Gold Price Today / ଅଗଷ୍ଟରେ ୧୦ ହଜାରରୁ ଅଧିକ ବଢ଼ିଲା ସୁନା ଦର, ରୁପା ୩୨ ହଜାର ମହଙ୍ଗା

ସୁନା-ରୁପା କିଣିବାକୁ ଚାହୁଁଥିବା ଲୋକଙ୍କ ପାଇଁ ବଡ଼ ଖବର । ବର୍ଷର ଆରମ୍ଭରେ ରେକର୍ଡ ଦର ଛୁଇଁବା ପରେ ଦର କିଛି ମାସ ଧରି ତଳକୁ ଖସିଥିଲା । କିନ୍ତୁ ଅଗଷ୍ଟରେ ପୁଣି ଦୁଇ ମୂଲ୍ୟବାନ ଧାତୁର ଦର ଦ୍ରୁତ ଗତିରେ ବଢ଼ୁଛି । ମାତ୍ର ୨୦ ଦିନରେ ରୁପା ପ୍ରତି କିଲୋଗ୍ରାମରେ ପ୍ରାୟ ୩୨ ହଜାର ଟଙ୍କା ଏବଂ ସୁନା ପ୍ରତି ୧୦ ଗ୍ରାମରେ ପ୍ରାୟ ୧୦ ହଜାର ଟଙ୍କା ମହଙ୍ଗା ହୋଇଛି ।

ଜାନୁଆରୀ ୨୯ ତାରିଖରେ ସୁନା ପ୍ରତି ୧୦ ଗ୍ରାମ ୧.୭୬ ଲକ୍ଷ ଟଙ୍କାର ରେକର୍ଡ ସ୍ତରରେ ପହଞ୍ଚିଥିଲା । ସେହି ସମୟରେ ରୁପାର ଦର ମଧ୍ୟ ପ୍ରତି କିଲୋଗ୍ରାମ ୩.୮୬ ଲକ୍ଷ ଟଙ୍କା ଛୁଇଁଥିଲା । ତେବେ ଫେବ୍ରୁଆରୀରୁ ଜୁଲାଇ ମଧ୍ୟରେ ବିଶ୍ୱ ବଜାରର ପରିବର୍ତ୍ତନ ଏବଂ ଆମେରିକାର ଫେଡେରାଲ୍ ରିଜର୍ଭର ନିଷ୍ପତ୍ତି ପ୍ରଭାବରେ ଦରରେ ବଡ଼ ହ୍ରାସ ଦେଖିବାକୁ ମିଳିଥିଲା । ଜୁଲାଇ ଶେଷ ସୁଦ୍ଧା ସୁନା ପ୍ରତି ୧୦ ଗ୍ରାମ ପ୍ରାୟ ୧.୪୨ ଲକ୍ଷ ଟଙ୍କାକୁ ଖସିଥିଲା ।
ଏବେ ଅଗଷ୍ଟରେ ପୁଣି ବଦଳିଛି ପରିସ୍ଥିତି । ଆମେରିକା-ଇରାନ ମଧ୍ୟରେ ବଢ଼ିଥିବା ବିବାଦ ଏବଂ ଡଲାର ଇଣ୍ଡେକ୍ସରେ ହ୍ରାସ ଯୋଗୁଁ ନିବେଶକମାନେ ସୁନା-ରୁପା ଭଳି ସୁରକ୍ଷିତ ସମ୍ପତ୍ତି ଆଡ଼କୁ ମୁହାଁଉଛନ୍ତି । ଫଳରେ ମାତ୍ର ୨୦ ଦିନରେ ରୁପା ପ୍ରତି କିଲୋଗ୍ରାମ ପ୍ରାୟ ୩୨ ହଜାର ଟଙ୍କା ଏବଂ ସୁନା ପ୍ରତି ୧୦ ଗ୍ରାମ ପ୍ରାୟ ୧୦ ହଜାର ଟଙ୍କା ମହଙ୍ଗା ହୋଇଛି ।

ଆଜି ସୁନାର ଦର କେତେ ?

