Dr Ashok Choudhury / ବିଶ୍ୱର ଶ୍ରେଷ୍ଠ ୨% ବୈଜ୍ଞାନିକଙ୍କ ତାଲିକାରେ ILBSର ଡାକ୍ତର ଅଶୋକ ଚୌଧୁରୀ

ନୂଆଦିଲ୍ଲୀ: ଚିକିତ୍ସା ଗବେଷଣା କ୍ଷେତ୍ରରେ ଉଲ୍ଲେଖନୀୟ ସଫଳତା ହାସଲ କରିଛନ୍ତି ନୂଆଦିଲ୍ଲୀସ୍ଥିତ ଇନଷ୍ଟିଚ୍ୟୁଟ୍ ଅଫ୍ ଲିଭର ଆଣ୍ଡ ବିଲିଆରି ସାଇନ୍ସେସ୍‌ (ଆଇଏଲବିଏସ୍‌)ର ଅତିରିକ୍ତ ପ୍ରଫେସର ଡାକ୍ତର ଅଶୋକ ଚୌଧୁରୀ । ଗ୍ୟାଷ୍ଟ୍ରୋଏଣ୍ଟେରୋଲୋଜି ଓ ହେପାଟୋଲୋଜି କ୍ଷେତ୍ରରେ ତାଙ୍କୁ ଷ୍ଟାନଫୋର୍ଡ-ଏଲସେଭିୟର୍‌ର ବିଶ୍ୱର ଶ୍ରେଷ୍ଠ ୨ ପ୍ରତିଶତ ବୈଜ୍ଞାନିକଙ୍କ ତାଲିକାରେ ସ୍ଥାନ ମିଳିଛି ।

ଅକ୍ଟୋବର ୭ରେ ପ୍ରକାଶିତ ହୋଇଥିବା ଏହି ତାଲିକାରେ ଗବେଷଣାର ପ୍ରଭାବ ଆଧାରରେ ବିଭିନ୍ନ କ୍ଷେତ୍ରର ଗବେଷକମାନଙ୍କୁ ସ୍ଥାନ ଦିଆଯାଇଛି । ଚଳିତ ବର୍ଷ ଗ୍ୟାଷ୍ଟ୍ରୋଏଣ୍ଟେରୋଲୋଜି (ମନୁଷ୍ୟର ପାଚନ ତନ୍ତ୍ର ଏବଂ ଏହା ସହିତ ଜଡ଼ିତ ଅଙ୍ଗଗୁଡ଼ିକର ରୋଗ ଓ ସମସ୍ୟାର ଚିକିତ୍ସା) ଓ ହେପାଟୋଲୋଜି (ଯକୃତ, ପିତ୍ତକୋଷ, ପିତ୍ତନଳୀ ଏବଂ ଅଗ୍ନାଶୟର ଗଠନ, କାର୍ଯ୍ୟ ଏବଂ ଏଗୁଡ଼ିକ ସହ ଜଡ଼ିତ ରୋଗର ଚିକିତ୍ସା) କ୍ଷେତ୍ରରେ ବିଶ୍ୱର ୨,୨୫୩ ଜଣ ଗବେଷକ ଏହି ତାଲିକାରେ ସ୍ଥାନ ପାଇଥିବା ବେଳେ ଭାରତରୁ ୪୩ ଜଣ ରହିଛନ୍ତି ।

• କାହିଁକି ଡାକ୍ତର ଅଶୋକ ଚୌଧୁରୀଙ୍କୁ ମିଳିଲା ସଫଳତା ?

ଯକୃତ ବିଫଳତା, ଯକୃତ କର୍କଟ, ଯକୃତ ପ୍ରତିରୋପଣ ଏବଂ ଯକୃତ ରୋଗ ଚିକିତ୍ସାରେ କୃତ୍ରିମ ବୁଦ୍ଧିମତ୍ତା (AI)ର ବ୍ୟବହାର ଡାକ୍ତର ଚୌଧୁରୀଙ୍କ ଗବେଷଣାର ମୁଖ୍ୟ କ୍ଷେତ୍ର । ଡାକ୍ତର ଅଶୋକ ଚୌଧୁରୀଙ୍କ ୧୬୭ରୁ ଅଧିକ ଗବେଷଣା ପ୍ରବନ୍ଧ ପ୍ରକାଶ ପାଇଛି । ଏହି ପ୍ରବନ୍ଧଗୁଡ଼ିକୁ ମୋଟ ୯,୫୬୪ଟି ସାଇଟେସନ୍‌ ମିଳିଥିବା ବେଳେ ତାଙ୍କର ଏଚ୍‌-ଇଣ୍ଡେକ୍ସ ୩୬ ରହିଛି ।

