ପାକିସ୍ତାନର ସେନା ମୁଖ୍ୟ ଅସୀମ ମୁନିର ପୁଣି ଥରେ ଅପରେସନ ସିନ୍ଦୂରକୁ ନେଇ ଏକ ବୟାନ ଦେଇଛନ୍ତି । ଏକ ବିବୃତ୍ତିରେ ସେ ଅପରେସନ ସିନ୍ଦୂରରେ ଆଲ୍ଲାହ୍‌ଙ୍କ ସାହାଯ୍ୟକୁ ଉଲ୍ଲେଖ କରିଥିବା ଦେଖିବାକୁ ମିଳୁଛି । ସେ କହିଛନ୍ତି ଯେ ଅପରେସନ ସିନ୍ଦୂର ସମୟରେ ଆଲ୍ଲାହ୍‌ ଭାରତ ବିରୋଧରେ ସାହାଯ୍ୟ କରିଥିଲେ ।

ଅସୀମ ମୁନିର କହିଛନ୍ତି, " ଅପରେସନ୍‌ ସିନ୍ଦୂର ସମୟରେ ଚୀନ୍ ଅସ୍ତ୍ରଶସ୍ତ୍ର ଭାରତ ବିରୋଧରେ ସାହାଯ୍ୟ କରିନଥିଲା ବରଂ ଆଲ୍ଲାହ୍‌ କରିଥିଲେ । ଆଲ୍ଲାହ୍‌ଙ୍କ ଉପରେ ବିଶ୍ୱାସ ଯୋଗୁଁ ଫରିସ୍ତେମାନେ ଭାରତ ବିରୋଧରେ ଅପରେସନ୍‌ରେ ପାକିସ୍ତାନୀ ସେନାକୁ ସାହାଯ୍ୟ କରିଥିଲେ
।

ମୁନିର ଏହି ବିବୃତ୍ତି କେଉଁଠାରେ ଦେଇଥିଲେ ?

ମୁନିର ଏହି ମାସର ଆରମ୍ଭରେ ନ୍ୟାସନାଲ ଉଲାମା ଏବଂ ମଶାଏଖ ସମ୍ମିଳନୀରେ ଏହି ବିବୃତ୍ତି ଦେଇଥିଲେ । ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫଙ୍କ ସମେତ ବହୁ ସଂଖ୍ୟକ ଇସଲାମିକ ଧର୍ମଗୁରୁ ଉପସ୍ଥିତ ଥିଲେ । ଏହି ସମ୍ମିଳନୀର ଭିଡିଓ ଏବେ ସାମ୍ନାକୁ ଆସିଛି । ଆଉ ଏହି ସମ୍ମିଳନୀରେ ସେ କହିଥିଲେ ଯେ, "ଆଲ୍ଲାଙ୍କ ସାହାଯ୍ୟ ଆସିଥିଲା, ଓ ଆମେ ଏହାକୁ ଆସୁଥିବାର ଦେଖିଲୁ, ଆମେ ଏହାକୁ ଅନୁଭବ କରିଥିଲୁ'' । ଏହା ସହ ସେ ଆରବି ଭାଷାରେ କିଛି ଧାର୍ମିକ ପଂକ୍ତି ମଧ୍ୟ ପାଠ କରିଥିଲେ ।

Pakistan Field Marshal Munir says it was 'divine intervention' that helped the country during May conflict with India. Says,'we felt it'

PS:
-Pakistan suffered an attack on a number of its Air Bases, Terror camps before reaching out for ceasefire
-Speech was made on 10th Dec https://t.co/YLy9oZTNo0 pic.twitter.com/sv4SThlJxh

— Sidhant Sibal (@sidhant) December 21, 2025

ଅପରେସନ୍ ସିନ୍ଦୂରରେ କ'ଣ ଘଟିଥିଲା?

୬ ମେ' ୨୦୨୫ରେ ପହଲଗାମ୍‌ ଆତଙ୍କବାଦୀ ଆକ୍ରମଣ ପରେ ଭାରତୀୟ ସେନା ପକ୍ଷରୁ ଅପରେସନ୍‌ ସିନ୍ଦୂର ଆରମ୍ଭ ହୋଇଥିଲା । ଭାରତ ପାକ୍ ଅଧିକୃତ କାଶ୍ମୀର ଏବଂ ପାକିସ୍ତାନରେ ଅନେକ ଆତଙ୍କବାଦୀ ଶିବିର ଉପରେ ଆକ୍ରମଣ କରି ଧ୍ବଂସ କରିଥିଲା । ଲସ୍କର-ଏ-ତୈବା ଏବଂ ଜୈଶ-ଏ-ମହମ୍ମଦ ଭଳି ଆତଙ୍କବାଦୀ ସଂଗଠନର ଶିବିରକୁ ଟାର୍ଗେଟ କରି ଭାରତ ଆକ୍ରମଣ କରିଥିଲା ।

ପହଲଗାମ୍ ଆକ୍ରମଣରେ ୨୬ ଜଣ ଲୋକ ପ୍ରାଣ ହରାଇଥିଲେ

ସୂଚନା ଅନୁସାରେ, ୨୨ ଏପ୍ରିଲ୍‌ ୨୦୨୫ରେ ପହଲଗାମ୍‌ରେ ଆତଙ୍କବାଦୀ ଆକ୍ରମଣ ହୋଇଥିଲା । ଏହି ଆକ୍ରମଣରେ ପାକିସ୍ତାନ ସମର୍ଥିତ ଆତଙ୍କବାଦୀମାନେ ପହଲଗାମରେ ପ୍ରବେଶ କରିଥିଲେ, ପର୍ଯ୍ୟଟକମାନଙ୍କୁ ସେମାନଙ୍କ ଧର୍ମ ବିଷୟରେ ପଚାରି ହତ୍ୟା କରିଥିଲେ । ଏହି ନୃଶଂସ ଆତଙ୍କବାଦୀ ଆକ୍ରମଣରେ ୨୬ ଜଣଙ୍କ ମୃତ୍ୟୁ ହୋଇଥିଲା । ଏହି ଆକ୍ରମଣର ଜବାବରେ ଭାରତ ଅପରେସନ୍ ସିନ୍ଦୂର ଆରମ୍ଭ କରିଥିଲା ।