ହମାସକୁ କଡ଼ା ଚେତାବନୀ ଦେଲେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଯଦି ହମାସ ଗାଜାରେ କ୍ଷମତା ଛାଡ଼ିବାକୁ ମନା କରେ ଏବଂ ଶାନ୍ତି ପ୍ରସ୍ତାବ ଗ୍ରହଣ ନକରେ ତେବେ ଏହା ସମ୍ପୂର୍ଣ୍ଣ ଧ୍ବଂସ ହୋଇଯିବ । ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ହମାସକୁ ରବିବାର ଆମେରିକା ସମୟ ସନ୍ଧ୍ୟା ୬ଟା ସୁଦ୍ଧା ଗାଜା ଶାନ୍ତି ଯୋଜନା ଗ୍ରହଣ କରିବାକୁ ଏକ ଚରମବାଣୀ ଦେଇଥିଲେ।

ଶନିବାର, ଯେତେବେଳେ CNN ଟ୍ରମ୍ପଙ୍କୁ ପଚାରିଥିଲେ ଯେ ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଗାଜାରେ ବୋମା ମାଡ଼ ବନ୍ଦ କରିବା ଏବଂ ଆମେରିକାର ଶାନ୍ତି ଯୋଜନାକୁ ସମର୍ଥନ କରନ୍ତି କି ନାହିଁ, ଡୋନାଲ୍ଡ ଟ୍ରମ୍ପ ଉତ୍ତର ଦେଇଥିଲେ, ହଁ । ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ମଧ୍ୟ ଆମେରିକାର ଶାନ୍ତି ଯୋଜନାକୁ ସମର୍ଥନ କରିଛନ୍ତି । ରବିବାର ପ୍ରସାରିତ ଏକ ସାକ୍ଷାତକାରରେ ଟ୍ରମ୍ପ କହିଥିଲେ ଯେ ସେ ଖୁବ୍ ଶୀଘ୍ର ଜାଣିପାରିବେ ଯେ ହମାସ ପ୍ରକୃତରେ ଶାନ୍ତି ପାଇଁ ପ୍ରତିବଦ୍ଧ କି ନାହିଁ ।

ଶନିବାର ଦିନ ଟ୍ରମ୍ପ ହମାସକୁ ଚେତାବନୀ ଦେଇଥିଲେ ଯେ ଯଦି ସେ ଶୀଘ୍ର ଶାନ୍ତି ପ୍ରସ୍ତାବ ଉପରେ ନିଷ୍ପତ୍ତି ନନିଏ ତେବେ ସମସ୍ତ ସମ୍ଭାବନା ଶେଷ ହୋଇଯିବ । ତାଙ୍କ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ୍ ସୋସିଆଲରେ ଟ୍ରମ୍ପ ଲେଖିଛନ୍ତି, "ବନ୍ଧକମାନଙ୍କୁ ମୁକ୍ତି ଏବଂ ଶାନ୍ତି ଚୁକ୍ତିକୁ ଚୂଡ଼ାନ୍ତ କରିବା ପାଇଁ ଇସ୍ରାଏଲ ଅସ୍ଥାୟୀ ଭାବରେ ବୋମାମାଡ଼ ବନ୍ଦ କରିଥିବାରୁ ମୁଁ ଇସ୍ରାଏଲ ପ୍ରତି କୃତଜ୍ଞତା ଜ୍ଞାପନ କରୁଛି । ହମାସକୁ ତୁରନ୍ତ ଆଗକୁ ବଢ଼ିବାକୁ ପଡିବ, ନଚେତ୍ ସବୁକିଛି ବାଜି ଲାଗିବ ।"

ଅଧିକ ପଢ଼ନ୍ତୁ: କେବେ ହେବ ବିହାର ବିଧାନସଭା ନିର୍ବାଚନ ? ମୁଖ୍ୟ ନିର୍ବାଚନ କମିଶନର କହିଦେଲେ ତାରିଖ...

