ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ସବୁବେଳେ ଭଲ ପାଅନ୍ତ ଚର୍ଚ୍ଚା ଭିତରେ ରହିବାକୁ । ବେଳେ ବେଳେ ଏମିତି କିଛି ମନ୍ତବ୍ୟ ରଖନ୍ତି ଯାହା ତାଙ୍କୁ ଆପେ ଆପେ ବିବାଦୀୟ ଓ ଚର୍ଚ୍ଚା ପରିସରକୁ ଟାଣି ଆଣେ । ଏସବୁ ଭିତରେ ଋଷ-ୟୁକ୍ରେନ ଯୁଦ୍ଧକୁ ନେଇ ଏକ ଆଶ୍ଚର୍ଯ୍ୟଜନକ ବୟାନ ଦେଇଛନ୍ତି ଟ୍ରମ୍ଫ । ଟ୍ରମ୍ପ ମଜାଳିଆ ଅନ୍ଦାଜରେ କହିଥିଲେ ଯେ ଯଦି ସେ ରୁଷ ଏବଂ ୟୁକ୍ରେନ ମଧ୍ୟରେ ଶାନ୍ତି ଚୁକ୍ତି କରିବାରେ ସଫଳ ହୁଅନ୍ତି, ତେବେ ହୁଏତ ତାଙ୍କର ସ୍ୱର୍ଗ ଯିବାର ସମ୍ଭାବନା ବଢ଼ିଯିବ ।

ମଙ୍ଗଳବାର ଏକ ଆମେରିକୀୟ ଟିଭି ଚ୍ୟାନେଲ ସହିତ ଆଲୋଚନା ସମୟରେ ସେ କହିଥିଲେ, 'ମୁଁ ସ୍ୱର୍ଗ ଯିବାକୁ ଚେଷ୍ଟା କରୁଛି। ମୁଁ ଶୁଣିଛି ଯେ ମୋର ଅବସ୍ଥା ଭଲ ନାହିଁ, ମୁଁ ସବୁଠୁ ନିମ୍ନସ୍ତରରେ ଅଛି । ଯଦି ମୁଁ ପ୍ରତି ସପ୍ତାହରେ ୭ ହଜାର ଲୋକଙ୍କୁ ହତ୍ୟା ହେବାରୁ ରକ୍ଷା କରିପାରିବି, ତେବେ ମୁଁ ଭାବୁଛି ତାହା ଏକ ବହୁତ ବଡ଼ କଥା ହେବ । ଯଦି ମୁଁ ଏହି କାମ କରିପାରିବି, ତେବେ ହୁଏତ ଏହା ହିଁ କାରଣ ହେବ ଯେ ମୁଁ ସ୍ୱର୍ଗକୁ ଯିବାର ପଥ ପାଇପାରିବି'।

ଡୋନାଲ୍ଡ ଟ୍ରମ୍ପ ପୂର୍ବରୁ ମଧ୍ୟ କହିଛନ୍ତି ଯେ, ସେ ରୁଷ-ୟୁକ୍ରେନ ଯୁଦ୍ଧ ସମାପ୍ତ କରିବାକୁ ଚାହାଁନ୍ତି ଏବଂ ଏଥିପାଇଁ ତାଙ୍କୁ ନୋବେଲ ଶାନ୍ତି ପୁରସ୍କାର ମିଳିବା ଉଚିତ । ସେ ବିଶ୍ୱାସ କରନ୍ତି ଯେ ଶାନ୍ତି ଚୁକ୍ତିର ପଦକ୍ଷେପ କେବଳ ବିଶ୍ୱ ପାଇଁ ଗୁରୁତ୍ୱପୂର୍ଣ୍ଣ ହେବ ନାହିଁ ବରଂ ତାଙ୍କ ରାଜନୈତିକ ଏବଂ ବ୍ୟକ୍ତିଗତ ଜୀବନରେ ଏକ ଐତିହାସିକ ପଦକ୍ଷେପ ମଧ୍ୟ ପ୍ରମାଣିତ ହେବ ।

ସେହିପରି ଟ୍ରମ୍ଫ ପୁଣି ଥରେ ଅପରେସନ୍ ସିନ୍ଦୂର ପରେ ଭାରତ-ପାକିସ୍ତାନ ବିବାଦକୁ ରୋକିବାରେ ତାଙ୍କର ଭୂମିକାକୁ ନେଇ ପୁଣି ପ୍ରତିକ୍ରିୟା ଦେଇଛନ୍ତି । ସେ କହିଛନ୍ତି, "ମୁଁ ଭାବୁଛି ମୁଁ ଭାରତ ଏବଂ ପାକିସ୍ତାନରେ ଅନେକ ଜୀବନ ବଞ୍ଚାଇଛି । ଉଭୟ ଦେଶ ଜୋରଦାର ଆକ୍ରମଣ କରୁଥିଲେ। ମଝି ଆକାଶରେ ଯୁଦ୍ଧ ବିମାନକୁ ଖସାଇ ଦିଆଯାଉଥିଲା। ଯଦି ମୁଁ ଏହାକୁ ଛାଡି ଦେଇଥାନ୍ତି, ତେବେ ଏହା ସମ୍ଭବତଃ ଏକ ପରମାଣୁ ଯୁଦ୍ଧ ହୋଇଥାନ୍ତା । କିନ୍ତୁ ମୁଁ ଏହି ସଂଘର୍ଷକୁ ବାଣିଜ୍ୟ ମାଧ୍ୟମରେ ସମାଧାନ କରିଥିଲି'।

ଗତବର୍ଷ ଏକ ହତ୍ୟା ଉଦ୍ୟମରୁ ବଞ୍ଚିଯିବା ପରେ ଡୋନାଲ୍ଡ ଟ୍ରମ୍ପଙ୍କ ଧାର୍ମିକ ଆଗ୍ରହ ବଢିଯାଇଛି । ଏପରିକି ସେ ତାଙ୍କ ଧାର୍ମିକ ଭାବନାକୁ ବଢାଇବା ପାଇଁ ଆଧ୍ୟାତ୍ମିକ ପରାମର୍ଶଦାତା ପାଉଲା ହ୍ୱାଇଟ୍‌ଙ୍କୁ ହ୍ବାଇଟ ହାଉସରେ ନିଯୁକ୍ତ ଦେଇଛନ୍ତି । ଜାନୁଆରୀରେ ସେ ଯେତେବେଳେ ଶପଥ ନେଇଥିଲେ ସେ କହିଥିଲେ, 'ଭଗବାନ ମୋତେ ରକ୍ଷା କରିଛନ୍ତି, ଯେଉଁଥିପାଇଁ ମୁଁ ଆମେରିକାକୁ ଆଉ ଥରେ ମହାନ କରିପାରିବି।'