ଆଫ୍ରିକୀୟ ଦେଶ କାଙ୍ଗୋରେ ଆତଙ୍କ ସୃଷ୍ଟି କରିଥିବା ଇବୋଲା ଭାଇରସ ସାରା ବିଶ୍ଵକୁ ଚିନ୍ତାରେ ପକାଇଛି । ଇବୋଲାର ବିରଳ ତଥା ଘାତକ 'ବୁଣ୍ଡିବୁଗ୍ୟୋ ଷ୍ଟ୍ରେନ'ରେ ସଂକ୍ରମିତ ହୋଇ ଏଯାବତ ୧୧୮ ଜଣଙ୍କ ମୃତ୍ୟୁ ଘଟିଲାଣି । ତେବେ ସଂକ୍ରମିତ ବ୍ୟକ୍ତିଙ୍କୁ ଚିକିତ୍ସା କରୁଥିବା ଆମେରିକା ଡାକ୍ତର ମଧ୍ୟ ଏବେ ଏହି ଭାଇରସର ଶିକାର ପାଲଟିଛନ୍ତି । ଦ୍ରୁତ ଗତିରେ ସଂକ୍ରମଣ ବ୍ୟାପୁଥିବାବେଳେ ମୃତ୍ୟୁ ସଂଖ୍ୟା ମଧ୍ୟ ବଛୁଛି, ଯାହାକୁ ନେଇ ବିଶ୍ଵ ସ୍ଵାସ୍ଥ୍ୟ ସଂଗଠନ (WHO) ଏମରଜେନ୍ସି ଘୋଷଣା କରିଛନ୍ତି ।

ସଦ୍ୟ ସୂଚନା ଅନୁସାରେ, କାଙ୍ଗୋର ଇଟୁରୀ ଓ ନର୍ଥ କିଭ୍ୟୁ ଅଞ୍ଚଳରେ ଏଯାବତ ୩୦୦ରୁ ଅଧିକ ସନ୍ଦିଗ୍ଧ ମାମଲା ଆସିଛି । ସେପଟେ ପଡ଼ୋଶୀ ଦେଶ ଉଗାଣ୍ଡାରେ ବି ଭାଇରସ ଯୋଗୁଁ ଦୁଇ ଜଣଙ୍କର ମୃତ୍ୟୁ ଘଟିଛି । ସ୍ଵାସ୍ଥ୍ୟ ବିଶେଷଜ୍ଞଙ୍କ କହିବାନୁସାରେ, ଏହି ସଂକ୍ରମଣ କିଛି ସପ୍ତାହ ପର୍ଯ୍ୟନ୍ତ ଚିହ୍ନଟ ବିନା ବ୍ୟାପିଥିଲା । ଏହାକୁ ସାଧାରଣ ଜ୍ଵର ଥଣ୍ଡା ଭାବିଥିଲେ ଲୋକେ । ମାତ୍ର ବିରଳ ଭାଇରସ ଚିହ୍ନଟ ହେବା ପରେ ପରିସ୍ଥିତି ଗମ୍ଭୀର ହୋଇସାରିଥିଲା ।

• ଆମେରିକା ଡାକ୍ତର ସଂକ୍ରମିତ

କାଙ୍ଗୋର ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ବାୟୋ-ମେଡିକାଲ ରିସର୍ଚ୍ଚର ମେଡିକାଲ ଡାଇରେକ୍ଟର ଜିନ୍ ଜ୍ୟାକ୍ ମୁୟେମ୍ବେ କହିଛନ୍ତି ଯେ ଇଟୁରୀ ଅଞ୍ଚଳରେ ରାଜଧାନୀ ବୁନିଆରେ ଚିକିତ୍ସା ସମୟରେ ଜଣେ ଆମେରିକୀୟ ଡାକ୍ତର ଇବୋଲାର ଶିକାର ହୋଇଛନ୍ତି । ଆମେରିକୀୟ ସ୍ଵାସ୍ଥ୍ୟ ଅଧିକାରୀ ମଧ୍ୟ ସ୍ପଷ୍ଟ କରିଛନ୍ତି ଯେ ଏହି ସଂକ୍ରମମ ୱାର୍କ-ରିଲେଟେଡ୍ ଏକ୍ସପୋଜର ବା ଚିକିତ୍ସା କରାଇବା ସମୟରେ ରୋଗୀଙ୍କ ସଂସ୍ପର୍ଶରେ ଆସିବା ଯୋଗୁଁ ହୋଇଛି । ଆମେରିକାର ଆଉ ୬ ଜଣଙ୍କୁ ବି ନିରୀକ୍ଷଣରେ ରଖାଯାଇଛି, ଯେଉଁମାନେ ଭାଇରସର ସଂସ୍ପର୍ଶରେ ଆସିଥିବା ସନ୍ଦେହ କରାଯାଉଛି ।

