ବାଂଲାଦେଶରେ ପୁଣି ଜଣେ ସଂଖ୍ୟାଲଘୁ ହିନ୍ଦୁଙ୍କୁ ହତ୍ୟା । ବାଂଲାଦେଶରେ ସଂଖ୍ୟାଲଘୁ ହିନ୍ଦୁ ସମ୍ପ୍ରଦାୟ ବିରୁଦ୍ଧରେ ହିଂସାର ଆଉ ଏକ ଗମ୍ଭୀର ମାମଲା ସାମ୍ନାକୁ ଆସିଛି । ନରସିଙ୍ଗଡି ପୋଲିସ ଲାଇନ୍ସ ସଂଲଗ୍ନ ମସଜିଦ ମାର୍କେଟ ଅଞ୍ଚଳରେ ୨୩ ବର୍ଷୀୟ ହିନ୍ଦୁ ଯୁବକ ଚଞ୍ଚଲ ଚନ୍ଦ୍ର ଭୌମିକଙ୍କୁ ନିର୍ମମ ଭାବରେ ହତ୍ୟା କରାଯାଇଛି । ଗ୍ୟାରେଜ୍‌ ଭିତରେ ଚଞ୍ଚଲଙ୍କୁ ଜୀବନ୍ତ ପୋଡ଼ି ଦିଆଯାଇଥିବା ସନ୍ଦେହ କରାଯାଉଛି ।

ମୃତକ ଚଞ୍ଚଲ ଚନ୍ଦ୍ର ଭୌମିକ କୋମିଲ୍ଲା ଜିଲ୍ଲାର ଲକ୍ଷ୍ମୀପୁର ଗାଁର ବାସିନ୍ଦା ଥିଲେ । ସେ ବହୁ ବର୍ଷ ଧରି ନରସିଙ୍ଗଡିର ଏକ ଗ୍ୟାରେଜରେ କାମ କରୁଥିଲେ ଏବଂ କାମ ପାଇଁ ସେଠାରେ ରହୁଥିଲେ । ଚଞ୍ଚଲ ତାଙ୍କ ପରିବାରର ଏକମାତ୍ର ରୋଜଗାରକ୍ଷମ ପୁଅ ଥିଲେ ।

ପ୍ରତ୍ୟକ୍ଷଦର୍ଶୀ ଏବଂ ସ୍ଥାନୀୟ ସୂତ୍ର ଅନୁଯାୟୀ, ଶୁକ୍ରବାର ବିଳମ୍ବିତ ରାତିରେ ଚଞ୍ଚଲ ଗ୍ୟାରେଜ ଭିତରେ ଶୋଇଥିବା ସମୟରେ, ଦୋକାନ ବାହାରେ ସଟରରେ ପେଟ୍ରୋଲ ଢାଳି ନିଆଁ ଲଗାଯାଇଥିଲା । ନିଆଁ ଶୀଘ୍ର ସମଗ୍ର ଗ୍ୟାରେଜରେ ବ୍ୟାପିଯାଇଥିଲା । ଘଟଣାର ଏକ ଭିଡିଓରେ ଜଣେ ବ୍ୟକ୍ତି ଦୋକାନ ବାହାରେ ନିଆଁ ଲଗାଇ ଦେଉଥିବା ଦେଖାଯାଇଛି, ଯାହା ପରେ ନିଆଁ ଶୀଘ୍ର ଭିତରେ ବ୍ୟାପି ଯାଇଥିଲା ।

ସ୍ଥାନୀୟ ବାସିନ୍ଦା ତୁରନ୍ତ ଅଗ୍ନିଶମ ସେବାକୁ ସୂଚନା ଦେଇଥିଲେ । ନରସିଙ୍ଗଡି ଅଗ୍ନିଶମ ସେବାର ଏକ ଦଳ ଘଟଣାସ୍ଥଳରେ ପହଞ୍ଚି ପ୍ରାୟ ଏକ ଘଣ୍ଟାର ପ୍ରୟାସ ପରେ ନିଆଁକୁ ନିୟନ୍ତ୍ରଣ କରିଥିଲେ । ନିଆଁ ଲିଭାଇବା ପରେ ଗ୍ୟାରେଜ ଭିତରୁ ଚଞ୍ଚଳ ଚନ୍ଦ୍ର ଭୌମିକଙ୍କ ପୋଡ଼ିଯାଇଥିବା ମୃତଦେହ ଉଦ୍ଧାର କରାଯାଇଥିଲା । ପ୍ରତ୍ୟକ୍ଷଦର୍ଶୀଙ୍କ ଅନୁଯାୟୀ, ଚଞ୍ଚଳ ଦୀର୍ଘ ସମୟ ଧରି ନିଆଁରେ ଜଳି ମୃତ୍ୟୁବରଣ କରିଥିଲେ । ପରିବାର ଏହି ଘଟଣାକୁ ଏକ ଯୋଜନାବଦ୍ଧ ହତ୍ୟା ବୋଲି ଅଭିଯୋଗ କରିଛନ୍ତି ।

ଦୋଷୀଙ୍କୁ ତୁରନ୍ତ ଗିରଫ କରି କଠୋର ଦଣ୍ଡ ଦେବାକୁ ସେମାନେ ଦାବି କରିଛନ୍ତି । ଏହି ଘଟଣା ପରେ, ଅଞ୍ଚଳରେ ଉତ୍ତେଜନା ଦେଖାଦେଇଛି, ଯାହା ସଂଖ୍ୟାଲଘୁ ସମ୍ପ୍ରଦାୟର ସୁରକ୍ଷା ନେଇ ନୂତନ ଚିନ୍ତା ସୃଷ୍ଟି କରିଛି ।

ପୋଲିସ କହିଛି ଯେ ଘଟଣାସ୍ଥଳରୁ ପ୍ରମାଣ ସଂଗ୍ରହ କରାଯାଇଛି, ସିସିଟିଭି ଫୁଟେଜ୍ ଯାଞ୍ଚ କରାଯାଉଛି ଏବଂ ମାମଲା ତଦନ୍ତ ଜାରି ରହିଛି ।
ଏହାରି ମଧ୍ୟରେ ସ୍ଥାନୀୟ ହିନ୍ଦୁ ସମ୍ପ୍ରଦାୟର ନେତାମାନେ ଏହି ନିର୍ମମ ହତ୍ୟାକାଣ୍ଡର ତୀବ୍ର ନିନ୍ଦା କରିଛନ୍ତି । ସେମାନେ ଦୋଷୀଙ୍କୁ ତୁରନ୍ତ ଚିହ୍ନଟ ଏବଂ ଗିରଫ କରିବାକୁ ଦାବି କରିଛନ୍ତି ଏବଂ ଅଞ୍ଚଳର ସଂଖ୍ୟାଲଘୁ ସମ୍ପ୍ରଦାୟର ସୁରକ୍ଷା ସୁନିଶ୍ଚିତ କରିବା ପାଇଁ କଡ଼ା ପଦକ୍ଷେପ ନେବାକୁ ପ୍ରଶାସନକୁ ନିବେଦନ କରିଛନ୍ତି ।