ିଚାଲିଛି ।

ଚଳିତ ମାସରେ ମଲ୍ଟି କମୋଡିଟି ଏକ୍ସଚେଞ୍ଜ୍ (MCX) ରେ ସୁନା ଦାମ୍ ପ୍ରାୟ ୧୨ ହଜାର ଟଙ୍କା ବଢ଼ିସାରିଛି । ସେହିପରି ରୁପା ଦାମ୍‌ରେ ମଧ୍ୟ ପ୍ରାୟ ୨୨ ହଜାର ଟଙ୍କା ବୃଦ୍ଧି ହୋଇଛି । ବୁଧବାର MCXରେ ସୁନା ଦାମ୍ ପ୍ରତି ୧୦ ଗ୍ରାମ ପିଛା ୧୨୦୦ ଟଙ୍କା ବଢ଼ି ୧ ଲକ୍ଷ ୫୪ ହଜାର ୯୬୪ ଟଙ୍କାରେ ପହଞ୍ଚିଛି । ଅନ୍ୟପଟେ, ରୂପା ଦାମ୍ ପ୍ରତି କିଲୋଗ୍ରାମ ପିଛା ୩୬୯୨ ଟଙ୍କା ବଢ଼ି ୨ ଲକ୍ଷ ୩୯ ହଜାର ୩୫୧ ଟଙ୍କାରେ ପହଞ୍ଚିଛି ।

ଅଧିକ ପଢ଼ନ୍ତୁ: ଆକାଶ ଛୁଇଁଲା ସୁନା ଦର, ୧୦ ସପ୍ତାହରେ ସୁନାର ବଡ଼ ରେକର୍ଡ

ତେବେ ଆଗକୁ ସୁନା ଦାମ୍ ଆହୁରି ବଢ଼ିବ କି ?

୨୦୨୬ ପାଇଁ Axis Direct ପୂର୍ବରୁ MCX Goldର ଟାର୍ଗେଟ୍ ୧ ଲକ୍ଷ ୪୦ ହଜାରରୁ ୧ ଲକ୍ଷ ୪୫ ହଜାର ଟଙ୍କା ପ୍ରତି ୧୦ ଗ୍ରାମ ରଖିଥିଲା । କିନ୍ତୁ ସୁନା ଏହି ସ୍ତରକୁ ମଧ୍ୟ ଅତିକ୍ରମ କରିସାରିଛି । ବିଶେଷଜ୍ଞଙ୍କ ଟେକ୍ନିକାଲ୍ ଆନାଲିସିସ୍ ଅନୁସାରେ, ଯଦି ବଜାରରେ ଏହି ଜୋରଦାର ବୃଦ୍ଧି ଜାରି ରହେ, ତେବେ ସୁନା ଦାମ୍ ୧ ଲକ୍ଷ ୬୦ ହଜାର ଟଙ୍କା ଉପରକୁ ଯାଇପାରେ ।

ସେହିପରି ରୁପାକୁ ନେଇ ମଧ୍ୟ ବଡ଼ ଆକଳନ କରାଯାଉଛି । ମୋତିଲାଲ୍ ଓସୱାଲ୍ ୨୦୨୬ ଶେଷ ସୁଦ୍ଧା ରୂପା ଦାମ୍ ୩ ଲକ୍ଷ ୨୦ ହଜାର ଟଙ୍କା ପହଞ୍ଚିବାର ଟାର୍ଗେଟ୍ ରଖିଛି । ଅନ୍ତର୍ଜାତୀୟ ବଜାରକୁ ନେଇ ରଏଟର୍ସର ରିପୋର୍ଟ ଅନୁସାରେ, ଗୋଲ୍ଡ ପ୍ରତି ଆଉନ୍ସ ୪,୫୦୯ ଡଲାର ପର୍ଯ୍ୟନ୍ତ ଯାଇପାରେ । ସେହିପରି ରୁପା ପ୍ରତି ଆଉନ୍ସ ୭୨ ଡଲାରର ସ୍ତର ଭାଙ୍ଗିପାରେ ।

ବଜାର ବିଶେଷଜ୍ଞଙ୍କ ମତରେ, ସୁନା ଓ ରୁପା ଦାମ୍ ବଢ଼ିବାର ମୁଖ୍ୟ କାରଣ ହେଉଛି ବିଶ୍ୱରେ ବଢ଼ୁଥିବା ଜିଓ-ପଲିଟିକାଲ୍ ଟେନସନ୍। ଏହା ସହ ଆମେରିକୀୟ ଫେଡେରାଲ୍ ରିଜର୍ଭ ସୁଧହାର ସ୍ଥିର ରଖିବା ଏବଂ ଡଲାରରେ ଦୁର୍ବଳତା ମଧ୍ୟ ସୁନା-ରୁପାକୁ ଦର ବୃଦ୍ଧି କରିବାରେ ସମର୍ଥନ ଦେଉଛି । ଏବେ ପ୍ରଶ୍ନ ହେଉଛି—ବିଶ୍ୱ ବଜାରରେ ଅସ୍ଥିରତା ଏଭଳି ଜାରି ରହିଲେ, ସୁନା ଓ ରୁପା ଦାମ୍ ଆଉ କେତେ ଉପରକୁ ଯିବ ?