Cyclone Update / ମାଡ଼ି ଆସୁଛି ବାତ୍ୟା: ସମୁଦ୍ରକୂଳକୁ ଯାଇପାରିବେନି ପର୍ଯ୍ୟଟକ...

ସମୁଦ୍ରକୂଳକୁ ଯାଇ ପାରିବେନି ପର୍ଯ୍ୟଟକ । ବାତ୍ୟାକୁ ନେଇ ସମୁଦ୍ର ଅଶାନ୍ତ ଥିବାରୁ ପର୍ଯ୍ୟଟକଙ୍କ ପାଇଁ ଗୋପାଳପୁର ବେଳଭୂମିରେ କଟକଣା ଲଗାଯାଇଛି । ଗଞ୍ଜାମ ଜିଲ୍ଲା ପ୍ରଶାସନ ପକ୍ଷରୁ ପର୍ଯ୍ୟଟକଙ୍କ ପାଇଁ ଗୋପାଳପୁର ସମେତ ଜିଲ୍ଲାର ସମସ୍ତ ବେଳାଭୂମିରେ କଟକଣା ଲଗାଯାଇଛି । ଆଜିଠୁ ଆସନ୍ତା 30ତାରିଖ ଯାଏଁ ଗଂଜାମ ଜିଲ୍ଲାର କୌଣସି ବେଳାଭୂମିକୁ ଯାଇପାରିବେନି ପର୍ଯ୍ୟଟକ । ଗୋପାଳପୁର ବେଳାଭୂମି, ସୁନାପୁର ବେଳାଭୂମି ସମେତ ଜିଲ୍ଲାର ସମସ୍ତ ବେଳାଭୂମିରେ ଏହି କଟକଣା ଲଗାଯାଇଛି ।''

ସେପଟେ ବାତ୍ୟା ମୁକାବିଲା ପାଇଁ ନବରଙ୍ଗପୁର ଜିଲ୍ଲା ପ୍ରଶାସନର ବ୍ୟାପକ ପ୍ରସ୍ତୁତି । ଜନସାଧାରଣଙ୍କ ସୁରକ୍ଷା, ତ୍ୱରିତ ଉଦ୍ଧାର ଓ ବିଭାଗୀୟ ସମନ୍ୱୟ ଉପରେ ଗୁରୁତ୍ୱ ଦିଆଯାଇଛି । ଆଗୁଆ ପଦକ୍ଷେପ ସ୍ୱରୂପ ବ୍ୟାପକ ପ୍ରସ୍ତୁତି ଓ ଜରୁରୀକାଳୀନ ବ୍ୟବସ୍ଥା ଗ୍ରହଣ କରାଯାଇଛି । ଜିଲ୍ଲାପାଳ ବିଭିନ୍ନ ବିଭାଗର ପ୍ରସ୍ତୁତିର ସମୀକ୍ଷା କରିବା ସହ ବିପର୍ଯ୍ୟୟର ମୁକାବିଲା, ସମନ୍ୱିତ କାର୍ଯ୍ୟପନ୍ଥା, ତ୍ୱରିତ ପ୍ରତିକ୍ରିୟା ଏବଂ ଜନସାଧାରଣଙ୍କ ସୁରକ୍ଷା ସୁନିଶ୍ଚିତ କରିବା ଉପରେ ଗୁରୁତ୍ୱାରୋପ କରିଛନ୍ତି । ଜିଲ୍ଲା, ବ୍ଲକ, ତହସିଲ ଓ ସହରାଞ୍ଚଳ ସ୍ଥାନୀୟ ସଂସ୍ଥା ସ୍ତରରେ ୨୪ ଘଣ୍ଟିଆ ନିୟନ୍ତ୍ରଣ କକ୍ଷ କାର୍ଯ୍ୟକ୍ଷମ ରହିଛି । ଜରୁରୀକାଳୀନ ସ୍ଥିତି ପାଇଁ ୦୬୮୫୮-୨୨୨୪୩୪ ନମ୍ବର ଜାରି କରାଯାଇଛି ।''

ନବରଙ୍ଗପୁର ଜିଲ୍ଲା ପାଇଁ ୩ଟି ଓଡ୍ରାଫ୍ ଟିମ୍ ମୁତୟନ କରାଯାଇଛି। ୨ଟି ଓଡ୍ରାଫ୍ ଟିମ୍ କୋଷାଗୁମୁଡ଼ା ବ୍ଲକରେ ଏବଂ ଗୋଟିଏ ଟିମ୍ ନବରଙ୍ଗପୁର ବ୍ଲକରେ ମୁତୟନ ପାଇଁ ବ୍ୟବସ୍ଥା କରାଯାଇଛି। ଆବଶ୍ୟକ କର୍ମଚାରୀ ଓ ଯନ୍ତ୍ରପାତି ସହ ୧୨ଟି ଅଗ୍ନିଶମ ଦଳକୁ ପ୍ରସ୍ତୁତ ରଖାଯାଇଛି। ଉଦ୍ଧାର ଓ ସ୍ଥାନାନ୍ତରଣ କାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ ଚାଳକଙ୍କ ସହ ୨୫୧ଟି ଯାନ ଚିହ୍ନଟ କରାଯାଇଛି ।''

ଏଥିସହ ପଢ଼ନ୍ତୁ: ଆଜି ବାତ୍ୟାର ରୂପ ନେବା ନେଇ ପାଣିପାଗ ବିଭାଗର ଆକଳନ…କାଲିଠୁ ରାଜ୍ୟରେ ବଢ଼ିବ ବର୍ଷା

ମାଲକାନଗିରିରେ ବାତ୍ୟା ମୁକାବିଲା ପାଇଁ ୪ ବରିଷ୍ଠ ଅଧିକାରୀ ନିଯୁକ୍ତ । ବାତ୍ୟା ଓ ପ୍ରବଳ ବର୍ଷାକୁ ଦୃଷ୍ଟିରେ ରଖି ମାଲକାନଗିରି ଜିଲ୍ଲା ପ୍ରଶାସନ ପକ୍ଷରୁ ଆଗୁଆ ପ୍ରସ୍ତୁତି କରାଯାଇଛି । ଜିଲ୍ଲାରେ ଜଳବନ୍ଦୀ, ଆକସ୍ମିକ ବନ୍ୟା ଓ ବର୍ଷାଜନିତ ଅଘଟଣର ମୁକାବିଲା ପାଇଁ ୪ ଜଣ ବରିଷ୍ଠ ଅଧିକାରୀଙ୍କୁ ବିଭିନ୍ନ ବ୍ଲକ୍‌ର ଦାୟିତ୍ୱ ଦିଆଯାଇଛି। ନିଯୁକ୍ତ ଅଧିକାରୀମାନେ ନିଜ ନିଜ ବ୍ଲକ୍‌ରେ ରହି ବର୍ଷାର ସ୍ଥିତି ଉପରେ ନଜର ରଖିବା ସହ ବିଡିଓ, ତହସିଲଦାର ଓ ଅନ୍ୟ ବିଭାଗ ସହ ସମନ୍ୱୟ ରକ୍ଷା କରି ଜନସାଧାରଣଙ୍କ ଧନଜୀବନ ସୁରକ୍ଷା ପାଇଁ ତୁରନ୍ତ ପଦକ୍ଷେପ ନେବେ।''

ଅଧିକ ପଢ଼ନ୍ତୁ ପାଣିପାଗ ଖବର: