Nepal Tunnel Rescue / ନେପାଳ ସୁଡ଼ଙ୍ଗରେ ଫସିଛନ୍ତି ୧୨୧ ଶ୍ରମିକ, ପାଇପ୍ ଯୋଗେ ପହଞ୍ଚୁଛି ଅକ୍ସିଜେନ୍...ଚାଲିଛି ରେସ୍କ୍ୟୁ ଅପରେସନ୍‌

ନେପାଳରେ ହୋଇଥିବା ପ୍ରକୃତିର ତାଣ୍ଡବକୁ ଏହାରି ମଧ୍ୟରେ ୧୪ ଦିନ ବିତିଗଲାଣି । କିନ୍ତୁ ଦୁର୍ଦ୍ଦଶା ଏବେ ବି ଶେଷ ହୋଇନି । ବନ୍ୟା ଓ ଭୂସ୍ଖଳନ ପରେ ଧ୍ୱଂସସ୍ତୂପ ଭିତରୁ ଜୀବନ ଖୋଜୁଛନ୍ତି ଉଦ୍ଧାରକାରୀ ଦଳ । ସବୁଠାରୁ ବଡ଼ ଚିନ୍ତା ପାଲଟିଛି ହାଇଡ୍ରୋପାୱାର ପ୍ରକଳ୍ପର ଟନେଲ, ଯେଉଁଠି ଏବେ ବି ଫସିଛନ୍ତି ୧୨୧ ଜଣ ଶ୍ରମିକ । ଆଉ ସେମାନଙ୍କୁ ସୁରକ୍ଷିତ ଉଦ୍ଧାର କରିବା ପାଇଁ ଅହରହ ଚାଲିଛି ଅପରେସନ୍‌ ।

ନେପାଳ ଟ୍ରାଜେଡି ପରେ ଏବେ ଉଦ୍ଧାରକାରୀ ଦଳର ସବୁଠାରୁ ବଡ଼ ଫୋକସ୍‌ ତିନିଟି ହାଇଡ୍ରୋପାୱାର ପ୍ରକଳ୍ପର ଟନେଲ ଉପରେ ରହିଛି । ଏହି ଟନେଲଗୁଡ଼ିକରେ ବହୁ ସଂଖ୍ୟକ ଶ୍ରମିକ ଏବେ ବି ଫସି ରହିଥିବା ଜଣାପଡ଼ିଛି । ମିଳିଥିବା ସୂନା ଅନୁସାରେ, ଏହି ଟନେଲଗୁଡ଼ିକରେ ପ୍ରାୟ ୧୨୧ ଜଣ ଲୋକ ଫସି ରହିଛନ୍ତି । ଫସିଥିବା ଲୋକଙ୍କୁ ଜୀବିତ ରଖିବା ପାଇଁ ପାଇପ୍‌ ମାଧ୍ୟମରେ ନିୟମିତ ଭାବେ ଅକ୍ସିଜେନ୍‌ ଯୋଗାଇ ଦିଆଯାଉଛି । ରେସ୍କ୍ୟୁ ଟିମ୍ ସେମାନଙ୍କୁ ସୁରକ୍ଷିତ ଭାବେ ବାହାର କରିବା ପାଇଁ ଜୋରଦାର ପ୍ରୟାସ ଜାରି ରଖିଛନ୍ତି ।

ରଏଟର୍ସର ରିପୋର୍ଟ ଅନୁସାରେ, ନେପାଳରେ ଘଟିଥିବା ଏହି ପ୍ରାକୃତିକ ବିପର୍ଯ୍ୟୟରେ ପ୍ରାୟ ୧୧ଟି ହାଇଡ୍ରୋପାୱାର ପ୍ରକଳ୍ପ ପ୍ରଭାବିତ ହୋଇଛି । ଏଥିରେ ରସୁୱାରେ ଥିବା ଅପର ତ୍ରିଶୁଲୀ ପ୍ରକଳ୍ପ 3A ଏବଂ 3B ମଧ୍ୟ ସାମିଲ ଅଛି ।

