ବାଂଲାଦେଶରେ ସଂଖ୍ୟାଲଘୁ ହିନ୍ଦୁମାନଙ୍କ ବିରୋଧରେ ହିଂସା କମିବାରେ ନାଁ ଧରୁନି । ପୁଣି ଜଣେ ହିନ୍ଦୁ ଯୁବକଙ୍କୁ ମରଣାତ୍ମକ ଆକ୍ରମଣ କରାଯାଇଛି । ଶରିୟତପୁର ଅଞ୍ଚଳରେ ଖୋକନ ଚନ୍ଦ୍ର ନାମକ ଜଣେ ହିନ୍ଦୁ ବ୍ୟକ୍ତିଙ୍କୁ କିଛି ଲୋକ ଘେରି ଯାଇଥିଲେ । ଆଉ ଏହା ପରେ ତାଙ୍କୁ ପ୍ରଥମେ ନିର୍ମମ ଭାବରେ ମାଡ଼ ମାରିଥିଲେ । ତା'ପରେ ଛୁରି ମଧ୍ୟ ଆକ୍ରମଣ କରିଥିଲେ । ଏତିକି ସରି ନଥିଲା ବର୍ବରତା । ପରେ ତାଙ୍କୁ ପେଟ୍ରୋଲ ଢାଳି ଜୀବନ୍ତ ଜାଳି ଦିଆଯାଇଥିଲା ।

କିନ୍ତୁ ଶେଷ ମୁହୂର୍ତ୍ତରେ ହିନ୍ଦୁ ଯୁବକ ଜଣକ ନିକଟସ୍ଥ ପୋଖରୀକୁ ଡେଇଁ ନିଜ ଜୀବନ ବଞ୍ଚାଇଥିଲେ । ତେବେ ହିନ୍ଦୁ ଯୁବକଙ୍କ ଉପରେ ଏହି ଆକ୍ରମଣ ପୁଣି ଥରେ ବାଂଲାଦେଶରେ ସଂଖ୍ୟାଲଘୁଙ୍କ ଉପରେ ଅତ୍ୟାଚାରର ପରିମାଣକୁ ସ୍ପଷ୍ଟ କରି ଦେଇଛି ।

ରିପୋର୍ଟ ଅନୁଯାୟୀ, ଡିସେମ୍ବର ୩୧, ବୁଧବାର ରାତି ପ୍ରାୟ ୯:୦୦ ଟା ସମୟରେ କାନେଶ୍ୱର ୟୁନିଅନର ତିଲୋଇ ଅଞ୍ଚଳରେ ଏହି ନୃଶଂସ ଆକ୍ରମଣ ଘଟିଥିଲା । ଖୋକନ ଚନ୍ଦ୍ର ଦାସ ପରେଶ ଚନ୍ଦ୍ର ଦାସଙ୍କ ପୁଅ। ସେ ଡାମୁଡ଼ିଆର କେଉରଭଙ୍ଗା ବଜାରରେ ଏକ ଔଷଧ ଦୋକାନର ମାଲିକ । ଖୋକନ ଚନ୍ଦ୍ର ଦାସ ବୁଧବାର ରାତିରେ ତାଙ୍କ ଦୋକାନ ବନ୍ଦ କରି ଘରକୁ ଫେରୁଥିଲେ । ଯେତେବେଳେ ସେ ତିଲୋଇ ଅଞ୍ଚଳରେ ପହଞ୍ଚିଲେ, କିଛି ଦୁର୍ବୃତ୍ତ ତାଙ୍କୁ ଅଟକାଇଥିଲେ । ଆକ୍ରମଣକାରୀମାନେ ତାଙ୍କ ଉପରେ ଧାରୁଆ ଅସ୍ତ୍ରରେ ଆକ୍ରମଣ କରିଥିଲେ ଏବଂ ପରେ ତାଙ୍କ ଶରୀରରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲେ ।

ନିଆଁରୁ ନିଜକୁ ରକ୍ଷା କରିବା ପାଇଁ ଖୋକନ ଚନ୍ଦ୍ର ଦାସ ନିକଟସ୍ଥ ପୋଖରୀକୁ ଡେଇଁ ପଡ଼ିଥିଲେ । ପରେ ସ୍ଥାନୀୟ ଲୋକମାନେ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଶରିୟତପୁର ସଦର ହସ୍ପିଟାଲରେ ଭର୍ତ୍ତି କରିଥିଲେ । ଏହି ଘଟଣା ସ୍ଥାନୀୟ ଅଞ୍ଚଳରେ ବ୍ୟାପକ ଆତଙ୍କ ସୃଷ୍ଟି କରିଛି । ତେବେ ଆକ୍ରମଣ ପଛର ଉଦ୍ଦେଶ୍ୟ ଏବଂ ସମ୍ପୃକ୍ତ ଲୋକଙ୍କ ପରିଚୟ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ।

ପୂର୍ବରୁ, ୧୮ ଡିସେମ୍ବର, ୨୦୨୫ରେ, ବାଂଲାଦେଶରେ ଦୀପୁ ଚନ୍ଦ୍ର ଦାସଙ୍କୁ ପିଟି ପିଟି ହତ୍ୟା କରାଯାଇଥିଲା । ତାଙ୍କ ଶରୀରକୁ ପରେ ଗଛରେ ବାନ୍ଧି ପୋଡ଼ି ଦିଆଯାଇଥିଲା ।

ପରବର୍ତ୍ତୀ ସମୟରେ, ଡିସେମ୍ବର ୨୫ରେ ଏକ ଭିଡ଼ ଅମୃତ ମଣ୍ଡଳଙ୍କୁ ପିଟି ହତ୍ୟା କରିଥିଲା । ତଥାପି ଲଜ୍ଜା ଏଡାଇବା ପାଇଁ, ବାଂଲାଦେଶ ଦାବି କରିଥିଲା ​​ଯେ ଅମୃତ ମଣ୍ଡଳ ଜଣେ ଅପରାଧୀ ଏବଂ ଜନତା ତାଙ୍କୁ ବଟି ଆଦାୟ ଯୋଗୁଁ ହତ୍ୟା କରିଥିଲେ ।

ପରବର୍ତ୍ତୀ ସମୟରେ, ଡିସେମ୍ବର ୨୯ରେ, ମେହରାବାରି ଅଞ୍ଚଳରେ ସୁରକ୍ଷା ଦାୟିତ୍ୱରେ ଥିବା ସମୟରେ ବଜେନ୍ଦ୍ର ବିଶ୍ୱାସ (୪୨)ଙ୍କୁ ଗୁଳି କରି ହତ୍ୟା କରାଯାଇଥିଲା । ପୋଲିସ ଅଭିଯୁକ୍ତ ନୋମାନ ମିଆଁ (୨୯)ଙ୍କୁ ଗିରଫ କରିଥିଲା ।