Gold Price in India / ୫ ଦିନରେ ୩% ମହଙ୍ଗା ହେଲା ସୁନା, ଏବେ କିଣିବେ ନା ଅପେକ୍ଷା କରିବେ ?

ଭାରତୀୟ ବଜାରରେ ସୁନା ଦରରେ ପୁଣି ଥରେ ବୃଦ୍ଧି ଦେଖିବାକୁ ମିଳିଛି । ଗତ ୫ଟି ବ୍ୟବସାୟିକ ଦିନ ମଧ୍ୟରେ ସୁନା ମୂଲ୍ୟ ପ୍ରାୟ ୩ ପ୍ରତିଶତ ବଢ଼ିଛି । ଲଗାତାର ବଢ଼ୁଥିବା ଦରକୁ ଦେଖି ନିବେଶକଙ୍କ ମନରେ ଏବେ ପ୍ରଶ୍ନ ଉଠୁଛି, ସୁନାରେ ନିବେଶ କରିବାର ଏହା ଉପଯୁକ୍ତ ସମୟ କି ? ନା ବଜାରର ସ୍ଥିତିକୁ ଆଉ କିଛି ଦିନ ଅପେକ୍ଷା କରିବା ଭଲ ?

ବିଶେଷଜ୍ଞଙ୍କ ମତରେ, ମାତ୍ର କିଛି ଦିନର ଦରବୃଦ୍ଧିକୁ ଦେଖି ସୁନା ବଜାରରେ ପୁଣି ଏକ ଦୀର୍ଘମିଆଦୀ ବୃଦ୍ଧି ଆରମ୍ଭ ହୋଇଛି ବୋଲି ଭାବିବା ଠିକ୍ ନୁହେଁ । ତେଣୁ ନିବେଶକମାନେ ଏବେ ସତର୍କତାର ସହ ପଦକ୍ଷେପ ନେବା ଆବଶ୍ୟକ ।

୫ ଦିନରେ ୩% ବଢ଼ିଲା ସୁନା ଦର

ତଥ୍ୟ ଅନୁସାରେ, ୨୦୨୬ ଜାନୁଆରୀ ୧ ତାରିଖରେ ଭାରତରେ ୧୦ ଗ୍ରାମ ସୁନାର ମୂଲ୍ୟ ପ୍ରାୟ ୧,୩୨,୯୪୧ ଟଙ୍କା ଥିଲା । ଯାହା ନଭେମ୍ବର ୬ ସୁଦ୍ଧା ବୃଦ୍ଧି ପାଇ ପ୍ରାୟ ୧,୪୧,୦୩୨ ଟଙ୍କାରେ ପହଞ୍ଚିଛି । ଚଳିତ ବର୍ଷ ଏପର୍ଯ୍ୟନ୍ତ ସୁନା ଦରରେ ପ୍ରାୟ ୬ ପ୍ରତିଶତ ବୃଦ୍ଧି ହୋଇଛି ।
ଅନ୍ୟପକ୍ଷରେ, ୨୦୨୨ ନଭେମ୍ବରରେ ୧୦ ଗ୍ରାମ ସୁନାର ହାରାହାରି ଦର ପ୍ରାୟ ୫୦ ହଜାର ଟଙ୍କା ଥିଲା । ଜାନୁଆରୀ ୨୦୨୬ରେ ଏହା ୧.୭୬ ଲକ୍ଷ ଟଙ୍କାର ସର୍ବୋଚ୍ଚ ସ୍ତର ଛୁଇଁଥିଲା । ଏହାରୁ ସ୍ପଷ୍ଟ ଯେ, ଦୀର୍ଘମିଆଦୀ ନିବେଶ ଭାବେ ସୁନା ଭଲ ରିଟର୍ଣ୍ଣ ଦେଇଛି ।

ଫେଡେରାଲ ରିଜର୍ଭର ନିଷ୍ପତ୍ତି ଉପରେ ନଜର

ଆମେରିକାର ଫେଡେରାଲ ରିଜର୍ଭର ଡିସେମ୍ବର ମାସରେ ସୁଧହାର ବୃଦ୍ଧି କରିବାର ପ୍ରାୟ ୭୦ ପ୍ରତିଶତ ସମ୍ଭାବନା ରହିଥିବା ନେଇ ବଜାରରେ ଆକଳନ କରାଯାଉଛି ।
ଯଦି ଆମେରିକାରେ ସୁଧହାର ବୃଦ୍ଧି ହୁଏ, ତେବେ ନିବେଶକଙ୍କ ପାଇଁ ସୁନା ଅପେକ୍ଷା ସୁଧ ପ୍ରଦାନ କରୁଥିବା ଅନ୍ୟ ନିବେଶ ବିକଳ୍ପ ଅଧିକ ଆକର୍ଷଣୀୟ ହୋଇପାରେ । ଏହାର ପ୍ରଭାବ ସୁନାର ଚାହିଦା ଓ ଦର ଉପରେ ପଡ଼ିପାରେ।

ନିବେଶକ କେଉଁସବୁ ଦିଗ ଉପରେ ନଜର ରଖିବେ ?

ସୁନା ଦର କେବଳ ଚାହିଦା ଓ ଯୋଗାଣ ଉପରେ ନିର୍ଭର କରେ ନାହିଁ । ବିଶ୍ୱ ଅର୍ଥନୀତିର ଅନେକ କାରକ ଏହାକୁ ପ୍ରଭାବିତ କରିଥାଏ । ତେଣୁ ନିବେଶକମାନେ ନିମ୍ନଲିଖିତ ବିଷୟ ଉପରେ ନଜର ରଖିବା ଉଚିତ ।
- ବିଶ୍ୱରେ ଚାଲିଥିବା ଭୂ-ରାଜନୈତିକ ଉତ୍ତେଜନା
- ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର
- ମୁଦ୍ରାସ୍ଫୀତି ବା ମହଙ୍ଗା ଦର
- ଆମେରିକା ଫେଡେରାଲ ରିଜର୍ଭର ସୁଧହାର ନୀତି
- ବଣ୍ଡ ୟିଲ୍ଡର ପରିବର୍ତ୍ତନ
- ଆମେରିକୀୟ ଡଲାରର ମୂଲ୍ୟ
ଏହି ସବୁ କାରକରେ ପରିବର୍ତ୍ତନ ହେଲେ ସୁନା ଦରରେ ଉତ୍ଥାନ-ପତନ ଦେଖାଯାଇପାରେ ।