Nepal Flood Survivor / ଆଖି ସାମ୍ନାରେ ଭାସିଗଲେ ସାଙ୍ଗ, ବଞ୍ଚାଇ ପାରିଲିନି ! ନେପାଳ ବନ୍ୟାରୁ ବଞ୍ଚିଥିବା ଦୀପକଙ୍କ ଛାତିଥରା କାହାଣୀ

ଆଖି ସାମ୍ନାରେ ମୃତ୍ୟୁର ତାଣ୍ଡବ…ଚାରିଆଡ଼େ ପାଣି, କାଦୁଅ ଆଉ ପ୍ରଳୟଙ୍କରୀ ସୁଅ । ଜୀବନ ବଞ୍ଚାଇବାକୁ କେହି ପାହାଡ଼ ଉପରକୁ ଦୌଡ଼ୁଥିଲେ, ତ କେହି ଭଙ୍ଗା ଘର ଓ ମାଟି ତଳେ ନିଜ ପରିଜନଙ୍କୁ ଖୋଜୁଥିଲେ । ନେପାଳର ଭୟାବହ ବନ୍ୟା ଯେମିତି ଛାତିଥରାଇଦେଇଛି, ସେମିତି ମୃତ୍ୟୁକୁ ଆଖି ସାମ୍ନାରେ ଦେଖି ଫେରିଥିବା ଲୋକଙ୍କ ଅନୁଭୂତି ଆହୁରି ଭୟଙ୍କର ।

ନେପାଳରେ ଭୟଙ୍କର ବନ୍ୟା ଓ ମାଟି-ପଥରର ପ୍ରବଳ ସ୍ରୋତ ଅନେକ ଗାଁ ଓ ସହରକୁ ଛାରଖାର କରିଦେଇଛି । ଭୟଙ୍କର ବନ୍ୟା ଭିତରେ ଲୋକେ ଜୀବନ ବଞ୍ଚାଇବା ପାଇଁ ଯିଏ ଯେଉଁଆଡ଼େ ପାରିଲେ ଦୌଡ଼ିଥିଲେ । ଏହି ଭୟଙ୍କର ବନ୍ୟାରୁ ବଞ୍ଚିଯାଇଥିବା ଦୀପକ ତାମାଙ୍ଗ ଏବେ ନିଜ ଛାତିଥରା ଅନୁଭୂତି ବଖାଣିଛନ୍ତି ।

ନେପାଳ-ତିବ୍ବତ ସୀମା ନିକଟ ତିମୁରେ ସହରରେ ଥିଲେ ଦୀପକ । ହଠାତ୍ ତାଙ୍କୁ ଲାଗିଥିଲା ଯେମିତି ଭୂମି ଥରୁଛି । କିନ୍ତୁ କିଛି ସମୟ ପରେ ସେ ଦେଖିଲେ, ପାଣି, କାଦୁଅ ଓ ବଡ଼ ବଡ଼ ପଥରର ଭୟଙ୍କର ସ୍ରୋତ ତିମୁରେ ବଜାର ଆଡ଼କୁ ମାଡ଼ି ଆସୁଛି । ଆଉ ଡେରି ନକରି ଜୀବନ ବଞ୍ଚାଇବା ପାଇଁ ସେ ପାହାଡ଼ ଆଡ଼କୁ ଦୌଡ଼ିଥିଲେ ।
ଦୀପକ କହିଛନ୍ତି, ତାଙ୍କ ପଛରେ ବନ୍ୟାର ପ୍ରବଳ ସ୍ରୋତ ଥିଲା, ଆଉ ସାମ୍ନାରେ ଥିଲା ପାହାଡ଼ର ବଡ଼ ଢାଲ । ତଥାପି ତାଙ୍କ ପାଖରେ ବଞ୍ଚିବା ପାଇଁ ଅନ୍ୟ କୌଣସି ରାସ୍ତା ନଥିଲା । ସେ ବିନା କିଛି ଭାବି ପାହାଡ଼ ଚଢ଼ିବା ଆରମ୍ଭ କରିଥିଲେ। ଚଢ଼ିବା ସମୟରେ ଅନେକଥର ସେ ତଳକୁ ଖସିପଡ଼ିଥିଲେ । କିନ୍ତୁ ଦୀପକ ହାର ମାନିନଥିଲେ । କଣ୍ଟା ଗଛ ଓ ଝାଡ଼ିର ସାହାଯ୍ୟ ନେଇ ସେ ଉପରକୁ ଚଢ଼ି ଚାଲିଥିଲେ ।

ଦୀପକଙ୍କ କହିବା ଅନୁସାରେ, ପ୍ରତିଥର ସେ ତଳକୁ ଖସିପଡ଼ିବା ବେଳେ ତାଙ୍କୁ ଲାଗୁଥିଲା ଯେ ଏହା ହୁଏତ ତାଙ୍କ ଜୀବନର ଶେଷ ମୁହୂର୍ତ୍ତ । ଦୀର୍ଘ ସମୟର ସଂଘର୍ଷ ପରେ ସେ ଶେଷରେ ପାହାଡ଼ ଉପରେ ପହଞ୍ଚିବାରେ ସଫଳ ହୋଇଥିଲେ । କିନ୍ତୁ ଉପରେ ପହଞ୍ଚିବା ପରେ ଯାହା ଦେଖିଲେ, ତାହା ତାଙ୍କୁ ଆହୁରି ଭୟଭୀତ କରିଦେଇଥିଲା । ତାଙ୍କ ଆଖି ସାମ୍ନାରେ ତାଙ୍କର କିଛି ବନ୍ଧୁ ବନ୍ୟାର ପ୍ରବଳ ସ୍ରୋତରେ ଭାସିଯାଇଥିଲେ । ସେ ଚାହିଁକି ବି ସେମାନଙ୍କୁ ବଞ୍ଚାଇ ପାରିନଥିଲେ ।