ଆମେରିକାର ଶାନ୍ତି ପ୍ରସ୍ତାବ ତୁରନ୍ତ ଯୁଦ୍ଧବିରାମ ପାଇଁ ଆହ୍ୱାନ କରୁଛି । ଏଥିରେ ୭୨ ଘଣ୍ଟା ମଧ୍ୟରେ ୨୦ ଜଣ ଇସ୍ରାଏଲୀ ବନ୍ଧକ ଏବଂ ମୃତ ବ୍ୟକ୍ତିଙ୍କ ମୃତଦେହକୁ ମୁକ୍ତ କରିବା ପାଇଁ ଶହ ଶହ ପାଲେଷ୍ଟାଇନୀ ବନ୍ଦୀଙ୍କୁ ମୁକ୍ତ କରିବାର ପ୍ରସ୍ତାବ ଦିଆଯାଇଛି । ଚୁକ୍ତିନାମା ପରେ ଗାଜାକୁ ପୂର୍ଣ୍ଣ ମାନବିକ ସହାୟତା ପଠାଯିବ। ତଥାପି, ଯୋଜନାରେ ସ୍ପଷ୍ଟ ଭାବରେ ଉଲ୍ଲେଖ ଅଛି ଯେ ଗାଜା ସରକାରରେ ହମାସର କୌଣସି ଭୂମିକା ରହିବ ନାହିଁ ।
ଟ୍ରମ୍ପଙ୍କ ୨୦-ସୂତ୍ରୀ ଶାନ୍ତି ପ୍ରସ୍ତାବରେ ଶତ୍ରୁତାକୁ ଅସ୍ଥାୟୀ ବନ୍ଦ କରିବା ଏବଂ ଗାଜାରେ ଯୁଦ୍ଧ ପରବର୍ତ୍ତୀ ଶାସନ ପାଇଁ ଏକ ଯୋଜନା ଅନ୍ତର୍ଭୁକ୍ତ ଥିଲା। ହ୍ୱାଇଟ୍ ହାଉସ୍ ଏହି ଯୋଜନାକୁ ସଂଘର୍ଷର ଅନ୍ତ ଏବଂ ଅଞ୍ଚଳର ଭବିଷ୍ୟତ ଶାସନ ପାଇଁ ଏକ ବ୍ଲୁ-ପ୍ରିଣ୍ଟ ଭାବରେ ବର୍ଣ୍ଣନା କରିଛି।

ଟ୍ରମ୍ପଙ୍କ ପ୍ରସ୍ତାବ ଅନୁଯାୟୀ, ଏକ ଅସ୍ଥାୟୀ ପରିଚାଳନା ବୋର୍ଡ ଗଠନ କରାଯିବ, ଯାହାର ଅଧ୍ୟକ୍ଷତା ନିଜେ ଟ୍ରମ୍ପ କରିପାରନ୍ତି । ଏଥିରେ ପୂର୍ବତନ ବ୍ରିଟିଶ ପ୍ରଧାନମନ୍ତ୍ରୀ ଟୋନି ବ୍ଲେୟାରଙ୍କ ଭଳି ବ୍ୟକ୍ତିତ୍ୱ ସାମିଲ ହୋଇପାରିନ୍ତି । ଏହି ଯୋଜନାରେ ଏହା ମଧ୍ୟ ସ୍ପଷ୍ଟ କରାଯାଇଛି ଯେ ଗାଜା ବାସିନ୍ଦାଙ୍କୁ ବଳପୂର୍ବକ ବାହାର କରାଯିବ ନାହିଁ ଏବଂ ଯଦି ଉଭୟ ପକ୍ଷ (ଇସ୍ରାଏଲ ଏବଂ ହମାସ) ସର୍ତ୍ତାବଳୀରେ ରାଜି ହୁଅନ୍ତି ତେବେ ଯୁଦ୍ଧ ତୁରନ୍ତ ଶେଷ ହେବ ।
ରଏଟର୍ସଙ୍କ ରିପୋର୍ଟ ଅନୁଯାୟୀ, ଆମେରିକାର ବିଦେଶ ମନ୍ତ୍ରୀ ମାର୍କୋ ରୁବିଓ ରବିବାର କହିଛନ୍ତି ଯେ ଗାଜା ଯୁଦ୍ଧ ଏପର୍ଯ୍ୟନ୍ତ ସମାପ୍ତ ହୋଇନାହିଁ। ସେ ବ୍ୟାଖ୍ୟା କରିଛନ୍ତି ଯେ ହମାସ ଦ୍ୱାରା ବନ୍ଧକଙ୍କ ମୁକ୍ତି କେବଳ ପ୍ରଥମ ପର୍ଯ୍ୟାୟ, ଏବଂ ଆହୁରି ବ୍ୟବସ୍ଥା ଏପର୍ଯ୍ୟନ୍ତ ପ୍ରସ୍ତୁତ କରାଯାଉଛି ।