Middle East Crisis / ଇରାନର କେଶ୍ମ ଦ୍ୱୀପରେ ଆମେରିକାର ଗୁପ୍ତ ଆକ୍ରମଣ

ମଧ୍ୟପ୍ରାଚ୍ୟରେ ପୁଣି ବଢ଼ିଲା ଯୁଦ୍ଧ ଆଶଙ୍କା... ଇରାନର କେଶ୍ମ ଦ୍ୱୀପରେ ଆମେରିକା ଗୁପ୍ତ ଆକ୍ରମଣ କରିଥିବା ନେଇ ଚର୍ଚ୍ଚା ଜୋର ଧରିଛି । ହର୍ମୁଜ ପ୍ରଣାଳୀରେ ଅବସ୍ଥିତ ଏହି ଦ୍ୱୀପରେ ଆକ୍ରମଣ ପରେ ଲଗାତାର ବିସ୍ଫୋରଣ ଘଟିଥିବା ଇରାନର ସରକାରୀ ଗଣମାଧ୍ୟମ ଦାବି କରିଛି । ତେବେ ଏହି ଆକ୍ରମଣ ସମ୍ପର୍କରେ ଆମେରିକା ପକ୍ଷରୁ ସ୍ପଷ୍ଟ ଆଧିକାରିକ ସୂଚନା ମିଳିନାହିଁ ।

ଏହି ଘଟଣା ପରେ ତେହେରାନ ବିରୋଧରେ ଆମେରିକା ପୁଣି ଏକ ବଡ଼ ସାମରିକ ଅଭିଯାନ ଆରମ୍ଭ କରିପାରେ ବୋଲି ଆଶଙ୍କା ବଢ଼ିଛି । ବିଶେଷକରି ଆମେରିକାର ମଧ୍ୟବର୍ତ୍ତୀକାଳୀନ ନିର୍ବାଚନ ପରେ ଇରାନ ବିରୋଧରେ ନୂଆ ସାମରିକ ପଦକ୍ଷେପ ନିଆଯାଇପାରେ ବୋଲି ଆନ୍ତର୍ଜାତୀୟ ସ୍ତରରେ ଆଲୋଚନା ହେଉଛି । ଅନ୍ୟପଟେ ଦୁଇ ଦେଶ ମଧ୍ୟରେ କୂଟନୈତିକ ଆଲୋଚନା ଜାରି ରହିଥିବା ମଧ୍ୟ ସୂଚନା ମିଳିଛି । ଗତ ଫେବୃଆରୀ ୨୮ରୁ ଆମେରିକା ଓ ଇରାନ ମଧ୍ୟରେ ଯୁଦ୍ଧ ଜାରି ରହିଥିବାରୁ ପରିସ୍ଥିତି ଆହୁରି ଜଟିଳ ହୋଇଛି ।

ସେପଟେ ରୁଷ-ୟୁକ୍ରେନ ଯୁଦ୍ଧ ମଧ୍ୟ ଭୟଙ୍କର ରୂପ ନେଇଛି । ଦକ୍ଷିଣ ୟୁକ୍ରେନର ଜାପୋରିଜ୍ଜିଆ ଅଞ୍ଚଳରେ ରୁଷ ବାୟୁସେନା ପକ୍ଷରୁ ବଡ଼ଧରଣର ଆକ୍ରମଣ କରାଯାଇଛି । ରୁଷ ଯୁଦ୍ଧ ବିମାନ ୯ଟି ଗାଇଡେଡ୍ ଏରିଏଲ୍ ବମ୍ ନିକ୍ଷେପ କରିଥିବା ସୂଚନା ମିଳିଛି । ଏହି ଆକ୍ରମଣରେ ୨୬ ଜଣଙ୍କ ମୃତ୍ୟୁ ହୋଇଥିବା ଖବର ଆସିଛି ।

ଅନ୍ୟପଟେ ୟୁକ୍ରେନ ରାଷ୍ଟ୍ରପତିଙ୍କ ବୟାନ ଅନୁଯାୟୀ, ରୁଷ ଉତ୍ତେଜନା ହ୍ରାସ କରିବାକୁ ଚାହୁଁଥିବା କହୁଛି । ତେବେ ଗୋଟିଏ ପଟେ ଶାନ୍ତି ଆଲୋଚନାର କଥା ଓ ଅନ୍ୟପଟେ ଆକ୍ରମଣ ଜାରି ରହିବା ଅନ୍ତର୍ଜାତୀୟ ସମୁଦାୟ ପାଇଁ ଚିନ୍ତାର ବିଷୟ ପାଲଟିଛି ।