Brazil Serial Killer / ମହିଳା ବେଶରେ ଲୁଚିଥିଲା ସନ୍ଦିଗ୍ଧ ହତ୍ୟାକାରୀ, ଧରାପଡ଼ିବା ପରେ କହିଲା ‘୮୦ ଜଣଙ୍କୁ ମାରିଛି’ !

ପୋଲିସଠାରୁ ବଞ୍ଚିବା ପାଇଁ ଜଣେ ସନ୍ଦିଗ୍ଧ ହତ୍ୟାକାରୀ ହଠାତ୍ ଧାରଣ କଲା ମହିଳା ବେଶ । ମୁଣ୍ଡରେ ଲମ୍ବା କେଶର ଓ୍ବିଗ୍‌, ଦେହରେ ଡ୍ରେସ୍, ପାଦରେ ସ୍ୟାଣ୍ଡେଲ ଆଉ ଆଖିରେ କଳା ଚଷମା…ଦେଖିଲେ କେହି ବି ତାଙ୍କୁ ଚିହ୍ନିବା କଷ୍ଟକର । କିନ୍ତୁ ପୋଲିସର ନଜରରୁ ସେ ବେଶି ସମୟ ଲୁଚିପାରିଲା ନାହିଁ । ଆଉ ଧରାପଡ଼ିବା ପରେ ଯାହା କହିଲା, ତାହା ଶୁଣି ପୋଲିସ ହୋଇଗଲା ଚକିତ ।

ବ୍ରାଜିଲରେ ଏକ ଆଶ୍ଚର୍ଯ୍ୟକର ଘଟଣା ସାମ୍ନାକୁ ଆସିଛି । ଏକାଧିକ ହତ୍ୟା ମାମଲାରେ ସନ୍ଦେହ ଘେରରେ ଥିବା ୩୩ ବର୍ଷୀୟ ଜଣେ ବ୍ୟକ୍ତି ପୋଲିସଠାରୁ ବଞ୍ଚିବା ପାଇଁ ମହିଳା ବେଶ ଧାରଣ କରିଥିବା ବେଳେ ଧରାପଡ଼ିଛି । ପଚରାଉଚରା ସମୟରେ ସେ ନିଜ ଜୀବନରେ ପ୍ରାୟ ୮୦ ଜଣଙ୍କୁ ହତ୍ୟା କରିଥିବା ନେଇ ପୋଲିସ୍‌ ସାମ୍ନାରେ କହିଛି । ତେବେ ଏହି ଦାବିର ସତ୍ୟତା ଏପର୍ଯ୍ୟନ୍ତ ଯାଞ୍ଚ ହୋଇନାହିଁ ।

ରିପୋର୍ଟ ଅନୁସାରେ, ଘଟଣାଟି ବ୍ରାଜିଲର ଉତ୍ତର-ପୂର୍ବ ରାଜ୍ୟ ପାରାଇବାର । ପୋଲିସ ଏକ ଅପରେସନ ସମୟରେ ୩୩ ବର୍ଷୀୟ ଜୋରଲାନ ଆଲଭେସ ଦା ସିଲଭାଙ୍କୁ ଗିରଫ କରିଛି । ସେତେବେଳେ ସେ ମୁଣ୍ଡରେ ଲମ୍ବା କଳା କେଶ ଥିବା ୱିଗ୍ ଲଗାଇଥିଲେ । ଏହା ସହିତ ସେ ମହିଳାଙ୍କ ସ୍ୟାଣ୍ଡେଲ, କଳା ଚଷମା ଏବଂ ନେଲ୍ ପଲିସ୍ ମଧ୍ୟ ଲଗାଇଥିଲେ । ତାଙ୍କ ସହ ପ୍ରାୟ ୨ ବର୍ଷର ଏକ ଶିଶୁ ମଧ୍ୟ ଥିଲା । ଗିରଫ ସମୟରେ ପୋଲିସ ତାଙ୍କ ମୁଣ୍ଡରୁ ୱିଗ୍ ହଟାଇବା ପରେ ତାଙ୍କ ପ୍ରକୃତ ପରିଚୟ ସାମ୍ନାକୁ ଆସିଥିଲା । ୱିଗ୍ ତଳେ ତାଙ୍କର ଛୋଟ କେଶ ଥିଲା ।

