ଜଳୁଛି ମଧ୍ୟପ୍ରାଚ୍ୟ । ଆମେରିକା-ଇସ୍ରାଏଲ ମିଳିତ ଭାବେ ଇରାନ ଉପରେ ଘନଘନ ଆକ୍ରମଣ ଜାରି ରଖିଛନ୍ତି । ସେହିପରି ଇରାନ ମଧ୍ୟ ଆକ୍ରମଣର ଜବାବ ଦେଉଛି । ଇରାନ ମଧ୍ୟରେ ଭୟଙ୍କର ଯୁଦ୍ଧ ମଧ୍ୟରେ ଭାରତ ଏକ ବଡ଼ କୂଟନୈତିକ ସଫଳତା ହାସଲ କରିଛି । ଇରାନ ଏଲପିଜି ଗ୍ୟାସ୍ ବହନ କରୁଥିବା ଦୁଇଟି ଭାରତୀୟ ଟ୍ୟାଙ୍କରକୁ ହର୍ମୁଜ୍ ପ୍ରଣାଳୀ ଦେଇ ପରିବହନ ପାଇଁ ଅନୁମତି ପ୍ରଦାନ କରିଛି । ଜାତୀୟ ଗଣମାଧ୍ୟମର ସୂଚନା ଅନୁସାରେ, ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ (ଆଇଆରଜିସି) ଭାରତୀୟ ଏଲପିଜି ଟ୍ୟାଙ୍କର, "ଜଗ ବସନ୍ତ" ଏବଂ "ପାଇନ୍ ଗ୍ୟାସ"କୁ ଏହି ରାସ୍ତା ଦେଇ ପରିବହନ ପାଇଁ ଅନୁମତି ପ୍ରଦାନ କରିଛି ।

ଜାହାଜ ଟ୍ରାକିଂ ତଥ୍ୟ ଅନୁଯାୟୀ, ଦୁଇଟି ଏଲପିଜି ଜାହାଜ ସୋମବାର (୨୩ ମାର୍ଚ୍ଚ, ୨୦୨୬) ମଧ୍ୟାହ୍ନ ସୁଦ୍ଧା ଇରାନର ଲାରାକ ଏବଂ କ୍ୱେଶମ୍ ଦ୍ୱୀପରେ ପହଞ୍ଚିବାର ଥିଲା । ଯେତେବେଳେ ଉଭୟ ଜାହାଜ ହର୍ମୁଜ ପ୍ରଣାଳୀର ନିକଟତର ହେଉଥିଲେ ସେମାନେ ଇରାନୀ କର୍ତ୍ତୃପକ୍ଷଙ୍କୁ ସଙ୍କେତ ଦେଇଥିଲେ ଯେ ସେମାନେ ଭାରତୀୟ ଜାହାଜ । ଯାହା ଦ୍ୱାରା ଆଇଆରଜିସି ସେମାନଙ୍କୁ ନେଇ କୌଣସି ଦ୍ୱନ୍ଦ୍ୱରେ ରହିବ ନାହିଁ ।

ଆମେରିକା ଏବଂ ଇସ୍ରାଏଲ ସହିତ ଚାଲିଥିବା ସଂଘର୍ଷ ମଧ୍ୟରେ ଇରାନ ହର୍ମୁଜ୍ ପ୍ରଣାଳୀରେ ଆଇଆରଜିସି ଅଧିକାରୀମାନଙ୍କୁ ନିୟୋଜିତ କରିଛି । ଇରାନ ଦାବି କରୁଛି ଯେ ସେ କେବଳ ଆମେରିକା ଏବଂ ଏହାର ସହଯୋଗୀଙ୍କ ଜାହାଜକୁ ଟାର୍ଗେଟ କରିବ, ଏବଂ ସାଧାରଣ ନାଗରିକଙ୍କୁ କ୍ଷତି ପହଞ୍ଚାଯିବ ନାହିଁ । ଏହି ସମୟରେ ଭାରତ ଏହି ରାସ୍ତା ଦେଇ ଏହାର ଟ୍ୟାଙ୍କରଗୁଡ଼ିକର ସୁରକ୍ଷିତ ପଥ ସୁନିଶ୍ଚିତ କରିବା ପାଇଁ ଇରାନ ସହିତ କୂଟନୈତିକ ଆଲୋଚନା କରୁଛି । ଯାହାଫଳରେ ଗତ ସପ୍ତାହରେ ଦୁଇଟି ଭାରତୀୟ ଜାହାଜ ଶିବାଲିକ୍ ଏବଂ ନନ୍ଦ ଦେବୀଙ୍କୁ ହର୍ମୁଜ ପ୍ରଣାଳୀ ଦେଇ ଆସିବାକୁ ଇରାନ ଅନୁମତି ଦେଇଥିଲା ।

ଜାହାଜ ଟ୍ରାକିଂ ତଥ୍ୟ ଅନୁଯାୟୀ, ଜଗ ବସନ୍ତ ଏବଂ ପାଇନ୍ ଗ୍ୟାସ୍ ସଂଯୁକ୍ତ ଆରବ ଏମିରେଟ୍ସର ଶାରଜା ବନ୍ଦର ନିକଟରେ ଫସି ରହିଥିଲା । ହର୍ମୁଜ୍ ପ୍ରଣାଳୀ ବନ୍ଦ ହେବା ଯୋଗୁଁ ବର୍ତ୍ତମାନ କୋଡ଼ିଏ ଭାରତୀୟ ଜାହାଜ ଫସି ରହିଛି ଏବଂ ଏହି ଦୁଇଟି ଜାହାଜକୁ ପାର ହେବା ପାଇଁ ଅନୁମତି ଦିଆଯିବା ଅନ୍ୟ ଜାହାଜ ପାଇଁ ମଧ୍ୟ ଏକ ସକାରାତ୍ମକ ସଙ୍କେତ ଭାବରେ ଦେଖାଯାଉଛି ।