ଗୁରୁତର ଯକୃତ ରୋଗୀଙ୍କ ଚିକିତ୍ସାରେ ଠିକ୍‌ ସମୟରେ ନିଷ୍ପତ୍ତି ନେବା ଉପରେ ମଧ୍ୟ ସେ ଗବେଷଣା କରିଛନ୍ତି । ଏଏଆରସି-ଏସିଏଲଏଫ୍‌ ସ୍କୋରର ବିକାଶରେ ତାଙ୍କର ଅବଦାନ ରହିଛି । ଏଠାରେ କହିରଖୁଛୁ କି, ଏଏଆରସି-ଏସିଏଲଏଫ୍‌ ସ୍କୋର ହେଉଛି ଏପରି ଏକ ମେଡିକାଲ-ସ୍କୋରିଂ ସିଷ୍ଟମ, ଯାହାକି ଜଣେ ଯକୃତ ବା ଲିଭର ଖରାପ ହୋଇଯାଇଥିବା ରୋଗୀଙ୍କ ସ୍ଥିତିର ଆକଳନ କରିଥାଏ । ଏହାସହ ରୋଗୀଙ୍କ ବଞ୍ଚିବାର ସମ୍ଭାବନା ଓ ଯକୃତ ପ୍ରତିରୋପଣ କରିବାର ଆବଶ୍ୟକତାର ସଠିକ୍ ସୂଚନା ଦେଇଥାଏ ।

ପଢନ୍ତୁ ଏହି ଖବର: ମୋଦି ସରକାରଙ୍କ ବଡ଼ ନିଷ୍ପତ୍ତି: ଏଥର ଶସ୍ତାରେ ମିଳିବ କର୍କଟ ରୋଗ ଔଷଧ

ଏହା ସହିତ ମେଡିକାଲ ଇମରଜେନ୍ସି ସେପସିସ୍‌ ଚିକିତ୍ସାରେ ‘ଗୋଲଡେନ୍‌ ୱିଣ୍ଡୋ’ ଏବଂ ଯକୃତ ପ୍ରତିରୋପଣ ପାଇଁ ଉପଯୁକ୍ତ ସମୟ ନିର୍ଦ୍ଧାରଣ ସମ୍ବନ୍ଧୀୟ ‘ଟ୍ରାନ୍ସପ୍ଲାଣ୍ଟ ୱିଣ୍ଡୋ’ ଧାରଣା ଉପରେ ମଧ୍ୟ ସେ କାମ କରିଛନ୍ତି । ତାଙ୍କର ଏହି ସଫଳତା ଯକୃତ ରୋଗ ଚିକିତ୍ସା ଓ ଗବେଷଣା କ୍ଷେତ୍ରରେ ତାଙ୍କର ଅବଦାନକୁ ଲୋକଲୋଚନକୁ ଆଣିଛି ।

• ଜନସ୍ୱାସ୍ଥ୍ୟ ସଚେତନତାରେ ଡ. ଚୌଧୁରୀଙ୍କ ଅବଦାନ

କେବଳ ଚିକିତ୍ସା ଓ ଗବେଷଣାରେ ସୀମିତ ନ ରହି ଡ. ଚୌଧୁରୀ ରୋଗ ନିରାକରଣ ଏବଂ ସୁସ୍ଥ ଜୀବନଶୈଳୀ ସମ୍ପର୍କରେ ଜନସାଧାରଣଙ୍କୁ ସଚେତନ କରିବା ଦିଗରେ ମଧ୍ୟ କାର୍ଯ୍ୟ କରୁଛନ୍ତି । ସେ ଏପର୍ଯ୍ୟନ୍ତ ପ୍ରାୟ ୨୦ଟି ଦେଶରେ ୧୫୦ରୁ ଅଧିକ ବକ୍ତୃତା ପ୍ରଦାନ କରିଛନ୍ତି । ଏଥିରେ ଷ୍ଟାନଫୋର୍ଡ ବିଶ୍ୱବିଦ୍ୟାଳୟ, ମାସାଚୁସେଟ୍ସ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (MIT) ଏବଂ ଜନ୍ସ ହପକିନ୍ସ ବିଶ୍ୱବିଦ୍ୟାଳୟ ଭଳି ପ୍ରମୁଖ ଶିକ୍ଷାନୁଷ୍ଠାନ ସାମିଲ । ତେବେ ଷ୍ଟାନଫୋର୍ଡ-ଏଲସେଭିୟର ତାଲିକାରେ ତାଙ୍କର ସ୍ଥାନ ତାଙ୍କ ଗବେଷଣାର ଅନ୍ତର୍ଜାତୀୟ ପ୍ରଭାବକୁ ଦର୍ଶାଉଛି । ଏହାସହ ଯକୃତ ରୋଗର ଚିକିତ୍ସାକୁ ଅଧିକ ଉନ୍ନତ କରିବା ପାଇଁ ସହଯୋଗମୂଳକ ପ୍ରୟାସରେ ତାଙ୍କ ଅବଦାନକୁ ମଧ୍ୟ ପ୍ରତିଫଳିତ କରୁଛି ।