ବନ୍ୟା ଓ ଭୂସ୍ଖଳନ ଯୋଗୁଁ ନେପାଳରେ ବ୍ୟାପକ ଧ୍ୱଂସ ହୋଇଛି । ଏପର୍ଯ୍ୟନ୍ତ ୧୩୦୦ରୁ ଅଧିକ ମୃତଦେହ ଉଦ୍ଧାର କରାଯାଇଛି । ଅନ୍ୟପଟେ ୫୦୦୦ରୁ ଅଧିକ ଲୋକ ଏବେ ବି ନିଖୋଜ ଥିବା ଜଣାପଡ଼ିଛି । ଉଦ୍ଧାରକାରୀ ଦଳ ଏପର୍ଯ୍ୟନ୍ତ ୧୩ ହଜାରରୁ ଅଧିକ ଲୋକଙ୍କୁ ସୁରକ୍ଷିତ ଉଦ୍ଧାର କରିସାରିଛନ୍ତି ।

ନେପାଳରେ ଫସିଛନ୍ତି ଶହ ଶହ ଭାରତୀୟ

ଭାରତୀୟ ବିଦେଶ ମନ୍ତ୍ରଣାଳୟର ପ୍ରବକ୍ତା ରଣଧୀର ଜୟସ୍ବାଲ ନେପାଳରେ ଫସିଥିବା ଭାରତୀୟଙ୍କ ସମ୍ପର୍କରେ ମଧ୍ୟ ତଥ୍ୟ ଦେଇଛନ୍ତି । ତାଙ୍କ ଅନୁସାରେ, ନେପାଳରୁ ୧୬୯ ଜଣ ଭାରତୀୟଙ୍କୁ ଉଦ୍ଧାର କରାଯାଇଛି । ତେବେ ୨୭୫ ଜଣ ଭାରତୀୟ ଏବେ ବି ନିଖୋଜ ଅଛନ୍ତି । ଏଥିରେ ତିବ୍ବତ ଅଞ୍ଚଳରେ ନିଖୋଜ ଥିବା ୪୯ ଜଣ ଭାରତୀୟ ମଧ୍ୟ ସାମିଲ ଅଛନ୍ତି ।

ବିପର୍ଯ୍ୟୟରେ ମୃତକଙ୍କ ପରିଚୟ ଚିହ୍ନଟ କରିବା ପାଇଁ ଭାରତୀୟ ଫୋରେନସିକ୍‌ ଟିମ୍‌ ମଧ୍ୟ କାମ କରୁଛି। ଏପର୍ଯ୍ୟନ୍ତ ପ୍ରାୟ ୧୨୦୦ଟି ଡିଏନ୍‌ଏ ସାମ୍ପଲ୍‌ କାଠମାଣ୍ଡୁର ଦୁଇଟି ଲାବୋରେଟୋରୀରେ ଜମା କରାଯାଇଛି ।

୨୪ ଘଣ୍ଟା କାମ କରୁଛି କଣ୍ଟ୍ରୋଲ ରୁମ୍‌

ରଣଧୀର ଜୟସ୍ବାଲଙ୍କ ଅନୁସାରେ, ଭାରତ, ଚୀନ୍‌ ଏବଂ ନେପାଳରେ ଥିବା କଣ୍ଟ୍ରୋଲ ରୁମ୍‌ଗୁଡ଼ିକ ୨୪ ଘଣ୍ଟା କାମ କରୁଛି । ଏହି କଠିନ ସମୟରେ ଭାରତ ନେପାଳ ସହିତ ଦୃଢ଼ ଭାବେ ଠିଆ ହୋଇଛି । ଉଦ୍ଧାର ଓ ରିଲିଫ୍‌ କାର୍ଯ୍ୟ ପାଇଁ ଭାରତ ପକ୍ଷରୁ ଲଗାତାର ସହାୟତା ପଠାଯାଉଛି ।