Beer Cheaper Than Water / ଏଠାରେ ପାଣି ବୋତଲ ଠାରୁ ଶସ୍ତାରେ ମିଲେ ବିୟର। ଭାଇରାଲ ଭିଡ଼ିଓରୁ ଜାଣନ୍ତୁ ସତ

ଭୁବନେଶ୍ୱର:  ସୋସିଆଲ ମିଡିଆରେ ଏବେ ଭାଇରାଲ ହେଉଛି ଯେ  କିଛି ସ୍ଥାନରେ ବୋତଲ ପାଣିଠାରୁ ବିୟର ଶସ୍ତା । ଏହାକୁ ନେଇ ଏକ ଭିଡିଓ ମଧ୍ୟ ଇନଷ୍ଟାଗ୍ରାମରେ ବେଶ ଚର୍ଚ୍ଚାରେ ରହିଛି। ଗୋପିକାପାଡିଆ ନାମକ ଜଣେ ଇନଷ୍ଟାଗ୍ରାମ ବ୍ୟବହାରକାରୀ ୟୁରୋପର ଜୀବନଶୈଳୀ ଏବଂ ସେଠାକାର ରୋଚକ ତଥ୍ୟ ନେଇ ଭିଡିଓ ପ୍ରସ୍ତୁତ କରନ୍ତି। ସେହି ସିରିଜର ଏକ ଭିଡିଓରେ ୟୁରୋପର ଏକ ସୁପରମାର୍କେଟ୍‌ର ଦୃଶ୍ୟ ଦେଖାଇ ପାଣି ଓ ବିୟରର ମୂଲ୍ୟ ମଧ୍ୟରେ ଥିବା ତଫାତ ବିଷୟରେ କୁହାଯାଇଛି। ଭିଡିଓରେ ଦାବି କରାଯାଇଛି ଯେ ଗୋଟିଏ ବୋତଲ ପାଣି ପାଇଁ ପ୍ରାୟ ୨୫୦ ଟଙ୍କା ଦେବାକୁ ପଡୁଥିବା ବେଳେ ବିୟରର ଏକ କ୍ୟାନ୍ ପ୍ରାୟ ୧୫୦ ଟଙ୍କାରେ ମିଳୁଛି। ଏହି ଦାବି ଭାରତୀୟଙ୍କୁ ଆଶ୍ଚର୍ଯ୍ୟ କରିଛି। କାରଣ ଭାରତରେ ସାଧାରଣତଃ ପାଣିର ବୋତଲ ବେଶ ଶସ୍ତା ଏବଂ ବିୟର ତୁଳନାରେ ଏହାର ଦାମ ବହୁତ କମ୍ ଥାଏ।

ପ୍ରକୃତରେ କ’ଣ ସତ?

ଏହି ଦାବିରେ କିଛିଟା ସତ୍ୟତା ରହିଛି, କିନ୍ତୁ ଏହାକୁ ସମଗ୍ର ୟୁରୋପ ପାଇଁ ଲାଗୁ କରିବା ଠିକ୍ ନୁହେଁ। ୟୁରୋପର ପ୍ରତ୍ୟେକ ଦେଶ, ସହର ଏବଂ ଅଞ୍ଚଳରେ ପାଣି ଓ ବିୟରର ମୂଲ୍ୟ ଭିନ୍ନ ହୋଇଥାଏ। ସାଧାରଣ ସୁପରମାର୍କେଟ୍‌ରେ ବୋତଲ ପାଣି ସାଧାରଣତଃ ଶସ୍ତାରେ ମିଳିଥାଏ। କିନ୍ତୁ ରେଷ୍ଟୁରାଣ୍ଟ, ବାର ଏବଂ ବିଶେଷକରି ପର୍ଯ୍ୟଟନସ୍ଥଳୀରେ ପାଣିର ଦାମ ବହୁତ ବଢ଼ିଯାଇପାରେ। ଏହାର ବିପରୀତରେ କିଛି ଦେଶରେ ସ୍ଥାନୀୟ ବିୟରର ଉତ୍ପାଦନ ବହୁଳ ହୋଇଥିବାରୁ ଏହା ତୁଳନାମୂଳକ ଭାବେ ଶସ୍ତାରେ ମିଳେ।

