Strait of Hormuz Ship Attack / ହର୍ମୁଜ୍‌ରେ କମର୍ସିଆଲ ଜାହାଜ ଉପରେ ଆକ୍ରମଣ, ୧୧ ଭାରତୀୟ ନାବିକ ଆହତ

ଆମେରିକା ଓ ଇରାନ ମଧ୍ୟରେ ବଢ଼ୁଥିବା ବିବାଦ ମଧ୍ୟରେ ଓମାନ ତଟ ନିକଟରେ ଏକ କମର୍ସିଆଲ ଜାହାଜ ଉପରେ ଆକ୍ରମଣ ହୋଇଛି । ଏହି ଆକ୍ରମଣରେ ୧୧ ଜଣ ଭାରତୀୟ ନାବିକ ଆହତ ହୋଇଛନ୍ତି । ମଙ୍ଗଳବାର, ଅକ୍ଟୋବର ୬ ତାରିଖରେ ଭାରତୀୟ ବୈଦେଶିକ ମନ୍ତ୍ରଣାଳୟ (MEA) ଏହି ଘଟଣାକୁ ନିନ୍ଦା କରିଛି ।
MEA ସୂଚନା ଅନୁସାରେ, ପାନାମାର ପତାକା ଥିବା କମର୍ସିଆଲ ଜାହାଜ MT On Peace (IMO 9893204) ଷ୍ଟ୍ରେଟ୍ ଅଫ୍ ହର୍ମୁଜ୍ ଦେଇ ଯାଉଥିବା ସମୟରେ ଏକ ପ୍ରୋଜେକ୍ଟାଇଲ୍‌ ଦ୍ବାରା ଆଘାତ ହୋଇଥିଲା । ଜାହାଜରେ ମୋଟ ୧୯ ଜଣ କ୍ରୁ ସଦସ୍ୟ ଥିଲେ, ଯେଉଁଥିରୁ ୧୭ ଜଣ ଭାରତୀୟ ନାଗରିକ ।

ଆକ୍ରମଣରେ ମୋଟ ୧୨ ଜଣ କ୍ରୁ ସଦସ୍ୟ ଆହତ ହୋଇଛନ୍ତି । ସେମାନଙ୍କ ମଧ୍ୟରେ ୧୧ ଜଣ ଭାରତୀୟ ଅଟନ୍ତି । ଓମାନ କର୍ତ୍ତୃପକ୍ଷଙ୍କ ସହଯୋଗରେ ଆହତମାନଙ୍କୁ ଜାହାଜରୁ ଉଦ୍ଧାର କରାଯାଇ ଓମାନର ଖସାବ୍‌ରେ ଚିକିତ୍ସା ପାଇଁ ଭର୍ତ୍ତି କରାଯାଇଛି ।

ଓମାନକୁ ଧନ୍ୟବାଦ ଜଣାଇଲା ଭାରତ

ଘଟଣାରେ ସହଯୋଗ ପାଇଁ ଓମାନ କର୍ତ୍ତୃପକ୍ଷଙ୍କୁ ଭାରତୀୟ ବୈଦେଶିକ ମନ୍ତ୍ରଣାଳୟ ଧନ୍ୟବାଦ ଜଣାଇଛି। ଏଥିସହିତ ଅଞ୍ଚଳରେ କମର୍ସିଆଲ ଜାହାଜ ଉପରେ ବାରମ୍ବାର ହେଉଥିବା ଆକ୍ରମଣକୁ ନେଇ ଭାରତ ଗଭୀର ଚିନ୍ତା ପ୍ରକାଶ କରିଛି । ଭାରତ କହିଛି ଯେ, କମର୍ସିଆଲ ଜାହାଜ, ନାବିକ ଏବଂ ସାଧାରଣ ଲୋକଙ୍କ ସହ ଜଡ଼ିତ ଭିତ୍ତିଭୂମିକୁ ଟାର୍ଗେଟ୍ କରିବା ତୁରନ୍ତ ବନ୍ଦ ହେବା ଦରକାର। ଆନ୍ତର୍ଜାତୀୟ ଜଳପଥରେ ଜାହାଜ ଚଳାଚଳ ଓ ବାଣିଜ୍ୟକୁ ଶୀଘ୍ର ସ୍ୱାଭାବିକ କରାଯିବା ଆବଶ୍ୟକ ବୋଲି MEA କହିଛି ।

ଷ୍ଟ୍ରେଟ୍ ଅଫ୍ ହର୍ମୁଜ୍‌କୁ ନେଇ ବଢ଼ୁଛି ସଙ୍କଟ

ଇରାନ, ଆମେରିକା ଏବଂ ଇସ୍ରାଏଲ ମଧ୍ୟରେ ଯୁଦ୍ଧ ଆରମ୍ଭ ହେବା ପରେ ଷ୍ଟ୍ରେଟ୍ ଅଫ୍ ହର୍ମୁଜ୍‌ରେ ସଙ୍କଟ ଆହୁରି ଗଭୀର ହୋଇଛି । ଏହି ଅଞ୍ଚଳ ବିଶ୍ୱ ବାଣିଜ୍ୟ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଜଳପଥ ହୋଇଥିବାରୁ ଏଠାରେ ଜାହାଜ ଚଳାଚଳକୁ ନେଇ ଚିନ୍ତା ବଢ଼ିଛି । ଆମେରିକା ପକ୍ଷରୁ ହର୍ମୁଜ୍‌ ଉପରେ ନିଜର ନିୟନ୍ତ୍ରଣ ଥିବା ଦାବି କରାଯାଉଥିବାବେଳେ ଇରାନ ମଧ୍ୟ ଏହି ଜଳପଥକୁ ନିଜ ନିୟନ୍ତ୍ରଣରେ ଥିବା ଦାବି କରୁଛି ।

୧୩୦ କମର୍ସିଆଲ ଜାହାଜର ରୁଟ୍ ବଦଳାଇଛି ଆମେରିକା

ଆମେରିକୀୟ ସେନା ଅନୁସାରେ, ଅକ୍ଟୋବର ୫ ପର୍ଯ୍ୟନ୍ତ ଇରାନ ବିରୋଧରେ ଚାଲିଥିବା ଆମେରିକୀୟ ନୌସେନା ନାକାବନ୍ଦୀକୁ କଡ଼ାକଡ଼ି ଭାବେ ଲାଗୁ କରାଯାଇଛି । ଏହି ସମୟରେ CENTCOM ସେନା ୧୩୦ଟି କମର୍ସିଆଲ ଜାହାଜର ରୁଟ୍ ବଦଳାଇଥିବା କହିଛି ।

CENTCOM କମାଣ୍ଡର ଆଡମିରାଲ୍ ବ୍ରାଡ୍ କୁପର କହିଛନ୍ତି ଯେ, ନାକାବନ୍ଦୀକୁ ଭାଙ୍ଗିବାକୁ ଚେଷ୍ଟା କରୁଥିବା ଯେକୌଣସି ଜାହାଜ ବିରୋଧରେ ତୁରନ୍ତ ପଦକ୍ଷେପ ନିଆଯିବ । ଏହା ସହିତ ଅଞ୍ଚଳରେ ବାଣିଜ୍ୟିକ ଜାହାଜ ଚଳାଚଳ ଏବଂ ନାବିକମାନଙ୍କ ସୁରକ୍ଷାକୁ ନେଇ ଚିନ୍ତା ଆହୁରି ବଢ଼ିଛି ।