ପୋଲିସର ସୂଚନା ଅନୁସାରେ, ଏହାପୂର୍ବରୁ ଜୋରଲାନ ଏବଂ ତାଙ୍କ କିଛି କଥିତ ସହଯୋଗୀ ଥିବା ଏକ ଗାଡ଼ିକୁ ଅଟକାଇ ତଲାସୀ କରାଯାଇଥିଲା । ଗାଡ଼ିରେ ଥିବା ଜଣେ ବ୍ୟକ୍ତିଙ୍କୁ ପୋଲିସ ଧରିଥିଲା, କିନ୍ତୁ ଜୋରଲାନ ସେଠାରୁ ଖସି ପଳାଇବାରେ ସଫଳ ହୋଇଥିଲେ । ପରେ ପୋଲିସ ତାଙ୍କୁ ଖୋଜିବା ଆରମ୍ଭ କରିଥିଲା । ଶେଷରେ ମହିଳା ବେଶରେ ତାଙ୍କୁ ଧରାଯାଇଥିଲା। ପରିଚୟ ଲୁଚାଇବା ଏବଂ ପୋଲିସକୁ ଭ୍ରମିତ କରିବା ପାଇଁ ସେ ଏପରି ବେଶ ଧାରଣ କରିଥିବା ଅନୁମାନ କରାଯାଉଛି ।

ପୋଲିସ ଅନୁସାରେ, ଜୋରଲାନଙ୍କ ଉପରେ ସଂଗଠିତ ଅପରାଧ ସହ ଜଡ଼ିତ ଗ୍ୟାଙ୍ଗ ପାଇଁ ହତ୍ୟା କରିଥିବା ଅଭିଯୋଗ ରହିଛି। ଗତ ପ୍ରାୟ ୩ ମାସ ମଧ୍ୟରେ ଅତି କମରେ ୧୫ଟି ହତ୍ୟା ମାମଲାରେ ତାଙ୍କ ନାମ ସାମ୍ନାକୁ ଆସିଥିବା ପୋଲିସ କହିଛି ।

କିନ୍ତୁ ପଚରାଉଚରା ସମୟରେ ଜୋରଲାନ ନିଜ ଜୀବନରେ ପ୍ରାୟ ୮୦ ଜଣଙ୍କୁ ହତ୍ୟା କରିଥିବା କଥା କହିଥିବା ଜଣାପଡ଼ିଛି । ଏପରିକି ସେ ମାତ୍ର ୧୩ ବର୍ଷ ବୟସରେ ପ୍ରଥମ ହତ୍ୟା କରିଥିବା ଦାବି ମଧ୍ୟ କରିଛି । ତେବେ ପୋଲିସ ଏହି ଦାବିଗୁଡ଼ିକର ସତ୍ୟତା ଯାଞ୍ଚ କରୁଛି ।

ବ୍ରାଜିଲରେ ଅନେକ ହତ୍ୟା ମାମଲାରେ ଦୋଷୀ ସାବ୍ୟସ୍ତ ହୋଇଥିବା ଅପରାଧୀଙ୍କ ମଧ୍ୟରେ ପେଡ୍ରୋ ରୋଡ୍ରିଗ୍ସ ଫିଲ୍ହୋଙ୍କ ନାମ ସାମ୍ନାକୁ ଆସେ । ତାଙ୍କୁ ୭୧ଟି ହତ୍ୟା ମାମଲାରେ ଦୋଷୀ ସାବ୍ୟସ୍ତ କରାଯାଇଥିଲା । ତେବେ ସେ ନିଜେ ୧୦୦ରୁ ଅଧିକ ଲୋକଙ୍କୁ ହତ୍ୟା କରିଥିବା ଦାବି କରିଥିଲେ । ଏପରି ସ୍ଥିତିରେ ଜୋରଲାନଙ୍କ ୮୦ ହତ୍ୟାର ଦାବି ଯଦି ତଦନ୍ତରେ ପ୍ରମାଣିତ ହୁଏ, ତେବେ ଏହା ବ୍ରାଜିଲର ଚର୍ଚ୍ଚିତ ଅପରାଧ ମାମଲାଗୁଡ଼ିକ ମଧ୍ୟରୁ ଏକ ବଡ଼ ଘଟଣା ହୋଇପାରେ ।