ଏଠାରେ  ଦେଖିବାକୁ ମିଳେ ଏହି ଓଲଟା ଗଣିତ

କ୍ରୋଏସିଆର ଲୋକପ୍ରିୟ ପର୍ଯ୍ୟଟନ ସହର ଡୁବ୍ରୋଭନିକ୍‌କୁ ଏହାର ଏକ ଉଦାହରଣ ଭାବେ ନିଆଯାଇପାରେ। ପର୍ଯ୍ୟଟନସ୍ଥଳୀରେ ଛୋଟ ବୋତଲ ପାଣିର ଦାମ ଅଧିକ ହୋଇପାରେ। ଅନ୍ୟପଟେ ସ୍ଥାନୀୟ ବିୟରର ଦାମ ତୁଳନାତ୍ମକ ଭାବେ କମ୍ ରହିପାରେ। ଫଳରେ ପର୍ଯ୍ୟଟକଙ୍କୁ ପାଣି ଅପେକ୍ଷା ବିୟର ଶସ୍ତା ଲାଗିପାରେ। ଚେକ୍ ଗଣରାଜ୍ୟ, ଜର୍ମାନୀ, ପୋଲାଣ୍ଡ ଓ ସ୍ଲୋଭାକିଆ ଭଳି ଦେଶରେ ମଧ୍ୟ ବିୟରର ଦୀର୍ଘ ପରମ୍ପରା ରହିଛି। ସ୍ଥାନୀୟ ବିୟର ଅନେକ ସ୍ଥାନରେ ସୁଲଭ ମୂଲ୍ୟରେ ମିଳେ। ତେବେ ରେଷ୍ଟୁରାଣ୍ଟ କିମ୍ବା ପର୍ଯ୍ୟଟନସ୍ଥଳୀରେ ପାଣି ସହିତ ସେବା ଶୁଳ୍କ ଓ ଅତିରିକ୍ତ ମାର୍କଅପ୍ ଯୋଡ଼ାଯାଇଥିବାରୁ ଏହାର ମୂଲ୍ୟ ବଢ଼ିପାରେ।

ପଢନ୍ତୁ ଏହି ଖବର:ସିଂହ ଆକ୍ରମଣ ଭିଡିଓ ଭାଇରାଲ: ୩୦ ମିନିଟ୍ ପାଇଁ ସିଂହର ପଞ୍ଝାରେ ଫସି ରହିଥିଲେ ଯୁବକ

ୟୁରୋପର ସବୁସ୍ଥାନରେ ଏକା ନିୟମ ନୁହେଁ

ତେବେ ଏହାକୁ ସମଗ୍ର ୟୁରୋପର ନିୟମ ବୋଲି ଧରିନେବା ଭୁଲ ହେବ। ନରୱେ, ସ୍ୱିଜରଲ୍ୟାଣ୍ଡ ଓ ଆଇସଲ୍ୟାଣ୍ଡ ଭଳି ଦେଶରେ ବିୟରର ମୂଲ୍ୟ ଅନ୍ୟ ଅନେକ ୟୁରୋପୀୟ ଦେଶ ତୁଳନାରେ ଅଧିକ ହୋଇପାରେ। ସେଠାରେ ପାଣିଠାରୁ ବିୟର ଶସ୍ତା ବୋଲି କହିବା ସଠିକ୍ ନୁହେଁ। ଅର୍ଥାତ୍, ପାଣି ଓ ବିୟରର ମୂଲ୍ୟ ଦେଶ, ସହର, ଦୋକାନ ଏବଂ ବିକ୍ରୟ ସ୍ଥାନ ଉପରେ ନିର୍ଭର କରେ। ସୁପରମାର୍କେଟ୍‌ରେ ଯେଉଁ ମୂଲ୍ୟ ରହେ, ସେହି ଜିନିଷର ଦାମ ରେଷ୍ଟୁରାଣ୍ଟ କିମ୍ବା ପର୍ଯ୍ୟଟନସ୍ଥଳୀରେ ସମାନ ରହିବା ଜରୁରୀ ନୁହେଁ। ଭାରତରେ ସାଧାରଣ ବୋତଲ ପାଣି ପ୍ରାୟ ୧୦ରୁ ୨୦ ଟଙ୍କାରେ ମିଳିପାରୁଥିବା ବେଳେ ବିୟରର ମୂଲ୍ୟ ଏହାଠାରୁ ଅନେକ ଅଧିକ। ତେଣୁ ୟୁରୋପର କିଛି ପର୍ଯ୍ୟଟନସ୍ଥଳୀରେ ପାଣିଠାରୁ ବିୟର ଶସ୍ତା ଦେଖାଯିବା ଭାରତୀୟଙ୍କ ପାଇଁ ନିଶ୍ଚିତ ଭାବେ ଚକିତ କରିବା ଭଳି ଘଟଣା।

ତେବେ ଭାଇରାଲ ଦାବିର ନିଷ୍କର୍ଷ ହେଉଛି—ୟୁରୋପର କିଛି ସ୍ଥାନରେ ନିର୍ଦ୍ଦିଷ୍ଟ ପରିସ୍ଥିତିରେ ପାଣିଠାରୁ ବିୟର ଶସ୍ତା ହୋଇପାରେ, କିନ୍ତୁ ଏହା ସମଗ୍ର ୟୁରୋପର ସାଧାରଣ ଚିତ୍ର ନୁହେଁ।