ବାଂଲାଦେଶରେ ହିନ୍ଦୁମାନଙ୍କ ଉପରେ ଅତ୍ୟାଚାରର ଧାରା ଥମିବାର ନାଁ ନେଉନାହିଁ । ଭାରତର ପଡ଼ୋଶୀ ଦେଶ ବାଂଲାଦେଶରେ ଚାଲିଥିବା ହିଂସା ମଧ୍ୟରେ ଇସଲାମିକ କଟରପନ୍ଥୀମାନେ ପୁଣି ଥରେ ସଂଖ୍ୟାଲଘୁ ହିନ୍ଦୁମାନଙ୍କୁ ଟାର୍ଗେଟ କରିଛନ୍ତି । ଏହି ମାସର ଆରମ୍ଭରେ ଯୁବ ନେତା ସରିଫ ଓସମାନ ହାଦିଙ୍କ ହତ୍ୟା ପରେ ଦେଶବ୍ୟାପୀ ହିଂସା ପରିସ୍ଥିତି ସୃଷ୍ଟି ହୋଇଥିଲା । ଆଉ ଏସବୁ ମଧ୍ୟରେ ବାଂଲାଦେଶରେ ଆଉ ଏକ ସଂଖ୍ୟାଲଘୁ ହିନ୍ଦୁଙ୍କ ଘରେ କେହି ଦୁର୍ବୃତ୍ତ ନିଆଁ ଲଗାଇ ଦେଇଛନ୍ତି । ଏହି ଘଟଣା ଦକ୍ଷିଣ ବାଂଲାଦେଶର ପିରୋଜପୁର ସଦର ଉପଜିଲାର ପଶ୍ଚିମ ଡୁମରିଟୋଲା ଗାଁରେ ଘଟିଛି ।

ବିଭିନ୍ନ ଗଣମାଧ୍ୟମ ରିପୋର୍ଟ ଅନୁସାରେ, ଡିସେମ୍ବର ୨୭ ତାରିଖରେ ପିରୋଜପୁରର ଡୁମରିଟୋଲା ଗାଁରେ ଅଜ୍ଞାତ ଦୁର୍ବୃତ୍ତମାନେ ସାହା ପରିବାରର ଘରେ ନିଆଁ ଲଗାଇ ଦେଇଥିଲେ । ସନ୍ଦିଗ୍ଧମାନେ ଏକ କୋଠରୀ ଭିତରେ କପଡ଼ା ପକାଇ ନିଆଁ ଲଗାଇ ଦେଇଥିବା ଅଭିଯୋଗ ହୋଇଛି । ଆଉ ଚାହୁଁଚାହୁଁ ଏହି ନିଆଁ ଶୀଘ୍ର ସାରା ଘରକୁ ବ୍ୟାପି ଯାଇଥିଲା ।

ବାଂଲାଦେଶୀ ଲେଖିକା ତସଲିମା ନସରିନ ସୋସିଆଲ ମିଡିଆ ପ୍ଲାଟଫର୍ମ 'X' ରେ ଲେଖିଛନ୍ତି, "ହିନ୍ଦୁ ବିରୋଧୀ ଜିହାଦୀମାନେ ପିରୋଜପୁରର ଡୁମରିଟୋଲା ଗାଁରେ ସାହା ପରିବାରର ପାଞ୍ଚଟି କୋଠରୀକୁ ପୋଡ଼ି ଦେଇଛନ୍ତି । ସମସ୍ତେ ଶୋଇଥିବା ସମୟରେ ଦୁର୍ବୃତ୍ତମାନେ ନିଆଁ ଲଗାଇ ଦେଇଛନ୍ତି ।

ସେ ଆହୁରି ଲେଖିଛନ୍ତି, " ଠିକ୍ ଏହି ପରି ଜିହାଦିମାନେ ରାଓଜାନର ଚଟୋଗ୍ରାମରେ ହିନ୍ଦୁ ଘର ପୋଡ଼ି ଦେଇଥିଲେ । ଦେଶର ସମସ୍ତ ହିନ୍ଦୁ ଘର ଏହିପରି ପୋଡ଼ି ଦେବେ କି ? ସେମାନେ ହିନ୍ଦୁମାନଙ୍କୁ ଜୀବନ୍ତ ଜାଳିବାକୁ ଚାହାଁନ୍ତି । ତେଣୁ ଲୋକମାନେ ଶୋଇଥିବା ସମୟରେ ସେମାନେ ନିଆଁ ଲଗାନ୍ତି ।

ଗତ ସପ୍ତାହରେ ଅଜଣା ଆକ୍ରମଣକାରୀମାନେ ଦକ୍ଷିଣ-ପୂର୍ବ ବନ୍ଦର ନିକଟସହର ଚଟୋଗ୍ରାମରେ ଏକ ହିନ୍ଦୁ ଘର ପୋଡ଼ି ଦେବା ପରେ ଏହି ଘଟଣା ଘଟିଛି । ପରିବାର ସଦସ୍ୟମାନେ କହିଛନ୍ତି ଯେ ସେମାନେ ଭୋରରୁ ଦେଖିବାକୁ ପାଇଥିଲେ କି ତାଙ୍କ ଘରେ ନିଆଁ ଲାଗିଛି । ସେହିପରି ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ଗତ ପାଞ୍ଚ ଦିନ ମଧ୍ୟରେ ରାଓଜାନର ତିନୋଟି ସ୍ଥାନରେ ସାତଟି ହିନ୍ଦୁ ପରିବାରର ଘରକୁ ପୋଡ଼ି ଦିଆଯାଇଛି ।
ଡିସେମ୍ବର ୧୨ ତାରିଖରେ, ଭାରତର ସମାଲୋଚକ ଜଣେ ପ୍ରମୁଖ ଛାତ୍ର ନେତା ଉସମାନ ହାଦିଙ୍କୁ ଅଜ୍ଞାତ ବନ୍ଧୁକଧାରୀମାନେ ମୁଣ୍ଡକୁ ଗୁଳି ମାରି ହତ୍ୟା କରିଥିଲେ । ଯାହାକୁ ନେଇ ବାଂଲାଦେଶରେ ଦେଶବ୍ୟାପୀ ଉତ୍ତେଜନା ସୃଷ୍ଟି ହୋଇଥିଲା । ଏମିତିକି ମୈମନସିଂରେ ଏକ ଜନଗହଳି ଅଞ୍ଚଳରେ ଜଣେ ହିନ୍ଦୁ ଯୁବକ ଦୀପୁ ଚନ୍ଦ୍ର ଦାସଙ୍କୁ ନିର୍ମମ ଭାବରେ ପିଟି ପିଟି ହତ୍ୟା କରିଥିଲା । ତା'ପରେ ତାଙ୍କ ଶରୀରକୁ ପୋଡ଼ି ଦେଇଥିଲେ । ଏହାକୁ ବିଶ୍ବବ୍ୟାପୀ ପ୍ରତିବାଦ ହୋଇଥିଲା ।