• ସଂକ୍ରମିତଙ୍କ ମଧ୍ୟରେ ୬୦% ମହିଳା

କୋଙ୍ଗାର ବୁନିଆ, ଗୋମା, ମୋଙ୍ଗବବାଲୁ, ବୁଟେମ୍ବୋ ଓ ନ୍ୟାକୁଣ୍ଡେରେ ଏହି ଭାଇରସକୁ ଚିହ୍ନଟ କରାଯାଇଛି । କାଙ୍ଗୋର ସ୍ଵାସ୍ଥ୍ୟମନ୍ତ୍ରୀ ସାମୁଏଲ୍ ରୋଜର କାମ୍ବା କହିଛନ୍ତି ଯେ ସରକାର ୩ଟି ଚିକିତ୍ସା କେନ୍ଦ୍ର ଖୋଲିଛନ୍ତି । ସେପଟେ WHO ପ୍ରଭାବିତ ଅଞ୍ଚଳକୁ ବିଶେଷଜ୍ଞ ଟିମ୍ ଓ ଚିକିତ୍ସା ସାମଗ୍ରୀ ପଠାଇଥିବା କହିଛି । ପ୍ରାୟ ୩୫୦ ସନ୍ଦିଗ୍ଧ ମାମଲା ଥିବାବେଳେ ଅଧିକାଂଶ ରୋଗୀଙ୍କ ବୟସ ୨୦ରୁ ୩୯ ବର୍ଷ ମଧ୍ୟରେ ଅଛି । ସଂକ୍ରମିତଙ୍କ ମଧ୍ୟରୁ ୬୦%ରୁ ଅଧିକ ମହିଳା ଅଛନ୍ତି ।

ପଢନ୍ତୁ ଏହି ଖବର: ଦ୍ରୁତ ଗତିରେ ବ୍ୟାପୁଛି ଏବୋଲା ଭାଇରସ,କୌଣସି ଔଷଧ କିମ୍ବା ଟିକା ସହଜରେ ଉପଲବ୍ଧ ନାହିଁ

• 'ବୁଣ୍ଡିବୁଗ୍ୟୋ ଷ୍ଟ୍ରେନ' କଣ ?

ଏହି ଭାଇରସ ଇବୋଲା ଭାଇରସର ଏକ ବିରଳ ଷ୍ଟ୍ରେନ୍ । ବର୍ଷ ୧୯୭୬ ପରେ କାଙ୍ଗୋ ଓ ଉଗାଣ୍ଡାରେ ଇବୋଲା ଭାଇରସ ୨୦ରୁ ଅଧିକ ଥର ବ୍ୟାପିଛି, କିନ୍ତୁ ଏହା ତୃତୀୟ ଥର ଯେତେବେଳେ ବୁଣ୍ଡିବୁଗ୍ୟୋ ଷ୍ଟ୍ରେନ ବିଷୟରେ ଜଣାପଡ଼ିଛି । ଇବୋଲା ଅଧିକ ସଂକ୍ରାମକ ଓ ଶରୀରର ତରଳ ପଦାର୍ଥ ଯେପରିକି ରକ୍ତ, ବାନ୍ତି, ପୁରୁଷଙ୍କ ଶୁକ୍ରାଣୁ ଦ୍ଵାରା ବ୍ୟାପେ । ଏହି ରୋଗ ବିରଳ, କିନ୍ତୁ ଘାତକ । ଏହି ଭାଇରସ ଦ୍ଵାରା ସଂକ୍ରମିତ ହେଲେ ଜ୍ଵର, ମୁଣ୍ଡବିନ୍ଧା, ମାଂସପେଶୀର ଯନ୍ତ୍ରଣା, ଥକାପଣ, ଦୁର୍ବଳତା, ବାନ୍ତି, ପେଟ ଯନ୍ତ୍ରଣା, ଶରୀରରେ ଆଘାତ ଲାଗିବା ପରି ଦାଗ ହୋଇଥାଏ ।