ଏବେ ସବୁ କ୍ଷେତ୍ରରେ ବଢ଼ୁଛି AIର ବ୍ୟବହାର । ଶିକ୍ଷାଠୁ ଆରମ୍ଭ କରି ବୈଷୟିକ ଜ୍ଞାନ ପର୍ଯ୍ୟନ୍ତ ସବୁଠି AIର ବ୍ୟବହାର ବଢ଼ୁଛି । ଆଉ ଏବେ AI ତ ଜଣେ ବ୍ୟକ୍ତିଙ୍କ ଜୀବନ ବଞ୍ଚାଇଛି । ଏକଥା ଆପଣଙ୍କୁ ଟିକେ ଆଶ୍ଚର୍ଯ୍ୟ ଲାଗୁଥାଇପାରେ । କିନ୍ତୁ ଏହା ସତ । ସୋସିଆଲ ମିଡିଆରେ ଜଣେ ବ୍ୟକ୍ତି ଦାବି କରିଛନ୍ତି ଯେ AI ତାଙ୍କ ଜୀବନ ବଞ୍ଚାଇଛି । ବାସ୍ତବରେ ଏହି ଘଟଣା ଏଲନ୍‌ ମସ୍କଙ୍କ କମ୍ପାନୀ xAI ର Grok Chatbot ସହିତ ଜଡିତ । ସୋସିଆଲ ମିଡିଆ ପ୍ଲାଟଫର୍ମ Redditରେ ଏକ ପୋଷ୍ଟ ଭାଇରାଲ ହୋଇଛି, ଯେଉଁଥିରେ ଜଣେ ବ୍ୟକ୍ତି ଦାବି କରିଛନ୍ତି ଯେ AI ତାଙ୍କ ଜୀବନ ବଞ୍ଚାଇଛି ।

ବାସ୍ତବରେ ଜଣେ ୪୯ ବର୍ଷୀୟ ୟୁଜର୍ସ ତାଙ୍କର ଅଭିଜ୍ଞତା ସେୟାର କରି କହିଛନ୍ତି ଯେ ଯେତେବେଳେ ସେ ପେଟ ଯନ୍ତ୍ରଣା ଅନୁଭବ କଲେ, ସେ ଡାକ୍ତରଙ୍କ ପାଖକୁ ଯାଇଥିଲେ। ସେ ଡାକ୍ତରଙ୍କୁ ତାଙ୍କର ଯନ୍ତ୍ରଣା ବୁଝାଇଥିଲେ ଏବଂ ଡାକ୍ତର ଏହାକୁ ଗ୍ୟାସ ଯନ୍ତ୍ରଣା ବୋଲି କହିଥିଲେ । ଆଉ ତାଙ୍କୁ କିଛି ଔଷଧ ଦେଇ ଘରକୁ ପଠାଇ ଦେଇଥିଲେ ।

ଔଷଧ ଖାଇବା ପରେ ମଧ୍ୟ ସେହି ବ୍ୟକ୍ତିଙ୍କ ଯନ୍ତ୍ରଣା କମିନଥିଲା । ତା'ପରେ ସେ Grok AI କୁ ତାଙ୍କ ସମସ୍ୟା ବିଷୟରେ କହିଥିଲେ । Grok AI ଉତ୍ତର ଦେଇଥିଲେ ଯେ ଏହା ଏକ ସାଧାରଣ ଯନ୍ତ୍ରଣା ନୁହେଁ । AI ପରାମର୍ଶ ଦେଇଥିଲେ ଯେ ପେଟ ଭିତରେ ଏକ ଆପେଣ୍ଡିକ୍ସ ଫାଟି ଯାଇଥାଇପାରେ । ତେଣୁ ତାଙ୍କୁ ତୁରନ୍ତ ହସ୍ପିଟାଲ ଯାଇ CT ସ୍କାନ୍‌ କରିବା ଉଚିତ୍ ।

ବ୍ୟକ୍ତି ଜଣକ ତୁରନ୍ତ ହସ୍ପିଟାଲକୁ ଯାଇ CT ସ୍କାନ୍‌ କରିଥିଲେ

ତା’ପରେ ବ୍ୟକ୍ତି ଜଣକ ହସ୍ପିଟାଲକୁ ଯାଇ ତୁରନ୍ତ ଡାକ୍ତରଙ୍କୁ କହିଥିଲେ ଯେ ତାଙ୍କ ପେଟ ଯନ୍ତ୍ରଣା ଅଧିକ ହେଉଛି । ସେ ଡାକ୍ତରଙ୍କୁ ସିଟି ସ୍କାନ୍ କରିବାକୁ କହିଥିଲେ । ସିଟି ସ୍କାନ୍‌ରୁ ଜଣାପଡ଼ିଲା ଯେ ତାଙ୍କ ଆପେଣ୍ଡିକ୍ସରେ ଫୁଲି ଯାଇଥିଲା ଏବଂ ଫାଟିବା ସ୍ଥିତିରେ ଥିଲା । ଆଉ ଏହା ପରେ ଆପେଣ୍ଡିକ୍ସକୁ ଅପରେସନ୍ କରି କାଡ଼ି ଦିଆଯାଇଥିଲା ।

ଡାକ୍ତରଙ୍କୁ ମିଛ କହିବାକୁ ପଡିଲା

ଅପରେସନ୍ ପରେ ଯେତେବେଳେ ସେ ରୁଟିନ୍‌ ଚେକ୍‌ ପାଇଁ ହସ୍ପିଟାଲକୁ ଯାଇଥିଲେ ସେ ଡାକ୍ତରଙ୍କୁ ଏହି ବିଷୟରେ କହିନଥିଲେ ଯେ ସେ Grok AIକୁ ଏହା ବିଷୟରେ ପଚାରିଥିଲେ । ସେ ଡାକ୍ତରଙ୍କୁ ମିଛ କହି କହିଥିଲେ ଯେ ତାଙ୍କ ଭଉଣୀ ଜଣେ ନର୍ସ ଏବଂ ସେ ତାଙ୍କୁ ସିଟି ସ୍କାନ୍ କରିବାକୁ ପରାମର୍ଶ ଦେଇଥିଲେ।

ଯଦିଓ ଏଆଇ ନିର୍ମାତାମାନେ ଲୋକଙ୍କୁ ପରାମର୍ଶ ଦେଉଛନ୍ତି ଯେ ଏଆଇ-ଚାଳିତ ଚାଟବଟ୍‌ଗୁଡ଼ିକ ଏପର୍ଯ୍ୟନ୍ତ ଡାକ୍ତରଙ୍କୁ ବଦଳାଇବାକୁ ସକ୍ଷମ ନୁହଁନ୍ତି। ଅନେକ ଲୋକ ଏଆଇ ଚାଟବଟ୍‌ଗୁଡ଼ିକରୁ ଔଷଧ, ପରାମର୍ଶ ଏବଂ ଅନ୍ୟାନ୍ୟ ସେବା ଖୋଜନ୍ତି। ଚାଟଜିପିଟି ନିର୍ମାତା ଓପନଏଆଇର ସିଇଓ ପୂର୍ବରୁ ଲୋକଙ୍କୁ ଚେତାବନୀ ଦେଇସାରିଛନ୍ତି ଯେ ଚାଟଜିପିଟିକୁ ଡାକ୍ତର ଭାବରେ ବ୍ୟବହାର କରିବା ଭୁଲ ଏବଂ ଏହା ବିପଜ୍ଜନକ ପ୍ରମାଣିତ ହୋଇପାରେ ।