ଫ୍ଲାଏ ଦୁବାଇର ଫ୍ଲାଇଟ ୧୦୭୩ କୁ କ୍ରାଶ କରିବା ମାମଲାରେ ଏକ ଭୟଙ୍କର ତଥ୍ୟ ସାମ୍ନାକୁ ଆସିଛି। ଇସ୍ରାଏଲ ମିଡିଆ ମୁତାବକ, କୋ-ପାଇଲଟ ଯାଞ୍ଚ କରୁଥିବା ଅଧିକାରୀଙ୍କୁ କହିଛନ୍ତି କି, ଏହି ବିମାନ ଦୁର୍ଘଟଣା ଇସ୍ରାଏଲ ରେ କରିବାର ଯୋଜନା ଥିଲା। ଆକ୍ରମଣକାରୀ କୋ-ପାଇଲଟର ପରିଚୟ ଓମାନର ନାଗରିକ ହମାମ୍ ଅଲ୍-ହମାମୀ ଭାବେ ଚିହ୍ନଟ କରାଯାଇଛି । ସୂଚନା ଅନୁଯାୟୀ, ସେ ସିରିଆରେ ରହିବା ସମୟରେ ଚରମପନ୍ଥୀ ଚିନ୍ତାଧାରାରେ ପ୍ରଭାବିତ ହୋଇଥିଲା ଏବଂ ସେ ବିମାନକୁ ଇସ୍ରାଏଲରେ କ୍ରାସ୍ କରାଇବାକୁ ଚାହୁଁଥିଲା ।

ରିପୋର୍ଟ ଅନୁଯାୟୀ, ୨୦୨୪ ମସିହାରେ 'ଓମାନ ଏୟାର'ରେ କୋ-ପାଇଲଟ୍ ଟ୍ରେନି ଭାବେ କାର୍ଯ୍ୟ କରୁଥିବା ବେଳେ ହମାମ୍ ଚରମପନ୍ଥୀ ଇସଲାମିକ୍ ୱେବସାଇଟ୍ ଦେଖୁଥିବା ଧରାପଡ଼ିଥିଲା । ସୁରକ୍ଷା ପ୍ରତି ବିପଦ ଦର୍ଶାଇ ଓମାନ ଏୟାର ତାକୁ ଉଡ଼ାଣରୁ ସସପେଣ୍ଡ କରି ଅଫିସିଆଲ୍ କାମରେ ଲଗାଇଥିଲା । ଓମାନରୁ ବ୍ୟାନ୍ ହେବା ପରେ ସେ ଦୁବାଇ ପହଞ୍ଚିଥିଲା । ଫ୍ଲାଏଦୁବାଇ ବିନା କୌଣସି ପୃଷ୍ଠଭୂମି ଯାଞ୍ଚରେ ତାକୁ ପାଇଲଟ୍ ଭାବେ ନିଯୁକ୍ତି ଦେଇଥିଲା ।

ଏକ ରିପୋର୍ଟ ଅନୁଯାୟୀ, ଗିରଫ ହେବା ପରେ ଅଭିଯୁକ୍ତ ସାଉଦି ଆରବ ଏବଂ UAE ତଦନ୍ତକାରୀ ଦଳ ଆଗରେ ସ୍ୱୀକାର କରିଛି ଯେ, ତା’ର ପ୍ରକୃତ ଲକ୍ଷ୍ୟ ଥିଲା ବିମାନକୁ ଇସ୍ରାଏଲରେ ନେଇ କ୍ରାସ୍ କରାଇବା । ଏହି ଦାବି ସତ ହୋଇଥିଲେ ଏହା କେବଳ କକପିଟ୍ ଆକ୍ରମଣ ନୁହେଁ, ବରଂ ଏକ ବଡ଼ ଆତଙ୍କବାଦୀ ଷଡ଼ଯନ୍ତ୍ର ବୋଲି ସ୍ପଷ୍ଟ ହେଉଛି । ସେପ୍ଟେମ୍ବର ୩୦ ତାରିଖରେ ଦୁବାଇରୁ ତେଲ୍ ଅଭିଭ୍ ଯାଉଥିବା ଏହି ବିମାନରେ ୧୭୦ରୁ ଅଧିକ ଯାତ୍ରୀ ଥିଲେ । ଉଡ଼ାଣ ସମୟରେ କୋ-ପାଇଲଟ୍ ହମାମ୍ କକପିଟ୍ ଭିତରେ ଭାରତୀୟ କ୍ୟାପଟେନ୍ ସ୍ମିତ୍ ମଚ୍ଛରଙ୍କ ଉପରେ ହଠାତ୍ ଆକ୍ରମଣ କରିଥିଲା । କକପିଟ୍ ଭିତରେ ଗଣ୍ଡଗୋଳ ଦେଖି ଯାତ୍ରୀମାନେ କଷ୍ଟମଷ୍ଟେ କକ୍ପିଟ୍ ଦ୍ୱାର ଖୋଲି ଭିତରକୁ ପଶିଥିଲେ ଏବଂ ଆକ୍ରମଣକାରୀ ସହ-ପାଇଲଟକୁ କାବୁ କରିଥିଲେ ।

ଆକ୍ରମଣ ପରେ ବିମାନର ରୁଟ୍ ବଦଳାଯାଇ ସାଉଦି ଆରବର ତବୁକ୍ ବିମାନବନ୍ଦରରେ ଜରୁରୀକାଳୀନ ଅବତରଣ କରାଯାଇଥିଲା । ପାଇଲଟଙ୍କ ସମେତ ଯାତ୍ରୀ ଓ ସୁରକ୍ଷାକର୍ମୀଙ୍କ ତୁରନ୍ତ ପଦକ୍ଷେପ ଯୋଗୁଁ ଏକ ବଡ଼ ଧରଣର ବିମାନ ଦୁର୍ଘଟଣା ଏଡ଼ାଇ ଦିଆଯାଇପାରିଛି । ବର୍ତ୍ତମାନ ଏହି ସଂପୂର୍ଣ୍ଣ ମାମଲାର ତଦନ୍ତ ସଂଯୁକ୍ତ ଅରବ ଏମିରେଟ୍ସ (UAE) ନେତୃତ୍ୱରେ ଚାଲିଛି । ସାଉଦି ଆରବ ଏହାର ପ୍ରାଥମିକ ତଦନ୍ତ କରିଥିବା ବେଳେ, ରଏଟର୍ସର ରିପୋର୍ଟ ଅନୁଯାୟୀ ଇସ୍ରାଏଲର ଗୁଇନ୍ଦା ଓ ତଦନ୍ତକାରୀ ଦଳ ମଧ୍ୟ ଅଭିଯୁକ୍ତକୁ ଜେରା କରିଛନ୍ତି ।

ଏଥି ସହ ପଢନ୍ତୁ:  ଓମାନରେ ଥିଲା ବ୍ୟାନ୍; ଭାରତୀୟ ପାଇଲଟଙ୍କୁ ମଝି ଆକାଶରେ ଛୁରୀ ମାରିଥିବା କୋ-ପାଇଲଟର ସତ ଜଣାପଡ଼ିଲା...