Health Awareness / ଦେଖିଲେ ଜଣାପଡ଼େ କି HIV ? HIVର ପ୍ରାରମ୍ଭିକ ଲକ୍ଷଣ କ’ଣ? ଜାଣନ୍ତୁ ଜରୁରୀ ତଥ୍ୟ

ହ୍ୟୁମାନ ଇମ୍ୟୁନୋଡେଫିସିଏନ୍ସି ଭାଇରସ୍ ବା HIV ଏକ ଏପରି ଭାଇରସ୍, ଯାହା ମଣିଷର ରୋଗପ୍ରତିରୋଧକ କ୍ଷମତାକୁ ଦୁର୍ବଳ କରିଥାଏ । ଏହା ଫଳରେ ଶରୀର ବିଭିନ୍ନ ସଂକ୍ରମଣ ବିରୋଧରେ ଲଢ଼ିବାର କ୍ଷମତା ହରାଇଥାଏ । ତେବେ ସମୟରେ HIV ଚିହ୍ନଟ ହୋଇ ଚିକିତ୍ସା ଆରମ୍ଭ କରାଗଲେ HIV ସହିତ ମଧ୍ୟ ଜଣେ ବ୍ୟକ୍ତି ସାଧାରଣ ଜୀବନ ବିତାଇପାରନ୍ତି । ସମାଜରେ HIVକୁ ନେଇ ଅନେକ ଭୁଲ ଧାରଣା ରହିଛି । ସେଥିମଧ୍ୟରୁ ଗୋଟିଏ ହେଉଛି କାହାକୁ ଦେଖିଲେ ଜଣାପଡ଼ିଯାଏ ଯେ ସେ HIV ସଂକ୍ରମିତ । କିନ୍ତୁ ଏହା ସତ ନୁହେଁ ।

ଦେଖିଲେ HIV ଚିହ୍ନଟ କରିହେବ କି ?
AIIMS, ନୂଆଦିଲ୍ଲୀର ମେଡିସିନ୍ ବିଭାଗର ପ୍ରଫେସର ଡାକ୍ତର ନୀରଜ ନିଶ୍ଚଲଙ୍କ ଅନୁସାରେ, କେବଳ ଜଣେ ବ୍ୟକ୍ତିଙ୍କୁ ଦେଖି HIV ସଂକ୍ରମଣ ଚିହ୍ନଟ କରିବା ଏକ ମିଥ୍ । HIV ସହିତ ଜୀବନ ବିତାଉଥିବା ଅଧିକାଂଶ ଲୋକ ସମ୍ପୂର୍ଣ୍ଣ ସୁସ୍ଥ ଦେଖାଯାଇପାରନ୍ତି । ବିଶେଷକରି ଯେଉଁମାନେ ନିୟମିତ ଓ ଠିକ୍ ଚିକିତ୍ସା ନେଉଛନ୍ତି, ସେମାନଙ୍କୁ ଦେଖି HIV ରହିଛି ବୋଲି ଅନୁମାନ କରିବା ସମ୍ଭବ ନୁହେଁ ।

କାହାର ଚେହେରା, ଶରୀରର ଗଠନ କିମ୍ବା ବାହ୍ୟ ଦେଖାଶୁଣା ଆଧାରରେ ତାଙ୍କ ସ୍ୱାସ୍ଥ୍ୟ ବିଷୟରେ ନିଷ୍କର୍ଷ କରିବା ଠିକ୍ ନୁହେଁ । ଏଭଳି ଧାରଣା HIV ସହିତ ଜୀବନ ବିତାଉଥିବା ଲୋକଙ୍କ ପ୍ରତି ଭେଦଭାବକୁ ମଧ୍ୟ ବଢ଼ାଇପାରେ ।

HIV ଚିହ୍ନଟ ପାଇଁ କ’ଣ କରିବେ ?
HIV ରହିଛି କି ନାହିଁ ଜାଣିବା ପାଇଁ HIV ଟେଷ୍ଟ କରାଇବା ହିଁ ଉପଯୁକ୍ତ ଉପାୟ । ପରୀକ୍ଷା ପ୍ରକ୍ରିୟା ସରଳ ଏବଂ HIV ପରୀକ୍ଷା ଅନେକ ସରକାରୀ ସ୍ୱାସ୍ଥ୍ୟକେନ୍ଦ୍ରରେ ମାଗଣାରେ ଉପଲବ୍ଧ ହୋଇଥାଏ । ପରୀକ୍ଷା ସମ୍ପର୍କିତ ଗୋପନୀୟତା ମଧ୍ୟ ରକ୍ଷା କରାଯାଏ । ଯଦି କେବେ HIV ପରୀକ୍ଷା କରାଇନାହାନ୍ତି ଏବଂ ଚିନ୍ତାର କାରଣ ଥାଏ, ତେବେ ଡାକ୍ତରଙ୍କ ପରାମର୍ଶ ନେଇ ପରୀକ୍ଷା କରାଇବା ଭଲ ।

