ଭେନେଜୁଏଲାରେ ଆମେରିକାର ସାମରିକ କାର୍ଯ୍ୟାନୁଷ୍ଠାନ ପରେ କଲମ୍ବିଆ ଉପରେ ଆଖି । ଯାହାଫଳରେ ଏବେ କଲମ୍ବିଆ ଏବଂ ଆମେରିକା ସମ୍ପର୍କରେ ଏବେ ଉତ୍ତେଜନା ଦେଖିବାକୁ ମିଳୁଛି । ଏସବୁ ମଧ୍ୟରେ କଲମ୍ବିଆ ରାଷ୍ଟ୍ରପତି ଗୁସ୍ତାଭୋ ପେଟ୍ରୋ ସିଧାସଳଖ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଚ୍ୟାଲେଞ୍ଜ କରି କହିଛନ୍ତି, "ଆସନ୍ତୁ ଏବଂ ମୋତେ ଧରନ୍ତୁ, ମୁଁ ଏଠାରେ ଅପେକ୍ଷା କରିଛି ।"

ପେଟ୍ରୋଙ୍କ ଏହି ବୟାନ ଲାଟିନ୍ ଆମେରିକାରେ ରାଜନୈତିକ ଅସ୍ଥିରତା ସୃଷ୍ଟି କରିଛି । ସେ ଭେନେଜୁଏଲାରେ ଆମେରିକାର କାର୍ଯ୍ୟାନୁଷ୍ଠାନକୁ ମଧ୍ୟ କଡ଼ା ସମାଲୋଚନା କରିଛନ୍ତି । ସେ ଚେତାବନୀ ଦେଇଛନ୍ତି ଯେ ଯଦି ଆମେରିକା ଆକ୍ରମଣ କରେ, ତେବେ ଦେଶର ଚାଷୀମାନେ ଅସ୍ତ୍ର ଉଠାଇପାରିବେ ଏବଂ ପାହାଡ଼ରେ ଗରିଲା ଯୁଦ୍ଧ ଆରମ୍ଭ ହୋଇପାରେ ।

ପେଟ୍ରୋ କହିଛନ୍ତି ଯେ ଯଦି ଆମେରିକା ସେହି ରାଷ୍ଟ୍ରପତିଙ୍କୁ ଗିରଫ କରେ, ଯାହାଙ୍କୁ ଦେଶର ଅଧିକାଂଶ ଲୋକ ଭଲ ପାଆନ୍ତି ଏବଂ ସମ୍ମାନ କରନ୍ତି । ତେବେ ଜନ ଆକ୍ରୋଶ ଜାଗୁଆର ପରି ବ୍ୟାପିବ । ସେ ଏହା ମଧ୍ୟ କହିଛନ୍ତି ଯେ ସେ ୧୯୯୦ ଦଶକରେ ଅସ୍ତ୍ର ପରିତ୍ୟାଗ କରିଥିଲେ, କିନ୍ତୁ ଦେଶକୁ ରକ୍ଷା କରିବା ପାଇଁ ପୁଣି ଅସ୍ତ୍ର ଉଠାଇବାକୁ ସଂକୋଚ କରିବେ ନାହିଁ।

ଗୁସ୍ତାଭୋ ପେଟ୍ରୋ ନିଜେ ଜଣେ ପୂର୍ବତନ ବାମପନ୍ଥୀ ଗରିଲା ନେତା ଥିଲେ ଏବଂ ପରେ ରାଜନୀତିରେ ପ୍ରବେଶ କରିଥିଲେ । ଏହି ପୃଷ୍ଠଭୂମିରେ, ତାଙ୍କର ବୟାନକୁ ଅତ୍ୟନ୍ତ ଗମ୍ଭୀର ବିବେଚନା କରାଯାଏ। ଟ୍ରମ୍ପ କହିଥିଲେ ଯେ କଲମ୍ବିଆକୁ ଆମେରିକାରେ କୋକେନ୍ ବିକ୍ରି କରୁଥିବା ଜଣେ ଅସୁସ୍ଥ ବ୍ୟକ୍ତି ଦ୍ୱାରା ପରିଚାଳିତ କରାଯାଉଛି । ଟ୍ରମ୍ପ୍ ମଧ୍ୟ କହିଛନ୍ତି ଯେ କଲମ୍ବିଆ ବିରୁଦ୍ଧରେ ସାମରିକ କାର୍ଯ୍ୟାନୁଷ୍ଠାନ ନେବା ତାଙ୍କ ପାଇଁ ଯଥାର୍ଥ । ଯାହା ବିବାଦକୁ ଆହୁରି ଖୋରାକ ଯୋଗାଇଛି ।

କଲମ୍ବିଆର ବୈଦେଶିକ ମନ୍ତ୍ରଣାଳୟ ଏକ ବିବୃତ୍ତି ଜାରି କରି କହିଛି ଯେ ଦେଶ ଅନ୍ତର୍ଜାତୀୟ ସମ୍ପର୍କରେ ଆଲୋଚନା ଏବଂ ସହଯୋଗକୁ ସମର୍ଥନ କରେ। ତଥାପି, ଏଥିରେ ସ୍ପଷ୍ଟ ଭାବରେ କୁହାଯାଇଥିଲା ଯେ ଧମକ କିମ୍ବା ବଳ ପ୍ରୟୋଗ ଗ୍ରହଣ କରାଯିବ ନାହିଁ ।

ସୂଚନା ଅନୁସାରେ, ଅକ୍ଟୋବରରେ ଟ୍ରମ୍ପ୍ ବେଆଇନ ନିଶା କାରବାରରେ ସମ୍ପୃକ୍ତି ପାଇଁ ପେଟ୍ରୋ ଏବଂ ତାଙ୍କ ପରିବାରର କିଛି ସଦସ୍ୟଙ୍କ ଉପରେ କଟକଣା ଲଗାଇଥିଲେ । କଲମ୍ବିଆ ହେଉଛି ବିଶ୍ୱର ସର୍ବବୃହତ କୋକେନ୍ ଉତ୍ପାଦକ । କୋକା ମୁଖ୍ୟତଃ କଲମ୍ବିଆ, ପେରୁ ଏବଂ ବୋଲିଭିଆରେ ଚାଷ କରାଯାଏ ।

ମାଦୁରୋ ମଧ୍ୟ ଟ୍ରମ୍ପଙ୍କୁ ଚ୍ୟାଲେଞ୍ଜ କରିଥିଲେ

ଅଗଷ୍ଟ ମାସ ପୂର୍ବରୁ ଭେନେଜୁଏଲା ରାଷ୍ଟ୍ରପତି ନିକୋଲାସ୍ ମାଦୁରୋ ଟ୍ରମ୍ପଙ୍କୁ "ଆସନ୍ତୁ ଏବଂ ମୋତେ ଧରି ଆଣନ୍ତୁ" ବୋଲି ଚ୍ୟାଲେଞ୍ଜ କରିଥିଲେ । ଆଉ ଏହା ପରେ ଆମେରିକା ଭେନେଜୁଏଲାରେ ସାମରିକ କାର୍ଯ୍ୟାନୁଷ୍ଠାନ କରିଥିଲା । ରାଷ୍ଟ୍ରପତି ନିକୋଲାସ୍‌ ମାଦୁରୋ ଓ ତାଙ୍କ ପତ୍ନୀଙ୍କୁ ଗିରଫ କରିଥିଲା ।