ପରେ ଦୀପକଙ୍କ ନଜର ଜଙ୍ଗଲରେ କାଠ ରଖିବା ପାଇଁ ବ୍ୟବହୃତ ଏକ ପୁରୁଣା ଗୋଦାମ ଉପରେ ପଡ଼ିଥିଲା । ସେଠାରେ ଆହୁରି ଅନେକ ଲୋକ ବନ୍ୟାରୁ ବଞ୍ଚି ଆଶ୍ରୟ ନେଇଥିଲେ । ଉଦ୍ଧାରକାରୀ ଦଳକୁ ଅପେକ୍ଷା କରି ସମସ୍ତେ ବିନା ବିଛଣାରେ ରାତି କାଟିଥିଲେ । ପ୍ରାୟ ୨୪ ଘଣ୍ଟା ପରେ ସେମାନଙ୍କୁ ସେଠାରୁ ଉଦ୍ଧାର କରାଯାଇଥିଲା ।
ବନ୍ୟା ପରେ ନେପାଳର ଅନେକ ଅଞ୍ଚଳର ଚିତ୍ର ମଧ୍ୟ ଅତ୍ୟନ୍ତ ଭୟଙ୍କର ଥିଲା । ତ୍ରିଶୁଳୀ ବଜାରରେ ପହଞ୍ଚିଥିବା ଜଣେ ଫଟୋ ଜର୍ଣ୍ଣାଲିଷ୍ଟଙ୍କ ଅନୁସାରେ, ବଜାରର ପ୍ରାୟ ୫୦ରୁ ୬୦ଟି ଘର କାଦୁଅ ଓ ମାଟି ତଳେ ପୋତି ହୋଇଯାଇଥିଲା । କେତେକ ସ୍ଥାନରେ କେବଳ ଘରର ଛାତ ଦେଖାଯାଉଥିଲା । ରାସ୍ତା କେଉଁଠି ଓ ଘର କେଉଁଠି, ତାହା ଚିହ୍ନିବା ମଧ୍ୟ କଷ୍ଟକର ହୋଇପଡ଼ିଥିଲା ।

ଏହି ବିପର୍ଯ୍ୟୟ ମଧ୍ୟରେ ଜଣେ ଭାରତୀୟ-ଆମେରିକୀୟ ଦମ୍ପତି ଅଞ୍ଜନା ରାଜା ଓ ପଟ୍ଟାଭିରାମନ୍ ଭେଙ୍କଟେଶନ୍ ମଧ୍ୟ ଫସିଯାଇଥିଲେ । ପରେ ଉଭୟଙ୍କୁ ଏୟାରଲିଫ୍ଟ କରି କାଠମାଣ୍ଡୁ ନିଆଯାଇଥିଲା ।

ଅଞ୍ଜନା କହିଛନ୍ତି, ବନ୍ୟା ଆସିବା ସମୟରେ ତାଙ୍କୁ ଲାଗିଥିଲା ଯେ ଏବେ ତାଙ୍କର ମୃତ୍ୟୁ ହେବ । ତାଙ୍କ ସ୍ୱାମୀ ଭେଙ୍କଟେଶନ୍ କହିଛନ୍ତି, ମାଟି ଓ ମଲବା ସହ ଏକ ବଡ଼ କାନ୍ଥ ମଧ୍ୟ ପାଣିର ସ୍ରୋତରେ ଭାସି ଆସୁଥିଲା । ଦୃଶ୍ୟଟି ଏମିତି ଥିଲା ଯେମିତି ସୁନାମି ମାଡ଼ି ଆସୁଛି ।

ଆଖି ସାମ୍ନାରେ ଘରଗୁଡ଼ିକ ଭୁଶୁଡ଼ି ପଡ଼ୁଥିବା ଦେଖି ଅଞ୍ଜନା ନିଜ ସ୍ୱାମୀଙ୍କୁ ‘ଦୌଡ଼’ ବୋଲି ଚିତ୍କାର କରିଥିଲେ। ଉଭୟେ ବସ୍‌ରୁ ଡେଇଁ ପଡ଼ି ପାହାଡ଼ ଆଡ଼କୁ ଦୌଡ଼ିଥିଲେ । ସେମାନେ କେଉଁଆଡ଼କୁ ଯାଉଛନ୍ତି ତାହା ମଧ୍ୟ ଜାଣିନଥିଲେ । କେବଳ ଜୀବନ ବଞ୍ଚାଇବା ପାଇଁ ଉପରକୁ ଚଢ଼ି ଚାଲିଥିଲେ ।

ସେପଟେ ବନ୍ୟା ପରେ ଭୋଟେକୋଶୀ ନଦୀରେ ପାଣିର ସ୍ତର ବଢ଼ୁଥିବାରୁ ରସୁୱା, ନୁୱାକୋଟ୍ ଓ ଧାଦିଙ୍ଗ ଜିଲ୍ଲାର ନଦୀକୂଳିଆ ଅଞ୍ଚଳର ଲୋକଙ୍କୁ ସତର୍କ କରାଯାଇଛି । ଏବେ ମାଟି ତଳେ କିଛି ଫସି ରହିଥିବାରୁ ଉଦ୍ଧାର କାର୍ଯ୍ୟ ପାଇଁ ୧୧ ହଜାରରୁ ଅଧିକ ସୁରକ୍ଷାକର୍ମୀଙ୍କୁ ମୁତୟନ କରାଯାଇଛି ।