ରବିବାର ଭାରତୀୟ ବୁଲିଅନ୍ ବଜାର ବନ୍ଦ ରହୁଥିବାରୁ ଆଜି ଦର ଶୁକ୍ରବାରର ବନ୍ଦ ଦର ଅନୁସାରେ ରହିଛି । ମୁମ୍ବାଇ, ଚେନ୍ନାଇ, କୋଲକାତା, ବେଙ୍ଗାଲୁରୁ ଓ ହାଇଦ୍ରାବାଦରେ ୨୪ କ୍ୟାରେଟ୍ ସୁନାର ଦର ପ୍ରତି ୧୦ ଗ୍ରାମ ୧,୬୩,୦୯୦ ଟଙ୍କା ରହିଛି । ସେହିପରି ଦିଲ୍ଲୀରେ ଏହା ୧,୬୩,୨୪୦ ଟଙ୍କା ଏବଂ ଅହମଦାବାଦରେ ୧,୬୩,୧୪୦ ଟଙ୍କା ରହିଛି ।

୨୨ କ୍ୟାରେଟ୍ ସୁନାର ଦର ଅନେକ ବଡ଼ ସହରରେ ପ୍ରତି ୧୦ ଗ୍ରାମ ୧,୪୯,୫୦୦ ଟଙ୍କା ରହିଛି । ଦିଲ୍ଲୀରେ ଏହା ୧,୪୯,୬୫୦ ଟଙ୍କା ଏବଂ ଅହମଦାବାଦରେ ୧,୪୯,୫୫୦ ଟଙ୍କା ।

ରୁପାର ଦର ମଧ୍ୟ ଜୋରଦାର

ସୁନା ସହ ରୁପାର ଦର ମଧ୍ୟ ଉପରମୁହାଁ ରହିଛି । ୨୩ ଅଗଷ୍ଟରେ ରୁପାର ଦର ପ୍ରତି କିଲୋଗ୍ରାମ ପ୍ରାୟ ୨,୬୦,୦୦୦ ଟଙ୍କା ରହିଛି । ତେବେ ସହର ଅନୁସାରେ ଦରରେ ସାମାନ୍ୟ ପାର୍ଥକ୍ୟ ହୋଇପାରେ ।

ବର୍ଷ ଆରମ୍ଭରୁ କେତେ ବଢ଼ିଲା ?

୨୦୨୬ ଆରମ୍ଭରୁ ଏପର୍ଯ୍ୟନ୍ତ ସୁନା ଓ ରୁପା ଉଭୟରେ ଭଲ ବୃଦ୍ଧି ହୋଇଛି । ଡିସେମ୍ବର ୩୧, ୨୦୨୫ରେ ୨୪ କ୍ୟାରେଟ୍ ସୁନାର ଦର ପ୍ରତି ୧୦ ଗ୍ରାମ ୧,୩୩,୧୯୫ ଟଙ୍କା ଥିବାବେଳେ ଏବେ ଏହା ପ୍ରାୟ ୧,୬୦,୬୨୦ ଟଙ୍କାକୁ ବଢ଼ିଛି । ଅର୍ଥାତ୍ ପ୍ରାୟ ୨୭,୪୨୫ ଟଙ୍କାର ବୃଦ୍ଧି ହୋଇଛି ।
ସେହିପରି ଡିସେମ୍ବର ୩୧ରେ ରୁପାର ଦର ପ୍ରତି କିଲୋଗ୍ରାମ ୨,୩୦,୪୨୦ ଟଙ୍କା ଥିଲା । ଏବେ ଏହା ପ୍ରାୟ ୨,୪୬,୬୩୦ ଟଙ୍କାରେ ପହଞ୍ଚିଛି। ଅର୍ଥାତ୍ ବର୍ଷ ଆରମ୍ଭରୁ ରୁପା ପ୍ରାୟ ୧୬,୨୧୦ ଟଙ୍କା ମହଙ୍ଗା ହୋଇଛି ।

ଆଗକୁ ଆହୁରି ମହଙ୍ଗା ହେବ କି ?

ବଜାର ବିଶେଷଜ୍ଞଙ୍କ ମତରେ, ଯଦି ବିଶ୍ୱରେ ଭୂ-ରାଜନୈତିକ ବିବାଦ ଜାରି ରହେ ଏବଂ କେନ୍ଦ୍ରୀୟ ବ୍ୟାଙ୍କଗୁଡ଼ିକ ସୁନା କିଣା ଜାରି ରଖନ୍ତି, ତେବେ ଚଳିତ ବର୍ଷ ଶେଷ ସୁଦ୍ଧା ସୁନା ପ୍ରତି ୧୦ ଗ୍ରାମ ୧.୭୦ ଲକ୍ଷ ଟଙ୍କା ଏବଂ ରୁପା ପ୍ରତି କିଲୋଗ୍ରାମ ୩ ଲକ୍ଷ ଟଙ୍କାର ସ୍ତରକୁ ପୁଣି ଛୁଇଁପାରେ ।