HIV ର ପ୍ରାରମ୍ଭିକ ଲକ୍ଷଣ କ’ଣ ?
HIV ସଂକ୍ରମଣର ପ୍ରାରମ୍ଭିକ ପର୍ଯ୍ୟାୟରେ କେତେକ ଲୋକଙ୍କଠାରେ ସାଧାରଣ ଭାଇରାଲ୍ ଇନ୍‌ଫେକ୍ସନ୍ ଭଳି ଲକ୍ଷଣ ଦେଖାଯାଇପାରେ। ଯଥା—
- ଜ୍ୱର
- ମୁଣ୍ଡବିନ୍ଧା
- ଚର୍ମରେ ରାଶ୍
- ଗଳା ଦରଜ

ସଂକ୍ରମଣ ଆଗକୁ ବଢ଼ିଲେ ଶରୀରର ରୋଗପ୍ରତିରୋଧକ କ୍ଷମତା ଧୀରେଧୀରେ ଦୁର୍ବଳ ହୋଇପାରେ । ଏହି ସମୟରେ ଲିମ୍ଫ୍ ନୋଡ୍‌ରେ ଫୁଲା, ଓଜନ କମିବା, ଦୀର୍ଘସ୍ଥାୟୀ ଜ୍ୱର, ଡାଇରିଆ ଓ କାଶ ଭଳି ସମସ୍ୟା ଦେଖାଯାଇପାରେ ।

ଚିକିତ୍ସା ନକଲେ କ’ଣ ହୋଇପାରେ ?
HIVର ଚିକିତ୍ସା ନକରାଗଲେ ରୋଗପ୍ରତିରୋଧକ କ୍ଷମତା ଅତ୍ୟଧିକ ଦୁର୍ବଳ ହୋଇପାରେ ଏବଂ ଗୁରୁତର ସଂକ୍ରମଣ ଓ କିଛି କ୍ୟାନ୍ସରର ଝୁମ୍ପ ବଢ଼ିପାରେ । ଏଥିରେ ଟ୍ୟୁବରକ୍ୟୁଲୋସିସ୍ (TB), କ୍ରିପ୍ଟୋକୋକାଲ୍ ମେନିଞ୍ଜାଇଟିସ୍, ଗୁରୁତର ବ୍ୟାକ୍ଟେରିଆଲ୍ ସଂକ୍ରମଣ ଏବଂ ଲିମ୍ଫୋମା କିମ୍ବା କାପୋସି ସାର୍କୋମା ଭଳି କ୍ୟାନ୍ସର ସାମିଲ ହୋଇପାରେ ।

HIV ରୋଗୀଙ୍କୁ ଦରକାର ସମର୍ଥନ, ଭେଦଭାବ ନୁହେଁ
HIV ସମ୍ପର୍କରେ ସଠିକ୍ ସୂଚନା ଜାଣିବା ଏବଂ ଭୁଲ ଧାରଣାରୁ ଦୂରେଇ ରହିବା ଅତ୍ୟନ୍ତ ଜରୁରୀ । HIV ସହିତ ଜୀବନ ବିତାଉଥିବା ବ୍ୟକ୍ତିଙ୍କୁ ତିରସ୍କାର କିମ୍ବା ଦୂରେଇ ରଖିବା ବଦଳରେ ସମର୍ଥନ, ସମ୍ବେଦନଶୀଳତା ଓ ସମ୍ମାନ ଦେବା ଆବଶ୍ୟକ । ସବୁଠାରୁ ଗୁରୁତ୍ୱପୂର୍ଣ୍ଣ କଥା କେବଳ ଜଣେ ବ୍ୟକ୍ତିଙ୍କୁ ଦେଖି HIV ରହିଛି କି ନାହିଁ କହିହେବ ନାହିଁ । ନିଶ୍ଚିତ ଭାବେ ଜାଣିବା ପାଇଁ ଉପଯୁକ୍ତ HIV ପରୀକ୍ଷା ଆବଶ୍ୟକ ।