Argus News - କିଡନୀ ପାଇଁ କର୍କଟ ରୋଗୀଙ୍କୁ ବିବାହ କରିଥିଲେ ମହିଳା, ହେଲେ ଏମିତି ବଦଳିଗଲା ଜୀବନର ମୋଡ....

ମୃତ୍ୟୁର ଦ୍ଵାରଦେଶରୁ ଆଶାର ଆଲୋକ । କେବଳ ବଞ୍ଚିବାର ରାହା ଖୋଜୁଥିଲେ ମହିଳା । ହେଲେ କ୍ୟାନସର ପୀଡିତଙ୍କୁ ଭେଟିଲା ପରେ ବଦଳିଗଲା ଜୀବନର ମୋଡ । ଏବେ ଆଉ ନିଜ ପାଇଁ ନୁହେଁ, ନିଜ ଜୀବନସାଥି ପାଇଁ ଜୀବନ ଜୀଇବାକୁ ଅଣ୍ଟା ଭିଡିଲେ । ହାରିଗଲା ରୋଗ ଜିତିଗଲା ପ୍ରେମ ।

ଏମିତି ଏକ କାହାଣୀ ଶୁଣିବାକୁ ମିଳିଛି ଚୀନରେ । ଚୀନର ୨୪ ବର୍ଷୀୟ ୱାଙ୍ଗ ସିଆଓଙ୍କର ୟୁରୋମିଆ ନାମକ ରୋଗ ଥିଲା । ଡାକ୍ତର କହିଥିଲେ, ଯଦି ଶୀଘ୍ର କିଡନୀ ଟ୍ରାନ୍ସପ୍ଲାଣ୍ଟ ନକରାଯାଏ, ତେବେ ମହିଳା ବର୍ଷେ ଭିତରେ ମୃତ୍ୟୁବରଣ କରିବେ । କିନ୍ତୁ ମହିଳା ଜଣକ ବଞ୍ଚିବାକୁ ଚାହୁଁଥିଲେ । ଆଉ ତାଙ୍କ ପାଖରେ ପର୍ଯ୍ୟାପ୍ତ ଟଙ୍କା ନଥିଲା କିଡନୀ ଟ୍ରାନ୍ସପ୍ଲାଣ୍ଟ ପାଇଁ । ସେଥିପାଇଁ ସେ ଚାହୁଁଥିଲେ, କୌଣସି କ୍ୟାନସର ବ୍ୟକ୍ତି, ଯାହାଙ୍କର ବଞ୍ଚିବାର ସମୟସୀମା କମ ରହିଛି, ତାଙ୍କୁ ବିବାହ କରି ତାଙ୍କର ଯତ୍ନ ନେବେ , ଏବଂ ସେ ତାଙ୍କ ଶେଷ ସମୟରେ ସିଆଓଙ୍କୁ ତାଙ୍କର କିଡନୀ ଦେଇପାରିବେ । ଏଥିପାଇଁ ସେ ସୋସିଆଲ ମିଡିଆରେ ଏକ ପୋଷ୍ଟ କରିଥିଲେ ।

ଆଉ ତାଙ୍କର ଏପରି ଚୁକ୍ତିନାମାରେ ରାଜି ହୋଇଥିଲେ, ୨୭ ବର୍ଷୀୟ ଜଣେ ଯୁବକ ୟୁ ଝେନପିଙ୍ଗ । ଯିଏ କର୍କଟ ରୋଗରେ ପୀଡିତ ଥିଲେ । ଆଉ ତାଙ୍କ ପାଖରେ ବଞ୍ଚିବାର ସମୟ ମଧ୍ୟ କମ ଥିଲା । ତାଙ୍କର ରକ୍ତଗ୍ରୁପ ମଧ୍ୟ ସିଆଓଙ୍କ ସହ ମିଶୁଥିଲା । ଯାହାକୁ ନେଇ ସେ ସିଆଓଙ୍କୁ ବିବାହ କରିବାକୁ ନିଷ୍ପତ୍ତି ନେଇଥିଲେ । ଉଭୟଙ୍କ ମଧ୍ୟରେ ବିବାହ କେବଳ ବୁଝାମଣା ଥିଲା । ସିଆଓ କହିଥିଲେ, ସେ ଝେନପିଙ୍ଗଙ୍କ ଶେଷ ସମୟ ଯାଏଁ ତାଙ୍କ ସେବା କରିବେ ଆଉ ମୃତ୍ୟୁ ପରେ ତାଙ୍କ କିଡନୀ ନେବେ ।

ଅଧିକ ପଢନ୍ତୁ : ସୁନା ଦରକୁ ନେଇ ବାବା ଭେଙ୍ଗାଙ୍କ ବଡ଼ ଭବିଷ୍ୟବାଣୀ କହିଲେ...

ହେଲେ ଏହି ବୁଝାମଣା ଧିରେଧିରେ ପ୍ରେମରେ ପରିଣତ ହୋଇଥିଲା । ଯେତେବେଳେ ସିଆଓ ଝେନପିଙ୍ଗଙ୍କ ଯତ୍ନ ନେବା ଆରମ୍ଭ କରିଥିଲେ । ଉଭୟ ଉଭୟଙ୍କ ସହ ସମୟ ବିତାଇବା ପରେ ସେମାନଙ୍କ ମଧ୍ୟରେ ପ୍ରେମ ସମ୍ପର୍କ ବଢିଥିଲା । ସିଆଓ ଝେନପିଙ୍ଗଙ୍କ ଚିକିତ୍ସା ପାଇଁ ହାତରେ ଫୁଲତୋଡା ତିଆରି କରି ବିକ୍ରି କରିବା ଆରମ୍ଭ କରିଥିଲେ ।

୨୦୧୪ ମଧ୍ୟଭାଗ ସୁଦ୍ଧା, ୟୁଙ୍କ ଅବସ୍ଥା ସ୍ଥିର ହୋଇଥିଲା ଏବଂ ୱାଙ୍ଗଙ୍କ ଡାଏଲିସିସ୍ ଆବଶ୍ୟକତା ମଧ୍ୟ କମିଥିଲା । ଏକ ଚୁକ୍ତିରୁ ଆରମ୍ଭ ହୋଇଥିବା ଏହି ସମ୍ପର୍କ ପ୍ରେମ କାହାଣୀରେ ଶେଷ ହୋଇଥିଲା । ଉଭୟଙ୍କ କାହାଣୀ ଏବେ ସୋସିଆଲ ମିଡିଆରେ ଖୁବ ଚର୍ଚ୍ଚା ସୃଷ୍ଟି କରିଛି ।